«ەلوردا اقپارات» مەديا رەسۋرسى مەن «استانا» راديوسىنىڭ بىرلەسكەن «قالا تىنىسى» جوباسى ءار اپتانىڭ سارسەنبى كۇنى تىكەلەي ەفيرگە شىعادى. جوبا اۆتورى ءارى جۇرگىزۋشى – قايسار جۇمابايۇلى.
العاشقى شىعارىلىم استانانى سمارت-سيتي جانە قاۋىپسىز قالا ەتىپ قالىپتاستىرۋ يدەياسىنىڭ قۇرامداس بولىگى بولىپ تابىلاتىن تاقىرىپقا ارنالدى. ناقتى ايتقاندا, «سەرگەك» بەينەباقىلاۋ, تالداۋ جانە بولجام جاساۋ ينتەللەكتۋالدى جۇيەسى. 15 قىركۇيەكتەن باستاپ «سەرگەك» كامەرالارىنىڭ الدىندا جول ءجۇرۋ ەرەجەلەرىن بۇزعان كولىك جۇرگىزۋشىلەرگە ايىپپۇل سالىنا باستادى. بۇل جوبانىڭ ارتىقشىلىعى مەن تيىمدىلىگى تۋرالى تىكەلەي ەفيردە سالا ماماندارى اڭگىمەلەپ بەردى.
الىشەر
ابدىقادىروۆ,
استانا قالالىق ينۆەستيتسيا جانە دامۋ باسقارماسىنىڭ باسشىسى:
– قالانىڭ قاۋىپسىزدىك دەڭگەيىن كوتەرۋدى, قوعامدىق ورىندار مەن كوشەدەگى قۇقىق بۇزۋشىلىقتىڭ الدىن الۋدى كوزدەيتىن بۇل جوبانىڭ جاڭالىعى كوپ. كامەرالار كولىكتىڭ نومىرلىك بەلگىلەرىن, جىلدامدىق رەجيمىن, سونىمەن قاتار, كولىك يەلەرىنىڭ توقتاۋ بەلگىسى مەن اۆتوبۋس جولاقتارىن قيىپ ءوتۋىن جىلدام انىقتاۋعا مۇمكىندىك بەرەدى. ناقتى ايتقاندا, 400 كوشە قيىلىسىنا جانە 300 سىزىعى بار ۋچاسكەلەرگە 6000 كامەرا قويىلادى. حالىق ءجيى باراتىن ورىندار, اتاپ ايتقاندا ساۋدا-ويىن-ساۋىق ورتالىقتارى, تەاتر, سپورتتىق نىساندار, مۋزەي جانە تاعى باسقا قوعامدىق ورىندارعا 4000 كامەرا ورناتۋ جوسپارلانعان.
ءدال قازىرگى ۋاقىتتا تاۋلىك بويى تىنىشتىق پەن قوعامدىق ءتارتىپتى قاداعالايتىن 3000 كامەرا جۇمىس ىستەپ تۇر. جىل سوڭىنا دەيىن جالپى سانى 13000 كامەرا قالانىڭ قاۋىپسىزدىگىن باقىلايتىن بولادى.
جاعىمدى جوبا استانا اكىمدىگىنىڭ مەملەكەتتىك-جەكەمەنشىك سەرىكتەستىگى ارقىلى ىسكە اسۋدا. جالپى ينۆەستيتسيا كولەمى 8,4 ملرد تەڭگەنى قۇرايدى. جوبا جەكەمەنشىك ينۆەستورلار ەسەبىنەن قارجىلاندىرىلادى. قالا بيۋدجەتىنە قۇقىق بۇزۋشىلاردان تۇسكەن ايىپپۇل ەسەبىنەن ينۆەستيتسيا قايتارىلماق. وسى رەتتە ايتا كەتكەن ءجون, جوبانىڭ سەرىكتەستەرى كامەرالاردىڭ ساپالى قىزمەتى مەن دۇرىس جۇمىس ىستەۋىنە تىكەلەي جاۋاپتى بولادى.
اسەت احمەتوۆ,
ازىرلەۋشى كومپانيانىڭ ديرەكتورى:
– استانادا «سەرگەك» بەينەباقىلاۋ, تالداۋ جانە بولجام جاساۋ ينتەللەكتۋالدى جۇيەسى قولدانىسقا ەندى. ەڭ الدىمەن, بۇل جۇيە جىلدامدىق قوزعالىسىن اسىرعانى ءۇشىن جانە Bus Lane سىزىعىن كەسىپ ءوتۋ سياقتى بۇزۋشىلىقتاردى تىركەيتىن بولادى. جاڭادان ىسكە قوسىلاتىن بۇل بەينەباقىلاۋ كامەرالارى تاۋلىك بويى جۇمىس ىستەيدى. ەرەجە بۇزىپ, كامەراعا ءتۇسىپ قالعان كولىك يەلەرىنىڭ دەرەگى احۋالدىق ورتالىققا وڭدەلۋ ءۇشىن جىبەرىلەدى. بۇعان دەيىن جوبا تەستىلىك كەزەڭنەن ءوتتى. ءبىز بۇل باستامانى جۇزەگە اسىرا وتىرىپ, «Smart City» تەحنولوگياسىن ەنگىزۋ ارقىلى ەلوردا تۇرعىندارى مەن قوناقتارىنىڭ ءومىرىن قاۋىپسىز ەتۋدى كوزدەيمىز. ايىپپۇل ماسەلەسىنە كەلسەك, تولەۋدىڭ ءتۇرلى تاسىلدەرى قاراستىرىلدى. اتاپ ايتقاندا, قولما-قول اقشانى ەكىنشى دەڭگەيلى بانكتەر نەمەسە «قازپوشتا», Kaspi جانە QIWI كوشەلەك تەرمينالدارى ارقىلى , سونىمەن قاتار بانك كارتاسىمەن egov.kz پورتالىندا تىركەلۋ نەگىزىندە ونلاين-تولەم جاساۋعا بولادى جانە HandyPay, MyPay موبيلدىك قوسىمشالارىن پايدالانعان ءتيىمدى.
دارحان تاشمۇحامبەتوۆ,
استانا قالاسى ءىىد اكىمشىلىك پوليتسيا باسقارماسى اكىمشىلىك تاجىريبە ءبولىمى باسشىسىنىڭ ورىنباسارى:
– بەينەباقىلاۋ – بۇلتارتپاس ايعاق. سوندىقتان بەينەباقىلاۋ ورناتىلعان ورىنداردا ۇساق-تۇيەك قىلمىس كەزدەسپەيدى. وتكەن جىلدىڭ سايكەس كەزەڭىمەن سالىستىرعاندا قوعامدىق ورىندارداعى قىلمىس 21,1 پايىزعا, قالا كوشەلەرىندە – 32,7, جول-كولىك اپاتتارىنىڭ سانى 20 پايىزعا ازايدى. بەينەباقىلاۋ كامەرالارى تەك قالانىڭ ءىشىن ەمەس, شەت ايماقتاردى دا قامتيدى. قالاعا اۋىلداردان كەلەتىن كىرەبەرىس جولدار تۇگەل باقىلاۋعا الىناتىن بولادى.
جاڭا وقۋ جىلىنىڭ باستالۋىنا وراي, بالالاردىڭ قاۋىپسىزدىگىنە باعىتتالعان جۇمىستار قولعا الىندى. ءبىلىم بەرەتىن ۇيىمدار مەن بالاباقشالارعا جاقىن كوشەلەرگە كولىك قوزعالىسىنىڭ جىلدامدىعى 40 كم/ساع دەيىن شەكتەيتىن جول بەلگىلەرى ورناتىلدى. سوعان سايكەس جول بەلگىلەرى دە سىزىلدى. مۇنداي ورىنداردىڭ ءبارى «سەرگەك» سۋرەت جانە بەينە جازۋ جۇيەلەرىنىڭ نازارىندا بولادى.
گۇلميرا ايماعانبەت
