قاۋىرت جۇمىستان شارشاعاندا تازا اۋاعا شىعىپ, جاسىل جەلەك اراسىندا سەرۋەندەگەنگە نە جەتسىن؟! كوپشىلىكتىڭ كوڭىل سەرگىتىپ, كۇيكى تىرلىكتەن ءبىر ساتكە بولسا دا تىنىعۋىنا مۇمكىندىك بەرەتىن ساياباقتار بۇگىندە ەلوردادا كوبەيىپ كەلەدى.
كۇننەن-كۇنگە كوركەيىپ, كوز الدىمىزدا گۇلدەنىپ كەلە جاتقان باس شاھاردا جىلداعى ءداستۇر بويىنشا بيىل دا اۋلالار اباتتاندىرىلىپ, ساياباقتار مەن سكۆەرلەر قالىپقا كەلتىرىلۋدە. قالانىڭ بارلىق اۋدانىندا سوڭعى جىلدارى 750-دەن استام اۋلالار مەن قوعامدىق كەڭىستىكتەر, ساياباقتار, سۆكەرلەر مەن بۋلۆارلار اباتتاندىرىلدى. تەك, تۇرعىن الاپتاردا 300-گە جۋىق اۋلالار مەن قوعامدىق كەڭىستىكتەر جاڭارتىلىپ, ەل يگىلىگىنە ۇسىنىلدى. جاڭا باس جوسپاردا قالانى اباتتاندىرۋعا ەرەكشە نازار اۋدارىلدى. بۇل رەتتە قالالىق ساياباقتار مەن سكۆەرلەردى قايتا جوندەۋ, قالا كوشەلەرىن كوگالداندىرۋ, قوعامدىق كەڭىستىكتەر مەن قاسبەتتەردى بىركەلكى ديزاين-كودقا كەلتىرۋ جۇمىستارى قولعا الىنۋدا. قالا اكىمىنىڭ ايتۋىنشا, جىل باسىنان بەرى ەلوردادا 42 اۋلا جانە 2 قوعامدىق كەڭىستىك جانە «حالىق قاتىساتىن بيۋدجەت» جوباسى اياسىندا 34 اۋلا اباتتاندىرىلدى.
قازىرگى تاڭدا تۇرعىندار بوس ۋاقىتتى ۇيدە ەمەس, تازا اۋادا وتكىزۋدى قالايدى. وسى ورايدا, ەلوردالىقتاردىڭ سەرۋەن قۇرار ورىندارى جەتەرلىك. ولاردىڭ وتباسىمەن ءجيى بارىپ دەمالاتىن سۇيىكتى ورىندارىنىڭ ءبىرى – ورتالىق ساياباق. بۇل – شىن مانىندە بالا-شاعامەن عانا ەمەس, دوستارمەن دە اشىق اسپان استىندا باس قوسىپ, شىنىعىپ, سپورتپەن اينالىسۋعا تاپتىرماس ورىن. مۇندا قالا قوناقتارى مەن شاھار تۇرعىندارىنىڭ ءتۇرلى اتتراكتسيوندارعا وتىرىپ, ويىن اۆتوماتتارىندا ويناۋىنا, 7D ولشەمدەگى كينوتەاترىنا, امفيتەاترعا بارىپ, باسسەيندە جۇزۋىنە, ۆەلوسيپەد تەۋىپ, جۇگىرۋىنە جانە ەركە ەسىل جاعالاۋىندا الاڭسىز سەرۋەندەپ, ءتيىمدى دەمالۋىنا بارلىق مۇمكىندىكتەر قاراستىرىلعان.
جىل ماۋسىمدارى اۋىسقان سايىن ساياباقتىڭ ۇسىنار قىزىقتارى وزگەرىپ تۇرادى. قىستا ورتالىق ساياباقتا شاڭعى تەۋىپ, مۇز ايدىنىندا كونكيمەن سىرعاناۋ ءۇشىن قاجەتتى شاڭعى مەن كونكيدى, ۆەلوسيپەد پەن ساموكاتتى, روليكتەر مەن بالالارعا ارنالعان ويىن كولىكتەرىن جالعا الۋعا بولادى. بۇل ساياباقتا ءار كەلۋشىنىڭ قالاۋى مەن تاڭداۋىنا قاراي ءدام ۇسىنا الاتىن كافەلەر مەن مەيرامحانالار دا جەتكىلىكتى. ەرەسەكتەردى بالالىق شاققا جەتەلەپ, بالدىرعاندارعا كوتەرىڭكى كوڭىل كۇي سىيلايتىن ءتاتتى ماقتا مەن بالمۇزداق ساتاتىن دۇڭگىرشەكتەر دە وتە كوپ.
اباي داڭعىلى مەن جەلتوقسان كوشەسىنىڭ قيىلىسىنان ورىن تەپكەن تۇڭعىش پرەزيدەنت مۇراجايىنىڭ جانىنداعى ساياباق اعاشىنىڭ مولدىعىمەن, ياعني كولەڭكەسىنىڭ كوپتىگىمەن ەرەكشەلەنسە, جەڭىس جانە بوگەنباي باتىر داڭعىلدارىنىڭ قيىلىسىندا ورنالاسقان «اقجايىق» ساياباعى كەلۋشىلەرىن سۋ بۇرقاقتارىمەن, 100 ادامعا ارنالعان امفيتەاترىمەن, «سيقىرلى لابيرينت» لاندشافتىق ينستالياتسياسىمەن, تانىم الاڭدارىمەن قىزىقتىرادى. سونداي-اق ساياباققا كەڭەس وداعىنىڭ باتىرى مانشۇك مامەتوۆانىڭ ەسكەرتكىشى ەرەكشە كورىك بەرىپ تۇر. ال «اتاتۇرىك» ساياباعى ءوزىنىڭ جايلى جانە «جاسىل» اتموسفەراسىمەن تانىمال. وزەننىڭ جانىندا بولعاندىقتان, وسى ماڭدا تۇراتىن قالالىقتار بۇل جەردە سەرۋەندەۋدى قاتتى ۇناتادى.
جىل سايىن كوركەيىپ, ادەمى بولىپ كەلە جاتقان دەمالىس ورتالىقتارىنىڭ قاتارىنا قوناەۆ جانە سارايشىق كوشەلەرىنىڭ اراسىنداعى ديپلوماتيالىق قالاشىقتا ورنالاسقان سەرۋەندەۋگە اسا ىڭعايلى سكۆەردى, ەۋرازيا ۇلتتىق ۋنيۆەرسيتەتى جانىنداعى ۇستازدار ساياباعىن, تولەباەۆ پەن قورداي كوشەلەرىنىڭ قيىلىسىنداعى «دوستىق» ساياباعىن, تىلەنديەۆ داڭعىلىنىڭ بويىنداعى
«كوكتال» ساياباعىن, تاشەنەۆ جانە اممان كوشەلەرىنىڭ قيىلىسىندا ورنالاسقان جامبىل جاباەۆ اتىنداعى ساياباقتى قوسۋعا بولادى.
باس قالادا ساياباقتار قاتارى جىل وتكەن سايىن ارتىپ كەلەدى. الداعى ۋاقىتتا استانانىڭ 25 جىلدىعى كۇنىنە وراي ەگەمەن قازاقستان كوشەسى مەن كەنەسارى كوشەسىنىڭ قيىلىسىندا «جۋرناليستەر» ساياباعى بوي كوتەرەدى. بولاشاقتا بۇل تەك قالامگەرلەر باس قوساتىن ورىن ەمەس, كوپشىلىك تىنىعاتىن قۇتتى مەكەنگە اينالارى انىق.
