بىردە تەلەديداردى قوسىپ قالىپ ەدىم, ءبىر ءازىل-سىقاق تەاترىنىڭ قويىلىمىن قايتالاپ بەرىپ جاتىر ەكەن. كەمپىر وبرازىنداعى جاركەلەش ءارتىس كوپشىلىكتىڭ اراسىنان جەر ورتاسىنان اسقان ايەلدى شاقىرىپ الدى. اماندىق-ساۋلىق سۇراسقان بولىپ, ستسەناري سولاي بولسا كەرەك, «سۋرەتكە تۇسەيىك» دەپ سوتكاسىمەن قولىن العا سوزدى. حالىق الدىنا شىققان ايەل «ۇيات بولار» دەگەندەي يمەنىپ ەدى, «قازىر سەلفي ءسان عوي» دەپ ءارتىس «كەمپىر» بەت باقتىرمادى.
ارينە, وسىدان جيىرما شاقتى جىل بۇرىن عانا پايدا بولعان «سەلفي» قازىرگى زاماننىڭ مادەنيەتىنىڭ ءبىر ءتۇرى, كۇندەلىكتى تىرلىگىمىزدىڭ ءبىر بولشەگى ەكەنىن مويىنداماسقا بولماس. بۇگىندە فوتو ءىسى مەن الەۋمەتتىك جەلىلەردىڭ جەتىستىگى ادامداردىڭ ءبارىن ءبىر الاڭعا جيناپ, بارىنە تەڭ مۇمكىندىك بەرگەندەي. مۇندا تاعىلىمدى ونەگەسى ۇلگى بولاتىن تۇلعالاردىڭ دا, سونىمەن بىرگە ءجۇردىم-باردىم تۇسىرە سالعان ەشقانداي ەستەتيكالىق تا, تۇلعالىق تا ءىزى جوق سۋرەتتەر ءورىپ ءجۇر. جالپى ادامزات جاراتىلىسىندا اركىمنىڭ ويىنا كەلگەنىن جاساۋ, ورتاق يگىلىكتەردى ماعىناسىز دۇنيەلەرمەن تولتىرۋ جات نارسە بولىپ ەسەپتەلۋشى ەدى. ەندى ناقتى ءومىر مەن ۆيرتۋالدى ءومىردىڭ اراسى شايىلىپ كەتكەندەي. كوپتىڭ الدىنا شىعۋدىڭ جاۋاپكەرشىلىگىن تۇسىنۋدەن قالعان سەكىلدىمىز.
وسى ۋاقىتتىڭ ىشىندە سەلفيگە تۇسپەسە, ىشكەن اسى بويىنا سىڭبەيتىندەر دە شىقتى. ءجوندى-جوسىقسىز «كوپتىڭ الدىندا كولبەڭدەۋ» نەنىڭ بەلگىسى, ول كىمگە كەرەك دەگەن سۇراقتاردىڭ جاۋابىن ماماندار ايتىپ بەرىپتى.
ولار «سەلفيسىز» تۇرا المايتىنداردىڭ جايىن ناۋقاسپەن بايلانىستىرادى. ساعات سايىن سۋرەتى شىعىپ تۇراتىنداردىڭ اككاۋنتتاعى ءومىرى ناقتى تىرلىگىنە اينالىپ, ءوزىنىڭ كۇندەلىكتى جاعدايى, تىنىس-تىرلىگى قالتارىستا قالىپ قويادى. تەك فەيسبۋك, ينستاگرام, كونتاكت پەن تۆيتتەردى تولتىراتىن قۇرالعا اينالعانىن وزدەرى دە اڭعارماي قالادى. مۇنى ادامنىڭ تىرلىگىنىڭ ءمان-ماقساتىنان ايىرىپ, ومىرلىك ۇستانىمىنان اداستىراتىن, ادامنىڭ مىنەز-قۇلقىنىڭ قالىپتان اۋىتقۋشىلىعى دەپ پسيحولوگتار دابىل قاعۋدا.
ماماندار سەلفي اۋرۋىنىڭ اسقىنۋ دەڭگەيىن دە انىقتاپتى. العاشقى كەزەڭدە ءوزىن-ءوزى كۇنىنە 2-3 رەت سۋرەتكە ءتۇسىرىپ, كەسكىن-كەلبەتىنە كوڭىلى تولىپ ماساتتانىپ جۇرەدى. ودان كەيىن باتىلدىعى جەتىپ, ونى الەۋمەتتىك جەلىلەردە تاراتۋعا اسىعادى. راس-وتىرىگىن قايدام, پسيحولوگتار سەلفيگە قۇمار جانداردى ومىرىندە شۋاق قالماعان, ارالاس-قۇرالاس دوستارى جوق, قوعامنان وقشاۋ جۇرگەندەر دەپ اتاپتى. سەلفيدىڭ «سۇمدىعى» مۇنىمەن بىتپەيدى. ءار سۋرەتكە «لايك» باسقان سايىن ودان بەتەر قۇنىعا كىرىسەدى. ادامنىڭ سەلفيگە تاۋەلدىلىگىنىڭ بەلگىسى – سول. وسى سۋرەتتەر ارقىلى ءوزىن قوعامنىڭ ءبىر بولشەگىندەي سەزىنۋ, قوعامداعى ورنىن ناقتىلاۋ سەكىلدى مانگە يە بولىپ بارا جاتقانعا ۇقسايدى. مۇنىڭ ار جاعىندا كىم كىممەن تاباقتاس بولدى, كىم قاي تويدا ءجۇر, تاعىسىن تاعىداي ماقتانىشقا قۇرىلعان تەك جەكە باسىنا قاتىستى دۇنيەلەردەن كوزىڭىز تۇنادى. الەۋمەتتىك جەلىنىڭ جاقسى جاعىن ىزدەگەن ادامنىڭ ۋاقىتىن العاننان باسقا, جاقسىلىعى از ەكەنىنە كوبىڭىز كەلىسەسىزدەر.
ارينە, سەلفيسىز دە جۇرگەندەر جوق ەمەس. وكىنىشتىسى, كەيدە وسى دەرتكە شالدىققانداردىڭ شىلاۋىندا كەتكەنىڭىزدى بىلمەي قالاسىز. توسىننان تۇسكەن سۋرەتىڭىز ءسۇت پىسىرىمدەي ۋاقىت وتكەندە الەۋمەتتىك جەلىلەردە جىلت ەتە قالسا نە دەيسىز؟!
سوڭعى كەزدەرى قاجىلىق پارىزىن وتەگىسى كەلىپ, مەككەگە اتتانعانداردىڭ دەنى دە وسى ىسكە اۋەس كەلەتىن بولدى. ەگەر ادامنىڭ رۋحانياتى سەلفيدىڭ الدىندا ءالسىز بولسا, ادام جانىنىڭ ەڭ تۇكپىرىندەگى قاسيەتتەن نە قالدى دەپ الاڭدايسىز. الەۋمەتتىك جەلىنى تەك جانىمىزدى جالاڭاشتاپ جۇرتقا جايىپ سالاتىنداي سالساق, وندا باعاسى تىم قىمباتقا تۇسكەلى تۇرعان جوق پا؟!
ودان باسقا جاقسى سەلفي ءۇشىن باسىن قاتەرگە تىگىپ جاتقانداردى دا كورىپ, جانىمىز تۇرشىگەدى. ەستەرىڭىزدە بولسا, وسىدان ءبىراز جىل بۇرىن وتتا جانىپ جاتقان جاننىڭ بەينەسىن سەلفيگە سالىپ ەدى. ونى دا كوردىك. وتكەن جىلدارى جول اپاتىنا ۇشىراعان اعايىندارىمىزدى سەلفيدەن تانىپ, ەسىمىزدەن تانىپ قالا جازداعانبىز.
سودان بەرى, سەلفيگە سەلت ەتپەيتىن بولدىق. مىنە, ەڭ قورقىنىشتىسى سەلفيگە سەلت ەتپەۋدەن باستالادى. كوبىمىز قوعامدا بولىپ جاتقان ءتۇرلى وقيعالارعا ءتۇرلى-ءتۇستى سۋرەتتەر سەكىلدى جايباراقات قارايمىز. ادامنىڭ بويىنداعى جاناشىرلىق, جاماندىققا جۇرەگى اۋىرىپ, جاقسىلىقپەن بولىسە ءبىلۋ سەكىلدى ادامي قاسيەتتەرىمىزدى سەلفيدىڭ تاسقىنى باسىپ, تۇنشىقتىرىپ بارا جاتقانداي.
ايگۇل ۋايسوۆا
