ەلىمىزدىڭ «تسيفرلى قازاقستان» مەملەكەتتىك باعدارلاماسىنىڭ ماقساتى ادام ءومىرىنىڭ بارلىق سالالارىن قامتي وتىرىپ, ءاربىر ازاماتتىڭ ءومىر دەڭگەيىن جوعارىلاتۋدىڭ ءبىر جولى رەتىندە وڭ وزگەرىستەرگە جول اشپاق. ايگۇل قاسىموۆا باسقاراتىن №8 قالالىق ەمحانا – دەنساۋلىق ساقتاۋ سالاسىن تسيفرلاندىرۋدى العاشقىلاردىڭ ءبىرى بولىپ قولعا العان مەملەكەتتىك مەكەمەنىڭ ءبىرى.
بۇگىنگى كۇندە ەمحانادا تىركەلگەن 70760 ادامنىڭ مەديتسينالىق كارتالارى ساندىق ساپاعا اۋىستىرىلىپ, ەلەكتروندى «دەنساۋلىق پاسپورتىنا» تولىق كوشىرىلگەن. ەمحانانىڭ بارلىق كابينەتتەرىندە كومپيۋتەر ورناتىلىپ, ۋچاسكەلىك دارىگەرلەر مەن مەدبيكەلەر كەشەندى باعدارلاماعا ساي جۇمىسىن ءتيىمدى ۇيىمداستىرىپ وتىر.
– وسىدان ون شاقتى جىل بۇرىن ەمحانا جۇمىسىن تسيفرلاندىرۋعا كىرىسكەن بولاتىنبىز. دەگەنمەن العاشقى تالپىنىسىمىز دىتتەگەن ماقساتىمىزعا بىردەن جەتكىزە قويمادى. ونىڭ ءبىر ۇشى قارجىعا تىرەلسە, ەكىنشى جاعىنان باعدارلامالاردىڭ ولقىلىعى كوپ بولدى. ستاتيستيكاعا, مالىمەتتەردى قورىتۋعا ارنالعان باعدارلاما ەمحاناىشىلىك جۇمىستارعا, دارىگەرلەر مەن ەمدەلۋشىلەردىڭ اراسىن بايلانىستىرىپ, ولاردىڭ ءوزارا ارەكەتىن ۇيلەستىرە المادى. قازىرگى قولدانىلاتىن كەشەندى باعدارلاما, بىرىنشىدەن, دارىگەرگە قولايلى. ول ءوزىنىڭ ۋچاسكەسىنە تىركەلگەن ادامداردىڭ حال-جاعدايىنا, ولاردىڭ ەمحانادان تىسقارىدا بولىپ جاتقان دەنساۋلىعىنا قاتىستى وزگەرىستەرگە مونيتورينگ جاساي الادى. وزىنە قاراستى تىركەۋدە تۇرعان ادامنىڭ دەنساۋلىعى كۇرت تومەندەپ, جەدەل جاردەم شاقىردى ما, نە بولماسا اۋرۋحانادا ەمدەلدى مە, باسقا دا وقىس وقيعاعا تاپ كەلدى مە؟ مۇنىڭ ءبارىن دارىگەر ءوز ءمودۋلى ارقىلى ەمدەلۋشىلەردىڭ بارلىق قيمىل-قوزعالىسىن, ەمدەلۋ قورىتىندىلارىن باقىلاپ وتىرادى. دارىگەر ۋچاسكەسىندەگىلەردىڭ تولىق ءتىزىمىن كورە الادى, ونى توپ-توبىمەن جاسىنا قاراي, تاعى باسقا سيپاتتارىمەن ىرىكتەي الادى. وسى ءتىزىم ارقىلى سكرينينگتەن وتۋگە ءتيىستى تۇرعىنداردى انىقتاپ, باسقا دا كەزەكتەگى ەم-شارالاردىڭ كەستەسىن تۇزەپ, حابارلاسا الادى, – دەپ ەمحانانىڭ باس دارىگەرى جۇمىس بارىسىمەن تانىستىردى.
ال ناۋقاستار تۇرعىسىندا بۇل جاڭالىق نەسىمەن قولايلى دەگەن سۇراقتىڭ دا ءمانىن تۇسىندىك. ادەتتەگىدەي, دەنساۋلىعىمىز سىر بەرىپ, ناشار سەزىنسەك, ءوزىمىزدىڭ مەكەنجايداعى تىركەلگەن ەمحانامىزعا كەلىپ, جالپى تاجىريبەدەگى دارىگەرگە كورىنەمىز. ول ءوز كەزەگىندە اۋرۋىمىزعا سايكەس سالالىق ماماندارعا جولداما بەرىپ, باعىتتايدى. سول جولدامامەن تىركەۋ ورنىنا قايتا بارىپ, قارالاتىن دارىگەرگە تاعى كەزەككە جازىلامىز. ءدال وسى تۇستا ساندىق ساپاعا كوشۋدىڭ وڭتايلىلىعىن بايقاۋعا بولادى. تسيفرلاندىرۋدىڭ ارقاسىندا ەمحانانىڭ كابينەتتەرىن ارالايتىن, كەزەككە تۇراتىن ۋاقىتىمىز قىسقارادى. تۇرعىندار ءوز ءدارىگەرىنىڭ كابينەتىندە وتىرىپ, ءتيىستى مامانعا تەكسەرىلەتىن كۇنى مەن ساعاتىن انىقتاپ الادى. مامان دارىگەرلەرگە تەكسەرىلىپ بولعان سوڭ, ولاردىڭ نۇسقاۋىن الىپ, تاعى دا تەراپەۆكە كەلمەيدى. ويتكەنى بارلىق جازبالار ۋچاسكەلىك دارىگەرلەردىڭ مودۋلىندە كورىنىپ تۇرادى. دياگنوزى انىقتالىپ, ءارى قاراي ەمدەۋ پروتسەسىن جالعاستىرا بەرەدى. ديسپانسەرلىك ەسەپتە تۇرعاندار دا كەزەكتى تەكسەرۋدەن ءوتىپ, قان تاپسىرىپ, تالداۋ جاساتۋ قاجەت بولسا, ونىڭ دا ناتيجەسىن الۋ ءۇشىن تابانىمىزدان توزبايمىز. زەرتحانانىڭ تالدامالارىمەن ءبىرىنشى بولىپ دارىگەرىڭىز تانىسىپ, ءتيىستى نۇسقاۋىن بىردەن الا الادى.
ارينە, اركىم دەنساۋلىعىن ءوزى قاداعالاعانى ءجون. دەگەنمەن بالالارعا ەكپە سالۋ, سكرينينگتەن ءوتۋ, جىلىنا ءبىر رەت فليۋوروگرافيادان ءوتۋ, تاعى باسقا ەم-شارالاردى ەرتەرەك ەسكە سالىپ, ۋاقىتىن كورسەتىپ وتىرۋعا دا وسى باعدارلامالار ارقىلى قول جەتكىزۋگە بولادى ەكەن. ءموبيلدى قوسىمشالار ارقىلى دا ەمدەلۋشى مەن دارىگەردىڭ بايلانىسۋىنا بولادى. ساندىق ساپاعا كوشۋدەن كوش باستاپ تۇرعان ەلوردالىق №8 قالالىق ەمحانانىڭ جۇمىسى جاقسى باعالانىپ, ۇجىمعا «التىن شيپاگەر» جۇلدەسى تابىس ەتىلدى. بۇل كوشباستاۋشى ەمحانانىڭ كوپ جىلداردان بەرگى جاڭا قىزمەت كورسەتۋ ۇلگىسىن ەنگىزىپ, وڭ ناتيجەگە قول جەتكىزگەنى ءۇشىن بەرىلىپ وتىر.
