اۋرۋدىڭ قالاي جۇعاتىنى ءالى بەلگىسىز. سوندىقتان ساقتانۋ جولى دا بەيمالىم. اۋا ارقىلى جۇعادى دەپ ءجۇرمىز, دەگەنمەن ناۋقاسپەن ەش بايلانىس بولماي, ۆيرۋس جۇقتىرىپ جاتقاندار دا بار.
كوروناۆيرۋسپەن اۋىرماۋدىڭ ناقتى نۇسقاۋلىعى جوق. ەڭ باستىسى, سالاۋاتتى ءومىر سالتىن ۇستانىپ, دۇرىس تاماقتانۋ كەرەك. سونداي-اق دەنە جاتتىعۋلارىن جاساپ, گيمناستيكامەن اينالىسۋ قاجەت. سترەسكە اكەلەتىن جاعدايلاردان, قارىزعا اقشا, نەسيە الۋدان قاشقان ءجون. سەبەبى ادامدى جەگىدەي جەيتىن ۋايىم دەگەن جامان, ول ادامنىڭ يممۋنيتەتىن تۇسىرۋگە اپارادى.
سيمپتومدى نەمەسە سيمپتومسىز ناۋقاس دەپ ايتىپ جۇرگەنىمىز – تەوريالىق تۇرعىدان ءبىر نارسە. الدىڭعىسىندا دا ۆيرۋس بار, تەك ول جاسۋشانىڭ سىرتىندا, سوندىقتان كلينيكالىق بەلگىسى بولمايدى. الايدا ۆيرۋسقا ءسال مۇمكىندىك بەرسە, ول ءبىر-اق مينۋتتىڭ ىشىندە سيمپتومدى ناۋقاسقا اينالىپ شىعا كەلەدى. ول قالاي بولادى؟ ياعني ادام سالقىن سۋ ىشسە, بالمۇزداق جەسە, كونديتسيونەر الدىندا تۇرىپ قالسا, ءسويتىپ سۋىق تيگىزىپ السا, سيمپتومسىز تۇردەن سيمپتومدى تۇرگە اۋىسىپ كەتۋى مۇمكىن.
ءۇي جاعدايىندا وكپەگە ارنالعان جاتتىعۋلار جاساۋ تۋرالى ايتىلادى. بىراق جاسى 70-تەن اسقان, قان قىسىمى بار, كوروناۆيرۋسپەن اۋىر دارەجەدە اۋىرعان ناۋقاستار جاتتىعۋ جاساي المايدى. ويتكەنى ولار ەنتىگىپ قالادى. بۇل جاتتىعۋلاردى تەك جەڭىل جانە ورتا دارەجەدە اۋىرعاندا جاسايدى. ءبىر ايتا كەتەرلىگى, وكپە جاتتىعۋلارى ەشقانداي دا ەمگە جاتپايدى, ول – تەك قوسىمشا ساۋىقتىرۋ شاراسى.
تاعى ءبىر وكىنىشتى جاعداي – اۋرۋحاناعا كوپ ادامدار اۋرۋىن اسقىندىرىپ بارىپ كەلەتىنى. مىسالى, اۋىرسا دا شىداپ, جەدەل جاردەم شاقىرماي, ۇيلەرىندە ءبىر اپتاداي جاتىپ قالادى. بۇل ارالىقتا اۋرۋى قاتتى اسقىنىپ, ءولىم اۋزىندا جاتقاندا عانا جەتكىزىلەدى. ادامداردىڭ كوبى ەنتىگۋى جيىلەگەن كەزدە دە, ءتىپتى دەنە قىزۋى 40 گرادۋستان تۇسپەسە دە شىداپ جاتا بەرەدى. بىراق بۇلاي ىستەۋگە بولمايدى. ەگەر ادامنىڭ دەنە قىزۋى 39-40 گرادۋسقا جاقىنداسا, ەنتىگۋ جيىلەسە, السىزدىك كۇشەيسە, تەز ارادا جەدەل جاردەم شاقىرتۋى كەرەك.
عابيت نۇرحانۇلى,
انەستەزيولوگ-رەانيماتولوگ
