ەلورداداعى قر ۇلتتىق اكادەميالىق كىتاپحاناسىندا اقىن, جازۋشى ۇلاربەك دالەيۇلىنىڭ «قارعىباۋلى قاسقىر» كىتابىنىڭ تۇساۋى كەسىلدى. ءىس-شاراعا اقىن-جازۋشىلار, ونەر ادامدارى, پارلامەنت ءماجىلىسىنىڭ دەپۋتاتتارى, زيالى قاۋىم وكىلدەرى, بەلسەندى وقىرماندار قاتىستى.
ادەبيەتكە ولەڭمەن كەلىپ, اقىن رەتىندە تانىلعان ۇلاربەك دالەيۇلىنىڭ بۇعان دەيىن «قانىمداعى قاسقىر ءيىسى», «كۇز جاۋعان سوقپاق» اتتى جىر جيناقتارى مەن «حات بارمايتىن قىستاق» اتتى اڭگىمەلەر جيناعى باسپادان شىققان. «كىتاپتىڭ ونە بويىنان جالاڭ قولمەن جاۋعا شابار اسقاق رۋح, قازاقتىڭ ەڭسەسىن كوتەرەر ەرەن ورلىك ەسىپ تۇر, تۋعان مەكەنىمىز, اتاجۇرت – التايعا دەگەن سارىتاپ ساعىنىش اڭقيدى» دەپ كىتاپتىڭ العى ءسوزىن جازعان قاناعات ابىلقايىر ايتقانداي, «قارعىباۋلى قاسقىر» (دالا حيكايالارى) كىتابىنا ارعى بەتتەگى – قىتايدىڭ التايىنداعى قازاقتاردىڭ تۋعان جەرىنىڭ توپىراعىن جاۋعا تاپتاتپاي, انتالاپ كەلگەن جاۋمەن قيان-كەسكى جۇرگىزگەن شايقاسى, وعان باس بولعان قازاق مەرگەندەرىنىڭ ەرلىگى تاريحي دەرەك نەگىزىندە ايشىقتى تىلمەن اسەرلى باياندالعان. سونىمەن قاتار سوناۋ التايدا قالعان بالالىق شاعى مەن تۋعان اۋىلىنىڭ تىنىس-تىرشىلىگى, ارعى بەتتەگى اعايىنداردىڭ تاڭعاجايىپ ءومىرى دە اۆتور قالامىنان قاعىس قالماعان.
– باستى ماقساتىم – ءوزىنىڭ ۇلتتىق رۋحىنان اداسىپ, ءتۇرلى باعىتقا ءبولىنىپ بارا جاتقان زامانداستارىمنىڭ باسىن بىرىكتىرۋگە ۇمتىلۋ. سونىمەن قاتار ءوسىپ كەلە جاتقان جاس ۇرپاقتىڭ ۇلتتىق ساناسىنا سىلكىنىس جاساۋ بولاتىن. سول ءۇشىن وتكەن عاسىردا ارعى بەتتەگى قازاقتاردىڭ جاۋمەن كۇرەسۋدەگى ەرەكشە ەرلىگىن تاريحي دەرەكتەرگە سۇيەنە وتىرىپ جازىپ شىقتىم, – دەيدى ۇلاربەك دالەيۇلى.
