گەرمانيا – الەۋمەتتىك ساقتاندىرۋدىڭ وتانى. وسى ەلدە 1848 جىلى پوليتسيا قىزمەتكەرلەرىنە ارنالعان العاشقى ساقتاندىرۋ كاسساسى اشىلدى. ۋاقىت وتە كەلە, ءادىستىڭ تيىمدىلىگىنە كوزى جەتكەن كانتسلەر وتتو فون بيسماركتىڭ باستاماسىمەن 1883 جىلى مەديتسينالىق ساقتاندىرۋ تۋرالى زاڭ قابىلدانادى.
2007 جىلدان باستاپ وسى ەلدىڭ ءاربىر ازاماتى قالاۋىنشا مەملەكەتتىك نەمەسە جەكە ساقتاندىرۋ كاسساسىنا مىندەتتى تۇردە اقشا اۋدارىپ, مەديتسينالىق ساقتاندىرىلۋى ءتيىس بولىپ قالىپتاستى.
ستاتيستيكا بويىنشا گەرمانيانىڭ تۇرعىندارىنىڭ 90 پايىزى – مەملەكەتتىك ساقتاندىرۋ قورىنىڭ كليەنتتەرى. قازىر ولاردىڭ سانى جۇزدەن استى. ەڭ ىرىلەرى: AOK, Techniker Krankenkasse, Barmer GEK ي DAK-Gesundheit.
نەمىستەردىڭ بۇل جۇيەسىندە مەملەكەت دەنساۋلىق ساقتاۋ سالاسىن وزدىگىمەن قارجىلاندىرمايدى, بىراق جۇمىس بەرۋشىلەر مەن جۇمىسشىلاردى ساقتاندىرۋ قورىنىڭ ءتيىمدى جۇزەگە اسىرىلۋىن قامتاماسىز ەتەدى. مەملەكەت ورتالىقتاندىرىلماعان مەديتسينالىق ساقتاندىرۋ جۇيەسىنىڭ جۇمىسىنا باقىلاۋشى قىزمەتىن اتقارادى. ەلدە كاسىبي ايماقتىق ەرەكشەلىكتەرىنە ساي قۇرىلعان ءتۇرلى ساقتاندىرۋ كاسسالارى جۇمىس ىستەيدى. وسىلايشا مەديتسينالىق ساقتاندىرۋ گەرمانيانىڭ دەنساۋلىق ساقتاۋ سالاسىنىڭ نەگىزىن قۇرايدى.
ول بويىنشا بارلىق قىزمەتكەرلەرى مەن ولاردىڭ وتباسى مۇشەلەرىنىڭ مەديتسينالىق ساقتاندىرۋى بولۋى ءتيىس. 2013 جىلعى مالىمەتتەرگە سايكەس جىلىنا 52 200 € ارتىق تابىس تاباتىندار جەكە نەمەسە مەملەكەتتىك ساقتاندىرۋدى تاڭداۋدى وزدەرى شەشەدى. مەملەكەتتىك ساقتاندىرۋ كاسساسىندا تىركەلگەندەردىڭ جالپى العاندا, 20 پايىزىنىڭ جەكەمەنشىك ساقتاندىرۋ قورلارىندا دا ەسەبى بار. ەلدەگى جەكەشە ساقتاندىرۋ كومپانيالارىنىڭ سانى ەلۋدەن اسادى.
مەملەكەتتىك مەديتسينالىق ساقتاندىرۋ جۇيەسى بويىنشا بارلىق مەديتسينالىق قىزمەتتەر تەگىن. الايدا كەيبىر قىزمەتتەردىڭ اقىسى بولەك كورسەتىلگەن. سونىڭ ءبىرى – ستوماتولوگيا. الايدا كەيبىر ساقتاندىرۋ كاسسالارى حالىققا قولايلى بولۋى ءۇشىن, ءتىسىن تىم ءجيى ەمدەتەتىندەر ءۇشىن ونىڭ 90 پايىزىن تەگىن ەمدەۋدى قاراستىرادى.
سونىمەن بىرگە قامسىزداندىرىلعان ازامات سالاۋاتتى ءومىر سالتىن ۇستانىپ, سپورت زالدارىنا تۇراقتى تۇردە دەنەسىن شىنىقتىرىپ, دارىگەر الدىن جىلداپ كورمەيتىن بولسا, جينالعان اقشاسىنىڭ ءبىر بولىگى قايتارىلادى. 18 جاسقا دەيىنگى بالالاردىڭ بارلىق مەديتسينالىق شىعىندارىن ساقتاندىرۋشى كومپانيالار ەسەبىنەن قارجىلاندىرادى.
