Nur Otan پارتياسى اتىنان قالالىق ءماسليحات دەپۋتاتتىعىنا ۇمىتكەرلەر ۇگىت-ناسيحات جۇمىستارى اياسىندا ەلورداداعى اقمولا ۆاگون جوندەۋ زاۋىتىنا باردى.
اتالعان زاۋىت – ەلىمىزدىڭ شينا قۇرىلىسى سالاسىنداعى بىردەن-ءبىر مامانداندىرىلعان كاسىپورىن. 1941 جىلى شەبەرحانا بولىپ اشىلىپ, كەيىننەن ۆاگون جوندەۋ زاۋىتىنا اينالعان. ەل ەكونوميكاسىن دامىتۋعا زور ۇلەس قوسىپ جاتقان وسى زاۋىت ۇجىمىمەن كەزدەسكەن ۇمىتكەرلەر وزدەرىنىڭ سايلاۋالدى باعدارلاماسىمەن تانىستىردى. ۇمىتكەرلەردىڭ ءبىرى باۋىرجان سمايلوۆ – «اقمولا قۇرىلىس ماتەريالدارى» كومپانياسىنىڭ توراعاسى جانە قالالىق قوعامدىق كەڭەس مۇشەسى. ەكىنشى ۇمىتكەر شاحيم ناسيبوۆ – «استانا نۇر ءداستۇرى» جشس باس ديرەكتورى. ەكەۋىنىڭ دە سايلاۋالدى باعدارلامادا ەرەكشە باسىمدىق بەرەتىن سالاسى – گازداندىرۋ جۇمىستارى ەكەن.
– كەشە ءبىر ۇيگە بارىپ, ولارعا قالاي گاز كەلگەنىن ءوز كوزىممەن كوردىم. ەلباسىنىڭ تاپسىرماسى ورىندالدى. حالىق ريزا بولىپ جاتىر. كومىرمەن وتىرعاندا جەل بولماسا قالانى كوك ءتۇتىن باسادى. سوندىقتان كەلەسى جىلى تولىقتاي گاز تارتىلعان كەزدە سونداي پروبلەمالار جويىلىپ, بۇل تۇرعىنداردىڭ دەنساۋلىعىنا دا وڭ اسەرىن بەرەرى ءسوزسىز, – دەدى ب.سمايلوۆ. ونىڭ ايتۋىنشا, گازداندىرۋ ارقىلى قالانىڭ الەۋمەتتىك جانە ەكولوگيالىق ماسەلەلەرى شەشىمىن تابادى.
ال ش.ناسيبوۆ نۇر-سۇلتان الەمدە ەڭ لاس 5 قالانىڭ ىشىندە بولعانىنا قىنجىلىس ءبىلدىرىپ, وسى سايلاۋ ناۋقانىنا ءتۇسۋ ارقىلى ەكولوگيالىق ماسەلەلەردى شەشكىسى كەلەتىنىن جەتكىزدى.
«شىن مانىندە اۋرۋدىڭ كوبىنە ناشار ەكولوگيا سەبەپ. تاعى ءبىر ايتا كەتەرلىك ماسەلە – ءبىزدىڭ استانامىز اسا ءبىر جاسىل جەلەگى جايقالعان قالا ەمەس. سوندىقتان كوبىرەك اعاش وتىرعىزىپ, كوگالداندىرۋ جۇمىستارىن جانداندىرۋ كەرەك. وسى ورايدا ەلباسىنىڭ جاسىل بەلدەۋدى جانداندىرۋعا تاپسىرما بەرۋى – وسى ماسەلەنى شەشۋگە سەپتىگىن تيگىزەرى ءسوزسىز» دەدى ش.ناسيبوۆ.
زاۋىت قىزمەتكەرلەرى نۇروتاندىقتاردان قالانىڭ شەتىندەگى زاۋىت ورنالاسقان جەردىڭ وزەكتى ماسەلەلەرىن شەشىپ بەرۋدى سۇرادى. اسىرەسە, جولداردى جوندەۋ, اۆتوبۋستاردىڭ قاتىناۋىن جيىلەتۋ, جىلى ايالدامالار سالۋ تۋرالى دا سۇراقتارىن قويدى.
نۇر-سۇلتان قالاسىنداعى Nur Otan پارتياسى سايلاۋ قورىنىڭ قاراجاتىنان تولەندى.