وسىدان ءبىراز ۋاقىت بۇرىن الەمدىك دەڭگەيدەگى فيلمدەردىڭ قازاقشاعا اۋدارىلۋى مۇمكىن ەمەستەي كورىنەتىن. بۇگىندە ولاردىڭ قاتارى كوبەيىپ, اۋىز تولتىرىپ ايتاتىن دارەجەگە جەتتىك. ياعني, كۇن وتكەن سايىن دۋبلياج سالاسى دامىپ, اۋدارما ساپاسى دا ارتۋدا. سولاردىڭ ءبىرى – ايگىلى «Marvel» كينوستۋدياسى تۇسىرگەن «گالاكتيكا ساقشىلارى» ءفيلمى كورەرمەندەرگە جول تارتتى. بۇل – «بولاشاق» قاۋىمداستىعىنىڭ باستاماسىمەن انا تىلىمىزگە اۋدارىلعان توعىزىنشى تۋىندى. بۇعان دەيىن ولار «كولىكتەر-2», «قارا كيىمدىلەر-3», «باتىل جۇرەك», «جاڭا ورمەكشى ادام», «مونسترلار ۋنيۆەرسيتەتى», «جالعىز رەيندجەر», «مالەفيسەنتا» كينوتۋىندىلارىن قازاقشا سويلەتكەن بولاتىن.
«Cinema Tone Production» ستۋدياسىندا اۋدارىلعان كينوونىمنىڭ دۋبلياج رەجيسسەرى – تيمۋر بالىمبەتوۆ. باس كەيىپكەرلەردى دىبىستايتىن مامانداردى گولليۆۋد ارتىستەرى وزدەرى تاڭدايدى ەكەن. ول ءۇشىن اۋدارماعا 20-عا جۋىق قازاق اكتەرلەرى جۇمىلدىرىلعان. وسىعان دەيىن كينوكارتينا اعىلشىن, فرانتسۋز, يسپان, پورتۋگال, نەمىس, ورىس تىلدەرىنە تارجىمالانعان بولاتىن.
«دۋبلياج جاساۋ وتە كۇردەلى ءارى جاۋاپكەرشىلىكتى تالاپ ەتەتىن جۇمىس ەكەن. ماسەلەن, فيلم جاستارعا ارنالعاندىقتان, ونداعى كەيىپكەرلەردىڭ بارلىعى «سلەنگ» تىلىندە سويلەيدى. ولاردى قازاقشالاۋ, ولاردىڭ ورنىنا جاناما سوزدەر ىزدەۋ ءبىراز ۋاقىتىمىزدى الدى. بۇل سوزدەردىڭ بالاماسى العاشقىدا قىزىق ەستىلۋى مۇمكىن. دەسە دە, ۋاقىت وتە كەلە قۇلاعىمىز ۇيرەنەدى دەپ ويلايمىن. كەيبىر ەپيزودتاردا قازاق تىلىندەگى دۋبلياج تۇپنۇسقاداعى ماتىننەن دە جاقسى شىقتى. ءبىزدىڭ جوبا جاستار نازارىنا ىلىكتى جانە قازاق ءتىلىن دارىپتەۋگە سەپتىگىن تيگىزەدى» دەيدى دۋبلياج رەجيسسەرى تيمۋر بالىمبەتوۆ.
فيلمدە بارلىعى بەس كەيىپكەر بار. ولاردىڭ بارلىعى – قاراقشىلار. باستاپقىدا جاعىمسىز بولعانىمەن, فيلم سوڭىندا دۇرىس شەشىم قابىلداپ, كورەرمەندەرىن قىزىقتىرا تۇسەدى. بلوكباستەردىڭ باستى قاھارمانى جۇلدىزدى لوردتى تيمۋر پيازوۆ, گامورانى «مالەفيسەنتا» ءفيلمى بويىنشا تانىمال بولعان گۇلناز اۋەسباەۆا دىبىستايدى. رۋسلان سەڭكەباەۆ, بەيبىت قامارانوۆ, باۋىرجان قاپتاعاي, ەرجان جارىلقاسىنوۆ سىندى اكتەرلەر دە دۋبلياجداۋعا ات سالىستى.
فيلمدەردى اۋدارۋ بارىسىندا كادىمگىدەي دۋبلياج مەكتەبىنىڭ قالىپتاسا باستاعانى بايقالادى. ويتكەنى, اكتەرلەر وزدەرىنە جۇكتەلگەن تاپسىرمانىڭ جاۋاپكەرشىلىگىن تولىق سەزىنىپ, تاماشا ناتيجە كورسەتە بىلگەن.
«وسىعان دەيىن «جالعىز رەيندجەر», «مالەفيسەنتا» ءفيلمىنىڭ اۋدارمالارىنا قاتىسقان بولاتىنمىن. ەلىمىزدە دۋبلياج سالاسىنىڭ دامىپ كەلە جاتقانىنا قۋانامىن. سونىڭ ارقاسىندا قازاق ءتىلىنىڭ ناسيحاتى دا ارتىپ جاتقانى انىق. ءتىل جاناشىرلارى از ۋاقىتتىڭ ىشىندە كورەرمەنگە ءبىراز فيلم ۇسىنىپ ۇلگەردى. بارلىعى دا كوپشىلىك تاراپىنان جاقسى باعاسىن الىپ جاتىر. بۇل – ۇلكەن جەتىستىك» دەيدى اكتريسا گۇلناز اۋەسباەۆا.
ەركەجان ساتىمبەك
