قازاقستان رەسپۋبليكاسى ۇلتتىق مۋزەيىندە «ەكسپو-2017» حالىقارالىق مامانداندىرىلعان كورمەسى اياسىندا يمپەراتور تسين ءشيحۋانديدىڭ «تەرراكوتا اسكەرى» كورمەسى اشىلدى.
1974 جىلى قازبا جۇمىستارى كەزىندە تابىلعان «تەرراكوتا اسكەرى» دەپ اتالاتىن سازبالشىقتان سومدالعان اسكەريلەر سۇلبالارى يۋنەسكو-نىڭ الەمدىك مۇرالارى تىزىمىنە ەنگەن. مادەني ەسكەرتكىش سيان قالاسىنداعى تسين شيحۋاندي يمپەراتورى كەسەنەسى جانىنداعى 8099 قىتاي جاۋىنگەرىنىڭ جانە اتتارىنىڭ ولشەمى ساقتالعان مۇسىندەرىنىڭ جيىنتىعى ونەر تۋىندىسى بولىپ تابىلادى.
قىتايدىڭ ءبىرىنشى يمپەراتورى تسين شيحۋاندي – قىتاي تاريحىنداعى ءبىرتۇتاس كوپۇلتتى ورتالىقتاندىرىلعان ديناستيا تسين ديناستياسىن, ودان كەيىنگى حان ديناستياسىنىڭ نەگىزىن قالاعان يمپەراتور. ءدال وسى حان ديناستياسى كەزىندە ۇلى جىبەك جولى پايدا بولدى. سول جولدىڭ زاڭدى جالعاسى رەتىندە قىتايدان كەلگەن اسا قۇندى ەلۋگە جۋىق جادىگەرلەردى استانالىقتار 10 قىركۇيەككە دەيىن تاماشالاي الادى.
ايگۇل ۋايسوۆا
