ەلوردادا توعىز بىردەي ءىرى ساياباق, توقسانعا تارتا گۇلزار, جەلەكجايلار بار. الايدا وسى باقتاردىڭ قالا تۇرعىندارى مەن قوناقتارىنىڭ سۇيىكتى دەمالىس ورىندارىنا اينالعاندارى ساۋساقپەن سانارلىقتاي. ونىڭ سەبەبى نەدە؟
بۇرىندارى ساياباقتاردىڭ بەلگىلى ءبىر مىندەتى بولاتىن. ولار الدىمەن مادەني اعارتۋشىلىق كوپشىلىكتى جۇمىلدىراتىن ورىن ەدى. اعا بۋىننىڭ ەستەرىندە بولار, ونداي ورىنداردا جازعى كينوتەاتر, اتتراكتسيوندار, بي زالدارى, تير, بالالار الاڭدارى مەن سپورت الاڭدارى بولاتىن. قىستى كۇندەرى وسىندا شاڭعى تەۋىپ, سىرعاناق وينايتىن.
ۇلكەن ساياباقتارعا كورمەلەر قويىلىپ, قالا مەرەكەلەرى دە وسىندا وتەتىن. سونىمەن بىرگە ءتۇرلى ءۇيىرمەلەر, سالاماتتى ءومىر سالتىن قولداۋشىلارعا ارنالعان سپورت الاڭدارى الا جازداي جۇمىسىن توقتاتپايتىن. سودان دا بولار, ساياباقتارعا اعىلىپ كەلىپ-كەتىپ جاتاتىن ادامداردىڭ ەسەبى بولمايتىن. ءبىزدىڭ ساياباقتاردىڭ كوبىسىنىڭ ادام بويىنان اساتىن تەمىر قورشاۋىنىڭ ار جاعىندا نە بولىپ جاتقانىن بىلمەيسىز. الدا-جالدا جاياۋ جۇگىرىپ تاقىمىن جازعاندار بولماسا, الاڭسىز سەيىلدەپ جۇرگەندەر تىم از.
جاقىندا ەلورداداعى پرەزيدەنت ساياباعىن ارالادىم. مۇندا دا بەيساۋات جۇرگەن ەشكىم جوق. اعاشتاردىڭ قۋراعان بۇتاقتارى جينالىپ بولماعان ەكەن. ونى سەنبىلىكتىڭ مىندەتىنە قالدىرىپ, ىشكەرىلەي ەندىك. قيراتىلعان شامداردىڭ سىنعان قالپاقتارى شاشىلىپ جاتىر. ودان قالدى ورىندىقتاردىڭ دا ادەيى ورتەلگەنى اڭعارىلادى. وكىنىشكە قاراي, مۇندا كامەرا ورناتىلماعان, قاراۋىلى دا جوق سياقتى. قاراۋسىز قالعان دۇنيە دەپ بۇزاقىلار ويىنا كەلگەنىن ىستەسە كەرەك. باقتىڭ سۇرلەۋلەرى توزىڭقىراپ, تاس قالانعان جولدارىنىڭ قيۋى كەتە باستاپتى.
استانالىق ساياباقتاردىڭ تاعى ءمىنى كوركەم بەزەندىرىلمەگەنىندە دەر ەدىم. مىسالى, ەۋروپا ەلدەرىنىڭ بىرقاتارىندا سۋرەتشىلەر مەن مۇسىنشىلەر تۋىندىلارىن اشىق اسپان استىنداعى كورمەگە قويۋى ءۇردىس بولىپ كەلەدى. جاقسىعا جاۋ بۇزاقىلار ولاردا دا بار. الايدا ءالى ءبىر رەت كوركەم تۋىندىلاردىڭ قيراتىلۋى ورىن الماپتى.
ءبىزدىڭ باقتارعا تاعى ءبىر قاجەت نارسە مەنىڭشە, تاقىرىپتىق مازمۇن بەرىلمەۋىندە. ال, قازاق ەلىندە تاسقا قاشاپ جازاتىن تاريحى از با ەدى. مىسالى, بيىل 100 جىلدىعىن تويلاپ جاتقان الاش قوزعالىسىنا قاتىستى دەرەكتەردى ۇتىمدى ورنالاستىرۋ ارقىلى اقپارات قالىڭ بۇقاراعا تارالار ەدى.
ۇلى وتان سوعىسى شەجىرەسى دە بۇگىنگى ۇرپاقتىڭ جادىنان شىعىپ بارا جاتىر. ونداعى وقيعالاردىڭ بەدەرىن نەگە بەينەلەپ بەرمەسكە؟ سالاماتتى ءومىر سالتى دەيمىز, وسى جەردىڭ تۋماسى اتاقتى قاجىمۇقانمەن بايلانىستىرىپ, ءبىر باقتى سپورتتىق ۇيىرمەلەر جۇمىس ىستەپ ۇلكەن-كىشىنىڭ جينالاتىن جەرىنە اينالدىرۋ ءۇشىن مەنىڭشە, جەرگىلىكتى اتقارۋ ورگاندارىنىڭ قۇلشىنىسى مەن قاراجاتى عانا كەرەك دەپ ويلايمىن. بۇل شارالار ءبىر رەتتىك شارا تۇرىندە ەمەس, تۇراقتى وتكىزىلىپ تۇرسا, قالىڭ بۇقارا كەزدەسەتىن ورنىن ءدال تاۋىپ, جينالار ەدى…
ايگۇل ۋايسوۆا
