استانا قالاسى اكىمدىگىنىڭ ورتالىقتاندىرىلعان كىتاپحانالار جۇيەسىنە قاراستى №5 بالالار كىتاپحاناسىندا اقىن, سازگەر, كۇيشى, ۇستاز وسپان سۇلەيمەنۇلىنىڭ 75 جىلدىق مەرەيتويىنا وراي «مادەنيەت مارجانىن كيە تۇتقان ۇستاز» اتتى شىعارماشىلىق كەش ءوتتى. وسى اتاۋمەن جەتى بولىمنەن تۇراتىن كىتاپ كورمەسى قويىلدى.
ءىس-شارا بارىسىندا تۇركىستان وبلىسى كەنتاۋ قالاسىنىڭ ورتالىق كىتاپحاناسىمەن بايلانىس ورناتىلىپ, «تۋعان جەردى جىرلاعان اقىندار» اتتى پوەتيكالىق باتل ءوتتى.تەلەكوپىردە وسپان سۇلەيمەنۇلىمەن قاتار كەنتاۋلىق اقىن مۇحيت ءابداشىمۇلىنىڭ تۋعان جەرگە ارناعان ولەڭدەرى وقىلدى.
«ەلوردا بيلەر كەڭەسى» قوعامدىق بىرلەستىگىنىڭ توراعاسى انۋاربەك قايكەنۇلى استانا قالاسى ءبىلىم باسقارماسى ادىستەمەلىك ورتالىعىنىڭ ادىسكەرى كۇنىمبالا ىزتىلەۋقىزى, ەلوردانىڭ ورتالىقتاندىرىلعان كىتاپحانالار جۇيەسىنىڭ ديرەكتورى گۇلبادان مادىباەۆا, باسقا دا كەش قوناقتارى وسپان سۇلەيمەنۇلى تۋرالى پىكىرلەرى مەن جىلى لەبىزدەرىن بىلدىرسە, م.جۇماباەۆ اتىنداعى حالىقارالىق كوللەدج ستۋدەنتتەرى اقىن ولەڭدەرىن وقىپ, كۇمبىرلەتە كۇي تارتىپ, كوپشىلىكتىڭ ىقىلاسىنا بولەندى. بەلسەندى وقىرماندار ماراپاتتالىپ, وسپان سۇلەيمەنۇلىنا سىي-سياپات جاسالدى.
