شاش ادامعا كورىك بەرىپ قانا قويمايدى, حالقىمىز ءۇشىن ول ەرتەدەن-اق قاسيەتتى سانالعان. اسىرەسە, قىز بالانىڭ سۇلۋلىعىن ەسەلەپ تۇراتىن قويۋ قارا شاشىنا قايشى تيگىزبەي, ەرەكشە كۇتىپ-باپتاعان اجەلەرىمىز «جاقسى قىزدىڭ بۇرىمىندا ءمىن بولماس» دەپ وتىراتىن. سوڭعى كەزدە وسىنىڭ ءبارى سانگە اينالۋدا.
بۇرىن دەيمىن-اۋ, تىلەرسەگىنە توگىلگەن بىلەكتەي بۇرىمىن بويجەتكەن ءبىر ءوزى جۋىپ-تاراپ كۇتەتىن بولسا, بۇگىنگىلەردىڭ باسىم بولىگى شاشتارازدىڭ كومەگىنە جۇگىنگەندى ءجون سانايدى. بۇل رەتتە ەلوردالىق شاش شەبەرى ۆەنەرا داۋلەتبەك ءسان سالونىنا باس سۇققانداردىڭ قاي-قايسىن دا ارلەپ, ساندەپ, ءسانى مەن سىمباتىن جاراستىرىپ جىبەرۋدەن ەش جالىقپايدى.
ۆەنەرا رۋسلانقىزىنىڭ جۇمىس كۇنى تاپسىرىس بەرۋشىنىڭ تالابىنا ساي, باسقا بارلىق قىزمەت كورسەتۋ سالالارىنداعى سەكىلدى, الەۋمەتتىك جەلىدەگى قوسىمشا ارقىلى الدىن الا جازىلۋ نەگىزىندە باستالادى ەكەن. كەلىسكەنىمىزدەي, سالونعا العاشقى كەلۋشىنىڭ ۋاقىتىمەن تۇسپا-تۇس كەلدىم.
ساعات ءتىلى ون بىرگە جاقىنداپ قالعان كەز. ەلوردانىڭ سول جاعالاۋىنداعى «حان شاتىر» ساۋدا ويىن-ساۋىق ورتالىعىنىڭ ماڭىندا ورنالاسقان «توكيو» ءسان سالونىنىڭ ءىشى مۇنتازداي تاپ-تازا. ۇزىن-سونار كەزەك جوق, بىراق قول قۋسىرىپ قاراپ وتىرعان جان دا كورىنبەيدى. مامانداردىڭ ءبىرى كەلۋشىنىڭ شاشىن ساندەپ, ەكىنشىسى سۇلۋ بويجەتكەننىڭ تىرناقتارىن ەگەلەپ, ءۇشىنشىسى كليەنتكە كىرپىك جاپسىرىپ جاتىر.
مەنىڭ كەيىپكەرىم جۇمىسقا قاجەتتى قۇرال-جابدىقتارىن ازىرلەپ, قايشى, تاراق, براشينگ, قىسقىش سەكىلدى ت.ب. زاتتاردى زالالسىزداندىرىپ, بۇگىنگى كۇننىڭ ءبىرىنشى كەلۋشىسىن قابىلداۋعا دايىندالۋ ۇستىندە ەكەن. كوپ كۇتتىرمەي العاشقى كليەنت تە كەلدى. جۇمساق ورىندىققا جايعاسقان ول الدىن الا جازىلۋدا كورسەتىلگەندەي شاشىنىڭ ءوسىپ كەتكەنىن, ادەتتەگىدەي ۇلگىمەن قيۋعا كەلگەنىن ايتتى. ۆەنەرا رۋسلانقىزى بولسا, الدىمەن كەلۋشىنىڭ موينىنا بىررەتتىك جاعا تاعىپ, ارنايى الجاپقىش كيگىزدى دە, قولىنا سۇلگىسىن الىپ, ونى شاش جۋعا ارنالعان ورىنعا شاقىردى. شاشقا ارنالعان كاسىبي سۋسابىنداردىڭ كومەگىمەن باسىن بىرنەشە قايتارا تازالاپ جۋىپ, قولىنداعى سۇلگىمەن ءسۇرتىپ بولعان سوڭ, باستاپقى كرەسلوعا قايتا وتىرۋىن ءوتىندى.
ءجۇرىسى جيناقى, قيمىلى شيراق, دەنە ءبىتىمى دە ەرەكشە سىمباتتى شاش شەبەرىنىڭ جۇمىسىندا ءبىر ءمىن جوق. شاش قيىپ تۇرىپ, قىزمەت الۋشىنىڭ ساۋالدارىنا جاۋاپ بەرىپ ۇلگەرۋدە. «الدىمەن شاشتى دۇرىس جۋ كەرەك, شاشتىڭ ءتۇبىن قاتايتىپ, ءوسىرۋ ءۇشىن باسقا ۇنەمى ماسساج جاساپ وتىرعان جاقسى. ۇشىن قيىپ, جوندەپ وتىرۋ قاجەت. سەبەبى شاشتىڭ ۇشىنا جامان ەنەرگيا قونادى دەپ تۇسپالدانادى. ءبىر ايعا ءبىر-ەكى سانتيمەتر كەسكىزىپ وتىرسا, جەتكىلىكتى» دەدى ۆەنەرا داۋلەتبەك.
مىنە, عاجاپ! انە-مىنە دەگەنشە, جاڭا عانا شاشى وسىڭكىرەپ, ءوزى ابىرجىڭكىرەپ كەلگەن كليەنت كوز الدىمىزدا جاسارىپ شىعا كەلدى.
– كەرەمەت! ءوزىم قالاعانداي بولدى, كوپ-كوپ راحمەت سىزگە, – دەدى ول ىشكى سەزىمىن جاسىرا الماي.
– كوڭىلىڭىزدەن شىققانىنا مەن دە قۋانىشتىمىن. كەلىپ تۇرىڭىز, – دەپ, قىزمەت الۋشىنى جىلى شىرايمەن شىعارىپ سالدى.
ارتىنشا جاس شاماسى جيىرمادان اسپاعان, ۇزىن شاشتى سۇلۋ قىز كىردى. ءۇرىپ اۋىزعا سالعانداي, ۇلبىرەپ تۇر. «ۇپ-ۇزىن شاشىن كەسۋگە اتا-اناسى قالاي رۇقسات بەردى ەكەن؟» دەپ ويلاپ ۇلگەرگەنىمشە, ول الدىن الا جازىلۋدا كورسەتىلگەندەي, شاشىنىڭ ۇشتارىن اشىق قىزىل تۇسكە بوياتقىزۋ ءۇشىن كەلگەنىن ەسكەرتتى. «ۋف!» دەدىم ىشتەي, شاشىنا قايشى تيگىزبەگەنىنە قۋانىپ.
ۆەنەرا شاش بوياۋعا كەرەكتى قۇرال-جابدىقتارى مەن ەرىتىندىلەرىن دايىنداي جۇرە, بوياۋدان كەيىن شاش ادەتتەگىدەن ەرەكشە كۇتىمدى قاجەت ەتەتىنىن ەسكەرتىپ, ەندىگى رەتتە شاشىن ىستىق شاش كەپتىرگىشپەن ءجيى قۇرعاتپاۋعا كەڭەس بەردى. ايتۋىنشا, ىلعال شاشتار سىنعىش بولادى, سوندىقتان ونى كونديتسيونەر جاققاننان كەيىن عانا تاراعان ءجون ەكەن.
«شاشقا تابيعي ماتەريالداردان جاسالعان تاراقتى قولدانعان دۇرىس. بۇل رەتتە ارنايى كوسمەتيكالاردى, ناقتىراق ايتسام, قالپىنا كەلتىرەتىن سۋسابىندار, كونديتسيونەرلەر, مۋسس جانە شايۋ قۇرالدارىن قولدانعان جاقسى. شاشىڭىزدى جۋعاننان كەيىن كونديتسيونەر قولدانۋدى ۇمىتپاڭىز. سەبەبى سۋسابىن اسەرىنەن شاش قۇرعاپ, ىلعالدان ايىرىلادى. ال كونديتسيونەر شاشتى ىلعالداندىرىپ, تەز ءوسۋىن قامتاماسىز ەتەدى. سونىمەن قاتار شاشتىڭ ۇشتانۋىنىڭ الدىن الادى» دەدى شەبەر.
العاشقىداي ەمەس, شاش بوياۋعا كوبىرەك ۋاقىت كەرەك كورىنەدى جانە بۇل جۇمىستىڭ وزىڭدىك ماشاقاتى دا جوق ەمەس ەكەن. وسى ءسات اتالمىش ماماندىقتىڭ ەپتىلىكپەن بىرگە ەرەكشە شىدامدىلىقتى دا قاجەت ەتەتىنىنە انىق كوز جەتكىزدىم. باستىسى, شەبەردىڭ جۇمىسى كەلۋشىنىڭ كوڭىلىنەن شىقتى. العىسىن ايتىپ, قۋانىپ, اقشاسىن تولەپ, شىعىپ كەتتى.
كەلەسى كەلۋشى شاشىن قازىرگى زامانعا ساي قوس ءورىم عىپ ءورۋ ارقىلى تويعا ارنالعان شاش ۇلگىسىن تاڭداپتى. تاجىريبەلى مامانعا بۇل ءىس تە اسا كوپ قيىندىق تۋدىرمادى. ۇيرەنشىكتى جۇمىسى بولعاندىقتان, قولى قولىنا جۇقپاي, اسقان جىلدامدىقپەن ءارى شەبەرلىكپەن عاجايىپ دۇنيە جاساپ شىقتى. قىزمەت الۋشى الدىنداعى ايناعا قايتا-قايتا قاراپ, ريزاشىلىعىن جەتكىزدى.
كىرەبەرىستەگى قابىرعادا ءىلۋلى تۇرعان ساعاتقا كوزىم ءتۇستى. تۇسكى ءۇزىلىس ۋاقىتىنان اسىپ كەتىپتى. ورازا ايى, اۋزىم بەرىك بولعاندىقتان, مەن اسا كوپ الاڭدامادىم. تەك, كەيىپكەرىمنىڭ ۋاقىتپەن ساناسپاي, كەلۋشىلەردى ءبىر ساتكە دە كۇتتىرمەي, ارقايسىنىڭ كوڭىلىنەن شىعۋعا تىرىسىپ جاتقانىنا قايران قالدىم. تىكەسىنەن تىك تۇرىپ ۇزاقتى كۇنگە دامىل تاپپاسا دا, شارشاعانى سەزىلمەيدى. جۇرەك قالاۋىمەن تاڭداپ العان كاسىبىنە شىنايى بەرىلگەندىك دەگەن وسى بولسا كەرەك.
«جۇمىستان قاشپايمىن, كەرىسىنشە كەڭەس سۇراي كەلگەندەردىڭ قاي-قايسىنا دا قول ۇشىن سوزۋعا ءازىرمىن. ءسان سالونىنا ءيميدجىن وزگەرتىپ قانا قويماي, ۇنەمى ۇقىپتى كورىنىپ, كۇتىنىپ جۇرۋگە تىرىساتىنداردىڭ كەلەتىنى بەلگىلى. مەن ولاردىڭ ويىنداعىسىن ءدوپ باسۋعا, قولىمنان كەلگەنشە ارقايسىسىنا جەكە-جەكە كومەكتەسۋگە تىرىسامىن. جالپى, ماماندىعىم وزىمە ەرەكشە ۇنايدى. سوندىقتان دا ۋاقىتقا باعىنبايمىن, كەشكە دەيىن دەمالماي جۇمىس ىستەۋگە تۋرا كەلەتىن كۇندەر دە ءجيى بولادى. وندايدا كەلۋشىلەردىڭ ريزاشىلىعىمەن قاناتتانامىن» دەدى ۆەنەرا داۋلەتبەك.
مەكتەپتە وقىپ جۇرگەندە مودەل بولىپ قوسىمشا جۇمىس اتقارعان ءجاسوسپىرىم قىزدى سول جەردە بەلگىلى ۆيزاجيست بايقاپ قالىپ, ءوز سالاسىندا ەڭبەك ەتۋگە شاقىرادى. وسىلايشا, العاشقى ەڭبەك جولىن سوناۋ بالا كەزىندە بەت ارلەۋشى بولىپ جۇمىس ىستەۋدەن باستاعان ۆەنەرا رۋسلانقىزى كەيىن كوللەدجدە شاشتاراز-كولوريست ماماندىعىنا وقىپ, ءىس جۇزىندە جۇمىس ىستەي باستاعاندا وسى كاسىپ جانىنا جاقىن ەكەنىن تۇسىنەدى. بۇگىندە ولاردىڭ ەكەۋىن قوسا اتقارىپ ءجۇر. بىراق, كوبىنە شاشپەن جۇمىس ىستەگەندى ۇناتادى. بولاشاقتا جەكە ءسان سالونىن اشۋ جوسپارىندا بار.
مەنىڭ جۇمىس كۇنىم اياقتالۋعا جاقىندادى. ال ءسان سالونىنا كەلۋشىلەر قاراسى ازايار ەمەس. «جۇما, سەنبى, جەكسەنبى كۇندەرى – وسىلاي, كىسى كوپ بولادى. ەسەسىنە, دۇيسەنبى دەمالامىن. ال مەرەكە كۇندەرى جۇمىستى تاڭسارىدەن باستاماسام, ۇلگەرمەي قالۋىم مۇمكىن. سوندىقتان, شاما كەلگەنشە, قىزمەت الۋشىلارمەن الدىن الا كەلىسىپ وتىرامىن. ءبىر-ءبىرىمىزدى تۇسىنۋگە تىرىسامىز. كوپشىلىكپەن جۇمىس ىستەگەن سوڭ, شىدامدى بولعان دۇرىس. جالپى, تابيعاتىم سونداي: كۇيىپ-پىسپەيمىن, قانداي جاعدايدا دا سابىرلىق ساقتاۋعا, ءالىپتىڭ ارتىن باعۋعا بالا كەزىمنەن داعدىلانعانمىن. ەندى, مىنە, وسى قاسيەتتەرىم ەرەسەك ومىردە ءوز جەمىسىن بەرىپ جاتىر» دەدى تاجىريبەلى مامان.
ۇزاقتى كۇنگە ءبىر قاباق شىتپاعانىنا قاراپ, قىزىققانىم راس. سەبەبى قازىرگى قىزمەت كورسەتۋ سالاسىنىڭ ماماندارىنا وسى قاسيەتتەردىڭ جەتىسپەي جاتاتىنى شىندىق. اسىرەسە, كەلۋشىلەردىڭ شىنايى ريزاشىلىقتارىن ءبىلدىرىپ, العىستارىن جاۋدىرعانى جانىمدى جادىراتتى. سولاردىڭ كوڭىلى مەن ىستىق ىقىلاسى, شەبەرگە دەگەن زور سەنىمى وعان شىنىمەن دە قۋات بەرەتىندەي كورىندى ماعان. كۇندەلىكتى كۇيبەڭ تىرلىكتە ءمان بەرمەيتىنىمىز بولماسا, شىندىعىندا شاشتارازداردىڭ ەڭبەگى وڭاي ەمەس ەكەن-اۋ.
گۇلبارشىن وكەشقىزى
