سەكسەننىڭ سەڭگىرىندەگى ساڭلاق
بەلگىلى ءبيشى, قازاق كسر حالىق ءارتىسى بولات ايۋحانوۆ سەكسەننىڭ سەڭگىرىنە شىقتى. استانادا قازاقستان بالەتى مەترىنىڭ مەرەيتويىنا جانە ءوزى نەگىزىن قالاپ, باسقارىپ وتىرعان مەملەكەتتىك اكادەميالىق بي تەاترىنىڭ 50 جىلدىعىنا ارنالعان كەش ءوتتى.
كەش يەسى بالەت ونەرىنىڭ دامۋىنا ولشەۋسىز ۇلەس قوستى. وتكەن عاسىردىڭ ەلۋىنشى جىلدارى ۇلكەن ساحناعا قادام باستى. وتىزدان استام بالەت قويىلىمدارىن قويدى. بۇعان قوسا, «توعىزىنشى ۇلدان ساقتان», «ايداي سۇلۋ ايسۇلۋ», «مادام ۆونگتىڭ قۇپيالارى», ت.ب. كوركەم فيلمدەرگە ءتۇسىپ, بىرنەشە كىتاپ جازدى.
بۇل كەشكە ارنايى كەلىپ, بولات ايۋحانوۆتى مەرەيتويىمەن قۇتتىقتاعان مادەنيەت جانە سپورت ءمينيسترى ارىستانبەك مۇحامەديۇلى ونىڭ بالەت ونەرى مەن كينوعا سىڭىرگەن ەڭبەگىن, قالامىنىڭ قارىمىن اتاپ ءوتتى. استانانىڭ 20 جىلدىعىنا وراي شىعارىلعان مەدالمەن ماراپاتتادى.
بولات ايۋحانوۆتىڭ شاكىرتتەرى ەلىمىزدە عانا ەمەس, شەتەلدەردە دە تابىستى ونەر كورسەتۋدە. شتۋتگارت بالەتىنىڭ پريما-بالەريناسى ماريا ەيحۆالد پەن ەسسەن بالەتىنىڭ پريما-بالەريناسى يۋليا تسوي دا بۇل كەشكە قاتىسىپ, ۇستازدارىن قۇتتىقتادى.
«بۇل كەش – ەلۋ جىلدىق ەڭبەگىمىزدىڭ جەمىسى. بالەتپەن ونەر دەپ ءومىر سۇرەتىن ادامدار عانا اينالىسادى. مەن ءۇشىن ول جانعا راحات سىيلايتىن بالزام ىسپەتتەس. باسىندا مەرەيتويىمدى وتكىزۋگە قارسى بولعان ەدىم, اقىرى كوندىم. ونىڭ سەبەبى الدىمدا ءالى تالاي ماقساتتار, جوسپارلار بار, «بولدىم, تولدىم» دەپ ايتا المايمىن. وسى كەشكە بارىمدى سالىپ, ءبىر جىل بويى دايىندالدىم. باعدارلاماسىن ازىرلەپ, جاڭا ەكى قويىلىمدى قويدىم. بالەت ونەرىندە دە حالتۋرا كەزدەسەدى. جاس بالەت بيشىلەرىنە ايتارىم, ساف ونەر تۋىندىلارىن حالتۋرادان ايىرا بىلىڭدەر» دەدى بولات ايۋحانوۆ.
بالەت مەترىنىڭ ادەبيەتكە جاقىندىعىن ونىڭ قويعان قويىلىمدارىنان بىلۋگە بولادى. ءماسەلەن, شىڭعىس ايتماتوۆتىڭ العاشقىدا «عاسىردان دا ۇزاق كۇن» بولىپ اتالىپ, كەيىننەن «بوراندى بەكەت» اتاۋىنا وزگەرگەن رومانىنىڭ جەلىسىمەن «ماڭگۇرت» ءبيىن قويدى. مەملەكەتتىك اكادەميالىق بي تەاترىنىڭ رەپەرتۋارىندا «ەۆگەني ونەگين» بالەتى دە بار.
بولات ايۋحانوۆ لەنينگراد حورەوگرافيالىق ۋچيليششەسىندە اتاقتى رۋدولف نۋرەەۆپەن بىرگە وقىعان. كەيىننەن دە ەكەۋى جاقسى ارالاستى. ايۋحانوۆ دوسىنا ارناپ ءبىر بي قويدى. وسى كەشتە كورەرمەندەر بۇل نومەرمەن قاتار بىرقاتار بيلەردى تاماشالادى.