جۋىردا قولىمىزعا «ساعىندىرعان اسىلدار» اتتى كىتاپ ءتۇستى. كىتاپ اتاۋى مەن مۇقاباسىنداعى بار قازاققا اياۋلى بەينەلەر جۇرەككە جىلىلىق ۇيالاتىپ, مازمۇنىنا جەتەلەي جونەلدى. مۇندا ەركە ەسىل بويىندا اسەم ەلوردا ورناعالى قالانىڭ رۋحاني تۇرعىدان كەمەلدەنۋىنە, شىن مانىندە استانا اتىنا ساي بولۋىنا ولشەۋسىز ۇلەسىن قوسقان, وكىنىشكە قاراي, قازىر ومىردە جوق تۇلعالار تۋرالى پايىمدى تولعامدار جيناقتالعان.
استانا قالاسى اكىمدىگىنىڭ قولداۋىمەن وتكەن جىلدىڭ سوڭىندا جارىق كورگەن قالىڭ تومداي بۇل ەڭبەكتى ءوزىمىزدىڭ «استانا اقشامى» گازەتىنىڭ بۇرىنعى باس رەداكتورى, قر پرەزيدەنتى سىيلىعىنىڭ يەگەرى, قازاقستاننىڭ ەڭبەك سىڭىرگەن قايراتكەرى, قازاقستاننىڭ قۇرمەتتى ءجۋرناليسى جۇماگۇل ساۋحات قۇراستىردى.
اسا كورنەكتى جازۋشى ساكەن ءجۇنىسوۆ, قالامنىڭ قارىمى مەن عالىمدىق الىمىن قاتار تانىتقان رىمعالي نۇرعاليۇلى مەن اقسەلەۋ سەيدىمبەك, ساحنا ساڭلاعى ءازىربايجان ءمامبەتوۆ ءبىز استاناعا كەلگەندە ءفاني ساپارىن تامامداعان ەدى. ال كىتاپتىڭ وزگە كەيىپكەرلەرى – كومپوزيتور ەركەعالي راحماديەۆ, ءىرى قالامگەرلەر دۇكەنباي دوسجان, نۇرعوجا وراز, «جەزكيىك» اقىن كاكىمبەك سالىقوۆ, پوەزيا پاديشاسى فاريزا وڭعارسىنوۆا, ۇلتتىڭ ابىزىنداي بولعان جازۋشى ءابىش كەكىلبايۇلى جانە بەلگىلى تەاتر سىنشىسى اشىربەك سىعاي سەكىلدى تۇلعالارمەن كەزدەسكەن جەردە امانداسۋدان ارىگە اسا المادىق. بۇل كىسىلەرمەن سۇحباتقا ادەتىمىزشە ۇزاق دايىندالىپ ءجۇرگەنىمىزدە, ولار باقيعا كوشىپ كەتە باردى. كوزدەرى باردا ەمەن-جارقىن اڭگىمە قۇرا الماعانىمىزعا ءالى كۇنگە دەيىن وكىنەمىز.
امال قانشا, قازاق رۋحانياتىنىڭ بۇل الىپتارى تۋرالى ەندى وتكەن شاقتا عانا جازۋعا ءماجبۇرمىز. قولدان كەلگەنشە جازىپ تا كەلەمىز. گازەتىمىزدىڭ كوزى قاراقتى وقىرماندارى جىل باسىنان بەرى بيىلعى مەرەيتويلارىنا وراي جارىق كورىپ كەلە جاتقان اشىربەك سىعاي, كاكىمبەك سالىقوۆ تۋرالى جانە نۇرعوجا ورازدىڭ دۇنيەدەن وتكەنىنە ءبىر جىل تولۋىنا ارنالعان ماقالالاردى وقىعان دا بولار. بۇل ءۇردىستى, بۇيىرتسا, ءالى دە جالعاستىرامىز. سەبەبى وسى قاتارداعى ءبىرنەشە تۇلعانىڭ 75, 85 جىلدىقتارى اعىمداعى جىلدىڭ ەنشىسىنە ءتيىپ تۇر.
وسىلاردىڭ قاي-قايسىسى بولسىن ۇلتتىق ادەبيەت, مادەنيەت, ونەر, عىلىم سالالارىنا ەرەن ەڭبەك ءسىڭىرىپ, استانانىڭ وركەنيەت ءبيىگىنە كوتەرىلۋىنە بارىن سالدى. ولاردىڭ ەسىمدەرىن ەلدىڭ ەسىندە ماڭگىگە قالدىرۋ ماقساتىندا دا قالادا ءبىرشاما جۇمىستار اتقارىلىپ جاتىر. ماسەلەن, رىمعالي نۇرعاليۇلىنىڭ اتىنا مەكتەپ بەرۋ ماسەلەسى بەكىتىلۋگە تاياۋ. اقسەلەۋ سەيدىمبەكتىڭ اتىمەن دا ورتا ءبىلىم بەرۋ ورنىن اتاۋ كۇن تارتىبىنەن تۇسكەن جوق. ءازىربايجان مامبەتوۆكە جۋىردا كوشە بەرىلدى. فاريزا وڭعارسىنوۆا تۇرعان ۇيگە مەموريالدىق ەسكەرتكىش تاقتا ورناتىلدى. قر ۇلتتىق اكادەميالىق كىتاپحانادا دۇكەنباي دوسجان اتىنداعى «جازۋشى» زالى جۇمىس ىستەپ تۇر.
ارينە, مۇنىمەن بارلىق جۇمىس اياقتالدى دەپ ايتۋعا بولمايدى. حالىقتا ومىردەن وتكەن تۇلعالارعا دەگەن ساعىنىش بار. سول سەزىمدى «ساعىندىرعان اسىلدار» كىتابى ءسال دە بولسا باساتىن سياقتى. ونى شىعارۋداعى ماقسات پەن الدا اتقارىلار ىستەر اۋقىمى جايلى كىتاپتىڭ العىسوزىندە ايتىلادى.
«بۇل – ەڭبەك تاريحي تۇلعالارعا ۇلتتىق قۇرمەتتىڭ كورىنىسى, استانانىڭ سول اسىلدارعا دەگەن ساعىنىشقا تولى ءىلتيپاتى. الداعى ماقسات – الىپ ازاماتتارىمىزدىڭ رۋحىنا تاعزىم ەتۋ, ولاردىڭ ماڭگىلىككە قالدىرعان ءماندى ەڭبەكتەرىن, قازىنالى مۇرالارىن جاستاردىڭ رۋحاني قازىناسىنا اينالدىرىپ, ۇرپاققا جەتكىزۋ. ۇلتىمىزدىڭ تولقۇجاتىنا اينالعان تۇلعالاردى ءاسپەتتەپ, ۇلىقتاي بەرەيىك, باعالاي بىلەيىك!» دەيدى استانا قالاسى اكىمىنىڭ ورىنباسارى ەرمەك امانشاەۆ. وتكىنشى دۇنيەدە ماڭگىلىك ەشتەڭە جوق. ەل بولىپ, ۇلت بولىپ ۇيىسىپ, العا باسا بەرۋىمىز ءۇشىن وسىنداي تۇلعالاردىڭ ۇلگىسى مەن ونەگەسىن ۇستانۋ بىزگە اۋاداي قاجەت. كىتاپ وسىنىسىمەن قۇندى.
امانعالي قالجانوۆ
