مىندەتتى الەۋمەتتىك مەديتسينالىق ساقتاندىرۋ دەگەنىمىز نە؟ ءمامس جۇيەسىنە قالاي قاتىسۋعا بولادى؟ جاڭا جۇيەنىڭ باستى قاعيداتتارى قانداي؟ استانا قالاسىنىڭ اكىمى اسەت يسەكەشەۆتىڭ توراعالىعىمەن مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋ جونىندە اقپاراتتىق-تۇسىندىرمە جۇمىستارى بويىنشا كەڭەيتىلگەن جينالىس ءوتتى.
حالىققا ارنالعان مىندەتتى مەديتسينالىق ساقتاندىرۋ تۋرالى ءاربىر ادام بىلۋگە ءتيىس ساۋالداردى ورتاعا سالعان جيىنعا قر دەنساۋلىق ساقتاۋ ءمينيسترى ەلجان ءبىرتانوۆ, اۋدان اكىمدەرى, قالالىق ۆەدومستۆو باسشىلارى, مەديتسينالىق مەكەمەلەر مەن بيزنەس قاۋىمداستىعىنىڭ وكىلدەرى قاتىستى.
– قازاقستاندا 1 شىلدەدەن باستاپ رەسمي تۇردە مىندەتتى الەۋمەتتىك مەديتسينالىق ساقتاندىرۋ جۇيەسى ەنگىزىلدى. العاش بولىپ الەۋمەتتىك مەديتسينالىق ساقتاندىرۋ قورىنا جۇمىس بەرۋشىلەر مەن جەكە كاسىپكەرلەر تولەم جۇرگىزە باستادى. تۇرعىندار مەديتسينالىق كومەكتى 2018 جىلدىڭ قاڭتارىنىن باستاپ مىندەتتى مەديتسينالىق ساقتاندىرۋ جۇيەسى ارقىلى الا باستايدى. بۇل رەفورمانىڭ ماڭىزدىلىعى سونداي, ءار قازاقستان ازاماتىن قامتيدى. سول سەبەپتى ءبىز وسى جينالىسقا ەلوردانىڭ بيزنەس وكىلدەرىن شاقىردىق, – دەدى اكىم شاراعا قاتىسۋشىلارعا.
ءوز كەزەگىندە قازاقستان رەسپۋبليكاسىنىڭ دەنساۋلىق ساقتاۋ ءمينيسترى ەلجان ءبىرتانوۆ مەديتسينالىق قىزمەتتىڭ قولجەتىمدىلىگى مەن ساپاسىن ارتتىراتىن ەلدەگى جۇرگىزىلىپ جاتقان بۇل رەفورمانىڭ ماڭىزدىلىعىنا توقتالدى.
– ەگەر بۇگىن قازاقستاندىقتاردىڭ دەنساۋلىعى كورسەتكىشتەرىن زەرتتەيتىن بولساق, وندا ءبىز جاقسى ديناميكانى بايقايمىز. مىسالى, ءومىر ءسۇرۋ جاسى ۇلعايعان, انا مەن بالا ءولىمى ازايعان. بۇعان قوسا, تۇرعىنداردىڭ ەگدە تارتۋىنا بايلانىستى كورسەتىلەتىن مەديتسينالىق قىزمەت تۇرلەرى دە ارتىپ كەلەدى, – دەپ اتاپ ءوتتى مينيستر.
وسى كۇنگە دەيىنگى قولدانىستاعى بيۋدجەتتىك مودەلمەن سالىستىرعاندا, جاڭا جۇيەنىڭ كوپ ارتىقشىلىعى بار. ياعني, تۇرعىنداردىڭ دەنساۋلىعىن قاداعالاۋ سالاسىندا مەملەكەت جۇمىس بەرۋشى ازامات اراسىنداعى تەڭ جاۋاپكەرشىلىك ساقتالادى. قولجەتىمدىلىك تەڭدىگى دە تارتىمدى. ءمامس پاكەتى شەڭبەرىندە تابىسى مەن جارناعا قاراماستان ءاربىر ناۋقاسقا ءتيىستى مەديتسينالىق كومەك تولىق كورسەتىلەدى. بۇل جۇيە مەديتسينالىق قىزمەتتەر ساپاسىنىڭ كوتەرىلۋىنە, مەديتسينالىق مەكەمەلەر اراسىنداعى باسەكەلەستىكتى ارتتىرىپ, تۇرعىنداردىڭ سۇرانىستارىنا جاۋاپ بەرەتىن ءتيىمدى دەنساۋلىق جۇيەسىن قۇرۋعا جول اشادى.
جۇيەنى كەزەڭىمەن ەنگىزۋ تۇرعىندارعا جاڭا رەفورماعا جەڭىل كوشۋگە مۇمكىندىك بەرەدى. بيىلعى جىلدىڭ شىلدەسىنەن باستاپ جۇمىس بەرۋشىلەر ءار قىزمەتكەردىڭ جالاقىسىنان 1 پايىز اۋدارىپ وتىرادى, 2018 جىلى اۋدارىمدار 1,5 پايىزعا وسەدى, 2020 جىلدان 2 پايىز اۋدارىلسا, 2022 جىلدان 3 پايىز بولىنەتىن بولادى.
ءوزىن جۇمىسپەن قامتىعاندار, ونىڭ ىشىندە جەكە كاسىپكەرلەر, مامانداندىرىلعان مەدياتورلار, ازاماتتىق-قۇقىقتىق كەلىسىمشارتى نەگىزىندە قارجى الاتىن جەكە تۇلعا 1 شىلدەدەن ەكى تومەنگى ەڭبەكاقىدان 5 پايىز بولەدى.
«الەۋمەتتىك مەديتسينالىق ساقتاندىرۋ قورى» كوممەرتسيالىق ەمەس اكتسيونەرلىك قوعامى باسقارماسىنىڭ ءتورايىمى ەلەنا باحمۋتوۆا تالقىلاۋ كەزىندە جينالعاندارعا جۇيەنىڭ بارلىق كەزەڭى تۋرالى جان-جاقتى ءتۇسىندىردى. قور جەتەكشىسى ءمامس اياسىندا مەديتسينالىق كومەكتىڭ قولجەتىمدىلىگى, مىندەتتى ەرىكتى ساقتاندىرۋ مەن جەڭىلدىك قاراستىرىلعان تۇرعىندار ساناتى تۋرالى باياندادى.
– ەگەر ادام جەڭىلدىك ساناتىندا بولسا, وندا وعان تولەم جاساۋدىڭ قاجەتى جوق, جەكە كاسىپكەر دە اقك بويىنشا دا تولەم جۇرگىزبەيدى. مەملەكەت بۇل مىندەتتى وزىنە الادى, – دەپ مالىمدەدى قور جەتەكشىسى.
ارنايى جەڭىلدىكتەر قاراستىرىلعاندار قاتارىندا بالالار, «التىن القا», «كۇمىس القا» يەگەرلەرى, ۇلى وتان سوعىسى ارداگەرلەرى, زەينەتكەرلەر مەن مۇگەدەكتەر, ستۋدەنت جاستار, جۇمىسسىزدار, 3 جاسقا دەيىنگى بالا كۇتىمىمەن وتىرعان انالار, جۇكتى ايەلدەر مەن جازاسىن وتەۋشى ادامدار بار.
سونداي-اق, ازاماتتاردىڭ بارلىق ساناتتارىنا الەۋمەتتىك ماڭىزدى اۋرۋلاردان باسقا, ۆاكتسيناتسيا, شۇعىل كومەك, سونىڭ ىشىندە جەدەل جاردەم جانە سانيتارلىق اۆياتسياعا كىرەتىن تەگىن مەديتسينالىق كەپىلدىك بەرىلگەن كومەك كولەمىنىڭ پاكەتى ادەتتەگىدەي قولجەتىمدى بولادى.
ايگۇل
ۋايسوۆا
