ءساندى دە ءتاتتى
وتكەن دەمالىس كۇندەرى «اراي» ساياباعىندا كوپتەن كۇتكەن «Astana food and fashion festival» اتتى تاعام مەن ءسان فەستيۆالى ءوتتى.
فەستيۆال ەلوردادا وسىمەن ەكىنشى رەت ۇيىمداستىرىلىپ وتىر. العاشقى جىلى تەك تاعام فەستيۆالى بولسا, ەكىنشى رەت وعان ادەمىلىك الەمى قوسىلدى. مۇنداعى ماقسات – وتاندىق كاسىپورىندى قولداپ, ەل ەكونوميكاسىنا سەرپىن بەرۋ, سونىمەن قاتار دەمالىس كۇندەرى قالالىقتاردىڭ جاقسى تىنىعۋىنا جاعداي جاساۋ.
شارا كەزىندە جۇرتشىلىق ءارتۇرلى كاسىپورىندار ۇسىنعان ءتاتتى تاعامداردان اۋىز ءتيىپ, ءسان الەمىنىڭ سوڭعى ۇلگىلەرىمەن تانىستى.
تالعام تارازىعا سالىنعان فەستيۆال بىرنەشە ايماقتارعا ءبولىندى. ايتالىق, «استانالىق» دەپ اتالاتىن ايماقتا اس ۇيگە ارنالعان زاتتاردىڭ ءبارىن كورۋگە بولادى. «كوك بازاردا» 20 وتاندىق ءوندىرۋشى تابيعي ونىمدەرىن ۇسىندى. «جەرۇيىق» سەكتورىندا ستريت-فۋد سالاسىنداعى قىزىقتى ستارتاپ-جوبالار قويىلدى. وسى جوبا ارقىلى ادامدارعا فاستفۋد پەن ستريتفۋدتىڭ ايىرماشىلىعى ءتۇسىندىرىلىپ, كەلۋشىلەرگە تەز دايىندالاتىن ءتاتتى تاعام ۇسىنىلدى.
ال «Pop Up Shop Astana» ايماعىندا قوناقتار ديزاينەرلىك كيىم-كەشەكتەر, اشەكەيلەر, ينتەرەر زاتتارى جارمەڭكەسىن جانە كوركەمدىك گالەرەيانى ارالادى.
«كينوتەاتر» سەكتورىندا قازىرگى زامانعى فيلمدەر كورسەتىلسە, «چيللاۋت» ايماعىندا كوپشىلىك جايلى ورتادا كوفە ءىشىپ, تىنىعۋعا مۇمكىندىك الدى.
«ادامنىڭ دەنساۋلىعى دۇرىس تاماقتانۋعا تىكەلەي بايلانىستى.
سوندىقتان ءبىز فەستيۆال كەزىندە قالاي دۇرىس تاماقتانۋ كەرەك, قانداي تاماق پايدالى, ازىق-تۇلىك ساتىپ العان كەزدە نەگە ءمان بەرۋ قاجەت سەكىلدى كوپتەگەن ماسەلەلەرگە جۇرتشىلىقتىڭ كوڭىلىن اۋدارۋعا تىرىستىق» دەيدى «Astana food and fashion festival» اتتى شارانىڭ ۇيىمداستىرۋشىسى ءاليا ساپاروۆا.
بۇل عانا ەمەس, «اراي» ساياباعىنىڭ وزىندە دە استانالىقتاردىڭ دەمالىسىن دۇرىس ۇيىمداستىرۋعا ارنالعان قىزىقتار جەتەرلىك. ەندەشە, دەمالىستا تازا اۋادا دەمالعىڭىز كەلسە, ساياباقتا سەرۋەندەۋگە ابدەن بولادى.
جوعارىدا اتالعان فەستيۆال باعدارلاماسى اياسىنداعى شارالار كورمە وتكەننەن كەيىن دە جۇمىس ىستەيتىنىن ەستەرىڭىزگە سالامىز. سونىڭ اياسىندا سەرىكتەستەردىڭ قىزمەت كورسەتۋ ساپاسىنا مونيتورينگ جاساۋ, جاڭا ارىپتەستەردى شاراعا تارتۋ سىندى جۇمىستار جۇرگىزىلمەك.