«استانا» كونتسەرت زالىندا تالانتتى كومپوزيتور, قازاقستاننىڭ حالىق ءارتىسى مانسۇر ساعاتوۆتىڭ شىعارماشىلىعىنا ارنالعان كونتسەرت بولدى. بۇل مۋزىكالىق كەشتى ەلوردانىڭ مەملەكەتتىك اكادەميالىق فيلارمونياسى ۇيىمداستىردى.
بيىل ايتۋلى تۇلعانىڭ تۋعانىنا 80 جىل تولدى. ءدۇلدۇل انشىلەر مەن كۇيشىلەر شىققان باتىس ءوڭىرىنىڭ پەرزەنتى مانسۇر اعامىز بالا كۇنىنەن مۋزىكاعا جاقىن بولىپ وسەدى. الماتىداعى كۇلاش بايسەيىتوۆا اتىنداعى رەسپۋبليكالىق مۋزىكا مەكتەبىنىڭ فلەيتا كلاسىندا وقيدى. ونى بىتىرگەننەن كەيىن قۇرمانعازى اتىنداعى الماتى مەملەكەتتىك كونسەرۆاتورياسىن ءتامامدايدى.
كومپوزيتوردىڭ شىعارماشىلىق جولى كونسەرۆاتوريادا وقىپ جۇرگەندە باستالادى. ول كىسى وسى جىلدارى ىشەكتى اسپاپتار كۆارتەتى ءۇشىن سيۋيتا; ۆيولونچەل مەن فورتەپيانوعا ارنالعان ەكسپرومت جانە حالىق ءانى «ءلايلىمنىڭ» نەگىزىندە ۆارياتسيالار جازدى. ساعاتوۆتىڭ سيمفونيالىق وركەسترگە ارنالعان «مەرەكەلىك ۋۆەرتيۋراسى», «مەرگەن» سيمفونيالىق كۇيى, «مەموريال» اتتى سيمفونيالىق سيۋيتاسى, «مەرەكەلىك», «دوستىق ەلى» كانتاتالارى ۇلتتىق مۋزىكانىڭ اسىل قازىناسىنا اينالدى. سونداي-اق دارىندى ازاماتتىڭ «تۋعان ەل», «الماتىم مەنىڭ», «باقىت قۇسى», «مەنى ىزدە» دەگەن اندەرى دە تىڭدارمانداردىڭ جۇرەگىنەن جول تابا ءبىلدى.
ءبىر وكىنىشتىسى, وسىنداي كلاسسيكالىق شىعارمالار جازعان كومپوزيتوردىڭ ەسىمى بۇل كۇندە كوپ ايتىلمايدى.
كەش بارىسىندا اتالعان فيلارمونيانىڭ سيمفونيالىق وركەسترىنىڭ سۇيەمەلدەۋىمەن اۆتوردىڭ «مەرگەن», «Andante», «ديالوگتار» سەكىلدى سيمفونيالىق پوەمالارى مەن اندەرى ورىندالىپ, كەلگەن جۇرتشىلىقتى ادەمى اسەرگە بولەدى.
