1936 جىلى ماسكەۋ قالاسىندا قازاق ادەبيەتى مەن ونەرىنىڭ العاشقى ونكۇندىگى وتكەنى بەلگىلى. 17-27 مامىر كۇندەرى سول كەزدەگى وداق استاناسىندا قازاقتىڭ مەملەكەتتىك مۋزىكالىق تەاترى ەۆگەني برۋسيلوۆسكيدىڭ «قىز جىبەك», «جالبىر» وپەرالارىن, احمەت جۇبانوۆ باستاپ بارعان ۇلت اسپاپتار وركەسترى بىرنەشە كونتسەرتتەر قويدى.
ءدال سول كەزدە جىبەك بەينەسىن سومداعان كۇلاش بايسەيىتوۆا 24 جاسىندا كسرو حالىق ءارتىسى اتانعانى دا تاريحتان ايان. كۇلاشپەن قاتار وسى ونكۇندىككە ءسابيرا مايقانوۆا, شارا جيەنقۇلوۆا, حابيبا ەلەبەكوۆالار دا قاتىسىپ, ساحنادا جارقىرادى.
ارتىستەر مەن قالامگەرلەر بوس ۋاقىتىندا ماسكەۋدى ارالادى. ءسابيرا مايقانوۆا (سول جاقتا) مەن حابيبا ەلەبەكوۆا سول ۋاقىتتا فوتوسۋرەتكە تۇسكەن. ارتىستەردىڭ مويىندارىنداعى جۇقا شارفتاردى ماسكەۋ گۋم-ىنان ساكەن سەيفۋللين تاڭداپ بەرگەن.
ساكەننىڭ كۇلاش پەن شاراعا فرانتسۋز ءاتىرىن سىيلاپ, ولار سونى الىپ باستارىنا قۇيا سالىپ, ءيىسى تالايعا دەيىن كەتپەدى دەگەن قىزىقتى اڭگىمە دە بار. جالپى سول ساپاردان ەستەلىك رەتىندە قالعان بىرنەشە فوتوسۋرەت بار. ولاردى كەيىنگە قالدىرىپ, الدىمەن ءبىر سۋرەتپەن عانا بولىسكەندى ءجون كوردىك.
