«سالاماتتى قازاقستان» مەديتسينالىق پويىزى استانادان شالعاي اۋىلدارعا اتتاندى

دارىگەرلەر بريگاداسى بار مەديتسينالىق پويىز 147 شالعاي اۋىل تۇرعىندارىنا تەگىن امبۋلاتوريالىق كومەك كورسەتۋ ءۇشىن جولعا شىقتى.

بيىلعى جىلى «دوڭگەلەكتەگى ەمحانا» ءوز جۇمىسىن سۋ تاسقىنىنان زارداپ شەككەن باتىس وڭىرلەردەن باستايدى جانە 90 مىڭ اۋىل تۇرعىندارىن مەديتسينالىق قىزمەتتەرمەن قامتۋعا باعىتتالعان.

«جوبانىڭ ارقاسىندا ستانتسيالاردىڭ جانە وعان ىرگەلەس ەلدى مەكەندەردىڭ كوپتەگەن تۇرعىندارى بىلىكتى دارىگەرلەردەن كونسۋلتاتسيا الىپ, قانداي دا ءبىر اۋرۋلارعا تەكسەرىلە الادى. بيىل العاش رەت مامموگراف ساتىپ الىندى, ونىڭ قىزمەتتەرى دە حالىققا قولجەتىمدى بولادى. پويىز جۇمىسىنا 14 ارنايى مامان قاتىسادى.

وسىلايشا, پويىز قىزمەتىنىڭ ارقاسىندا ادامعا ءتيىمدى كومەك كورسەتۋگە بولاتىن پاتولوگيانى ەرتە كەزەڭدە انىقتاۋ مۇمكىندىگى ارتىپ كەلەدى», – دەدى دەنساۋلىق ساقتاۋ ءبىرىنشى ۆيتسە-ءمينيسترى تيمۋر سۇلتانعازيەۆ مەديتسينالىق پويىزدى شىعارىپ سالۋ راسىمىندە.

دارىگەرلىك بريگادانىڭ قۇرامىندا تەراپەۆت, حيرۋرگ, پەدياتر, پسيحولوگ, نەۆروپاتولوگ, ۋلترادىبىستىق دياگنوستيكا مامانى, جالپى پراكتيكا دارىگەرى, رەنتگەنولوگ, كارديولوگ, ستوماتولوگ, وفتالمولوگ, وتولارينگولوگ, ونكولوگ-ماممولوگ, گينەكولوگ جانە ۋرولوگ مەديتسينالىق كومەك كورسەتەدى.
كونسۋلتاتسيالىق-دياگنوستيكالىق كومەكتەن باسقا, مەديتسينالىق پويىز ماماندارى شاعىن وپەراتسيالار جۇرگىزە الادى, ستاتسيونارلارعا جوسپارلى ەمدەلۋگە جولداما بەرە الادى.

مەدپويىزدىڭ قوزعالىس كەستەسى شالعايداعى ستانتسيالاردا مەديتسينالىق پۋنكتتەردىڭ بولماۋىن ەسكەرە وتىرىپ, سونداي-اق ازاماتتار مەن مەملەكەتتىك ورگاندار وتىنىشتەرىنىڭ نەگىزىندە ازىرلەندى.

مەديتسينالىق بريگادا دارىگەرلەرى اۋىل تۇرعىندارىنا مەديتسينالىق-سانيتاريالىق العاشقى جانە كونسۋلتاتسيالىق-دياگنوستيكالىق كومەك كورسەتەدى, ءاربىر ستانتسيادا ورتا ەسەپپەن 1-2 كۇن بولادى.

«سالاماتتى قازاقستان» پويىزى – بىرەگەي جوبا. پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ جوباعا جان-جاقتى قولداۋ كورسەتۋى ماڭىزدى. مەديتسينالىق كونسۋلتاتسيالار مەن دياگنوستيكا جۇرگىزۋدەن باسقا, شالعايداعى ەلدى مەكەندەردىڭ تۇرعىندارىنا مەدياتسيالىق-قۇقىقتىق جانە پسيحولوگيالىق كومەك كورسەتىلەدى, داۋلاردى شەشۋ, وتىنىشتەردى قابىلداۋ, ازاماتتاردىڭ قۇقىقتارى مەن مۇددەلەرىن قورعاۋ بويىنشا شارالار قابىلدانۋدا», – دەپ اتاپ ءوتتى قر مادەنيەت جانە اقپارات ۆيتسە-ءمينيسترى ەۆگەني كوچەتوۆ.

2010 جىلدان باستاپ «مەديتسينالىق پويىزدار» جوباسى ەلىمىزدىڭ بارلىق وڭىرلەرىندە 1991 ستانتسياعا باردى, 658 407 ادام, ونىڭ ىشىندە 142 660 بالا زەرتتەلىپ-قارالدى. دارىگەرلەردىڭ قاراپ-تەكسەرۋلەرىنىڭ سانى شامامەن 3,5 ملن, 29 مىڭعا جۋىق شاعىن امبۋلاتوريالىق وپەراتسيا جاسالدى, 169 مىڭ تۇرعىنعا ستوماتولوگيالىق كومەك كورسەتىلدى.

الەۋمەتتىك جوبا قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ, قر دەنساۋلىق ساقتاۋ مينيسترلىگىنىڭ جانە «Samruk-Kazyna Trust» الەۋمەتتىك جوبالاردى دامىتۋ قورىنىڭ «سامۇرىق-قازىنا» اق كومپانيالار توبىنىڭ ارىپتەستىگى كەزىندە ىسكە اسىرىلادى.