«ءبىز تازا قالانى قولدايمىز!» دەگەن اتپەن وتكەن جالپىقالالىق سەنبىلىككە 150 مىڭ ەلوردالىق تۇرعىن قاتىستى. سونىمەن قاتار, قالانى تازالاۋعا ارنايى مامانداندىرىلعان 425 دانا تەحنيكا جۇمىلدىرىلدى.
اۋقىمدى شاراعا اۋداندار اكىمدىكتەرى, قالالىق باسقارمالار, كوممۋنالدىق شارۋاشىلىقتار, قارجى سەكتورىنىڭ جانە ورتالىق مەملەكەتتىك ورگانداردىڭ وكىلدەرى قاتىستى. سونداي-اق, جاستار بىرلەستىكتەرى مەن قالاداعى الەۋمەتتىك ماڭىزدى نىسانداردىڭ قىزمەتكەرلەرى دە ماڭىزدى شارادان تىس قالمادى. وسىنىڭ ارقاسىندا جالپى اۋدانى 3 545 050 شارشى مەتر ساياباق پەن ساياباق اۋماعى جينالىپ, 10 777 كوشەت وتىرعىزىلدى.
مىسالى, الماتى اۋدانىنا قاراستى ميچۋرينو كەنتىندە – 386, ترياتلون پاركىندە – 145, ش.قالداياقوۆ كوشەسىندە 114 اعاش ەگىلدى. سونداي-اق, اۋداننىڭ دەنساۋلىق ساقتاۋ جانە ءبىلىم نىساندارى 2 600 كوشەت بەرىلدى. بۇدان بولەك, ەسىل اۋدانىندا – 3 900, ال سارىارقا اۋدانىندا 3 612 اعاش كوشەت وتىرعىزىلدى.
– قازاقتا «ءبىر تال كەسسەڭ, ون تال ەك» دەگەن كەرەمەت ءتامسىل بار. سونداي-اق, بابالارىمىز «اتادان مال قالعانشا تال قالسىن» دەپ تە ايتىپ كەتكەن. وسى ەكى اۋىز سوزدەن-اق حالقىمىزدىڭ ەكولوگيا ماسەلەسىنە ايرىقشا قاراعانىن اڭعارۋعا بولادى. وكىنىشكە قاراي, قازىرگى تاڭدا اتا-بابامىزدىڭ وسى ءبىر اماناتىن دۇرىس ورىنداي الماي ءجۇرمىز. الايدا بۇگىنگى سەنبىلىككە شىققان حالىقتىڭ قاراسىن كورىپ, قۋانىپ وتىرمىن. سەبەبى ءبىر كۇننىڭ ىشىندە مىڭداعان كوشەت وتىرعىزىلىپ, بىرنەشە توننا قوقىس شىعارىلدى. ەگەر وسىنداي يگى ىستەر الداعى ۋاقىتتا ءداستۇرلى تۇردە ۇيىمداستىرىلىپ وتىرسا, نۇر ۇستىنە نۇر بولار ەدى, – دەيدى ءوزىن زەينەتكەرمىن دەپ تانىستىرعان قالدىكۇل امزەقىزى.
بۇدان بولەك, ەرىكتىلەر مەن قوعامدىق ۇيىمدار وزەندەردىڭ ارناسىنا سانيتارلىق تازالىق جۇرگىزدى. ناقتىراق ايتساق, ەسىل, اقبۇلاق جانە سارىبۇلاق وزەندەرىندە ەكولوگيالىق شارالار ۇيىمداستىرىلدى. سەنبىلىك بارىسىندا 2559,68 توننا قوقىس جينالىپ, پوليگونعا شىعارىلدى. تابيعي رەسۋرستار مەن تابيعات پايدالانۋدى رەتتەۋ باسقارماسى ەسىل (گازماشاپپاراتۋرا), اقبۇلاق (ەۋرازيا ۋنيۆەرسيتەتىنەن تەتس-2-گە دەيىن) وزەندەرىنىڭ ارناسىن تازالادى. تازالىق شاراسىنا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى, س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ 150-دەن اسا ستۋدەنتى, سونداي-اق, قالالىق بولىمشەلەردىڭ اسكەري قىزمەتكەرلەرى قاتىستى.
سەرىك قۇدايبەرگەنۇلى
