استانا – قارقىندى تۇردە دامىپ كەلە جاتقان قالالاردىڭ ءبىرى. ەلىمىزدىڭ باس قالاسى ارقا تورىنە اۋىسقاننان بەرى قۇرىلىسى قىزۋ ءارى توقتاۋسىز جۇرگىزىلىپ كەلەدى. سونىڭ ناتيجەسىندە ءتۇرلى نىساندار بوي كوتەرىپ جاتىر. ارنايى ات باسىن بۇرعان شەتەلدىك قوناقتار دا تاڭدانىسىن جاسىرماي, جوعارى باعا بەرەدى.
قالانىڭ سول جاق جاعالاۋىندا ىرگەسى قالانعان ءاربىر عيمارات كوپ ۇزاماي ءسان-سالتاناتىمەن اشىلاتىنى راس. دەگەنمەن ساۋلەتتى شاھاردا جۇرت كوزىنەن تاسادا قالىپ قويعان قۇرىلىس الاڭدارىنىڭ ءالى دە بار ەكەنى جاسىرىن ەمەس. ءبىز وسى تۇستا قۇرىلىسى باستالىپ, الايدا سوڭعى جىلدارى توقتاپ تۇرعان بىرنەشە ورىندى ايتا كەتۋدى ءجون كوردىك.
استانادا №54 مەكتەپ-ليتسەيىنىڭ اشىلعانىنا 10 جىلدان اسا ۋاقىت بولدى. ءدال وسى مەكتەپتىڭ ماڭىندا قۇرىلىسى باستاۋ الىپ, الايدا توقتاپ تۇرعان ءبىر عيمارات بار. دالىرەك ايتقاندا, يمانباەۆا مەن عۇمار قاراش كوشەلەرى قيىلىسىنىڭ ماڭايىندا ورنالاسقان. باستاپقىدا وقۋشىلار ءۇشىن قاجەتتى تاۋارلار ساتىلاتىن ساۋدا ورىندارىنىڭ بىرىنە نەمەسە بيزنەس ورتالىققا اينالار دەگەن بولجام جاسادىق. قانشا دەگەنمەن, ەل يگىلىگىنە پايداسى تيەر مەكەمە بولعان سوڭ كوپشىلىك اشىلۋىن اسىعا كۇتكەنى راس. ءتىپتى قۇرىلىس جۇمىستارىنا بايلانىستى جولدىڭ ءبىر بولىگى جابىلىپ, ماڭايىنداعى جۇرتقا كەدەرگى كەلتىرگەن كەزى دە بولدى. مەكتەپ جانىندا ورنالاسقان سوڭ وقۋشىلار ءۇشىن قانشالىقتى قاۋىپتى بولعانىن باعامداپ كورىڭىز. كەز كەلگەن دامىعان ەلدە تۇرعىندار قاۋىپسىزدىگى مەن قۇقىعىنىڭ شەكتەلمەۋى – باستى نازاردا. وسىنداي كەلەڭسىزدىكتەردەن كەيىن بىزدەگى جاعداي قانداي؟!
العاشقىدا بىلىنبەگەن, بىراق ۋاقىت وتە كەلە بۇل ورىننىڭ زاڭسىز سالىنعانى انىقتالا ءتۇستى. عۇمار قاراش كوشەسى بويىنداعى نىساننىڭ «قىزىل سىزىقتان» اسىپ ءتۇسىپ, جاياۋجۇرگىنشىلەر جولىنىڭ ءبىر بولىگىن باسىپ قالعانى بەلگىلى بولدى. قۇرىلىسى باستاپقىدا قارقىندى تۇردە ءجۇرىپ, ءبىر-ەكى جىلدا اشىلاتىنداي كورىنگەن. بىراق قانداي سەبەپ بولعانى بەلگىسىز, سول ورىننىڭ قاڭىراپ, بوس تۇرعانىنا بىرنەشە جىلدىڭ ءجۇزى بولدى. نە سۇرىلمەيدى, نە قالا باسشىلىعى تاراپىنان قولعا الىنىپ, قۇرىلىس جالعاسپادى. سوڭعى رەت جانىنان وتكەنىمىزدە «تەز ارادا ساتىلادى» دەگەن جارناما ءىلىنىپ تۇرعانىنا كۋا بولدىق. بىراق «قىزىل سىزىقتىڭ» بويىنان اسىپ, زاڭسىز سالىنعانى ءۇشىن شىعىندالاتىن كاسىپكەر جاقىن ارادا تابىلا قويار ما ەكەن؟!
استانادا وسىعان ۇقساس ورىننىڭ بىرنەشەۋىن كەزدەستىرۋگە بولادى. سولاردىڭ ءبىرى اباي داڭعىلى مەن سەمبينوۆ كوشەسىنىڭ قيىلىسىندا ورنالاسقان. سىرتقى تۇرپاتىنا قاراپ, ساۋدا ورىندارىنىڭ ءبىرى بولار دەگەن وي قورىتتىق. كەلبەتىنە كوز سالساق, بىلىكتى ارحيتەكتورلاردىڭ اتسالىسۋىمەن باستالعانى انىق. بىراق مۇنىڭ دا كۇيى كەتىپ, جوعارىدا ايتىلعان زاڭسىز نىساننىڭ كەيپىن قۇشىپ تۇر. ءاۋ باستا باستالىپ, اياقسىز قالعان عيماراتتىڭ توقتاپ تۇرعانىنا قازىر 10 جىلداي بولىپ قالدى. اينالاسى قورشالىپ, ماڭىنان وتكەن ادامعا زيانىن تيگىزىپ وتىرعان جايى تاعى بار.
ەشبىر پايداسى جوق, ودان قالا بەردى ەلوردانىڭ كوركىن كەتىرىپ تۇرعان مۇنداي نىساندار بيلىك تاراپىنان قولعا الىنىپ, قۇرىلىسىن جالعاستىرعانى دۇرىس. بولماعان جاعدايدا 10 جىلدان اسا ۋاقىت ماڭايىنا زيانىن تيگىزىپ تۇرعانى ءۇشىن ءسۇرىلىپ تاستالۋىنا قانداي كەدەرگى؟
قورىتا ايتار بولساق, استانادا ىرگەتاسى قالانىپ, اياقسىز قالعان قۇرىلىس الاڭدارى ءالى دە بارشىلىق. مۇنداي قاڭقاسى عانا سالىنعان ورىندار قاشان اياقتالماق؟ جاڭا ءبىر عيماراتتى سالماس بۇرىن وسىنداي نىساندارعا ءمان بەرىلگەنى ءجون بولار ەدى.
