حالقىمىزدىڭ ءال-اۋقاتىنىڭ ءوسۋىن باستى باسىمدىققا بەكىتكەن مەملەكەت باسشىسى ن.ءا.نازارباەۆتىڭ قازاقستان حالقىنا جولداۋى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» تاقىرىبىندا ءوربىدى.
بۇل رەتتە ەلباسى مەديتسينالىق قىزمەت ساپاسىنا باستى نازار اۋدارىپ, ونى تۇرعىنداردىڭ الەۋمەتتىك كوڭىل-كۇيىنىڭ اسا ماڭىزدى كومپونەنتى رەتىندە باعالادى. ەلباسىنىڭ وسى سالاداعى جۇمىستى ەڭ الدىمەن, اسىرەسە, اۋىلدىق جەرلەردە العاشقى مەديتسينالىق-سانيتارلىق كومەكتىڭ قولجەتىمدى بولۋىن قامتاماسىز ەتۋ قاجەتتىگىن باسا كورسەتتى.
دەسە دە, ەلوردالىق باستاپقى مەديتسينالىق-سانيتارلىق كومەك كورسەتەتىن مەكەمەلەردىڭ دە وزىندىك قيىندىقتارى جوق ەمەس. وسى رەتتە جولداۋدا قاراستىرىلعان بىرقاتار تۇجىرىمدار دەنساۋلىق ساقتاۋ سالاسىن جاڭا ساپاعا كوتەرەدى دەپ ويلايمىن. اتاپ ايتقاندا, باستاپقى مەديتسينالىق-سانيتارلىق كومەك كورسەتەتىن قىزمەتكەرلەردى ىنتالاندىرۋ ءۇشىن 2019 جىلدىڭ 1 قاڭتارىنان باستاپ اۋرۋلاردى ەمدەۋ ءىسىن باسقارۋدىڭ جاڭا تاسىلدەرىن ەنگىزگەن ۋچاسكەلىك مەديتسينا قىزمەتكەرلەرىنىڭ جالاقىسىن كەزەڭ-كەزەڭمەن 20 پايىزعا كوبەيتۋدى اتقارۋشى ورگاندارعا تاپسىردى. جانە وسى ماقساتتارعا كەلەسى جىلى 5 ميلليارد تەڭگە بولىنەتىنى بەلگىلى بولدى. بۇل وتە قاجەتتى, دەر كەزىندە كوتەرىلگەن ماسەلەنىڭ ءبىرى بولىپ وتىر.
ماسەلەن, ءوزىم جەتەكشىلىك ەتەتىن №8 قالالىق ەمحاناعا 70545 ادام تىركەلگەن. ءار ۋچاسكەلىك دارىگەر مىڭنان اسا ادامنىڭ دەنساۋلىعىنا جاۋاپتى. ارينە, ولاردىڭ دەنساۋلىعى, ءومىر جاسىنىڭ ۇزاقتىعى قوعامداعى وزگەرىستەرگە تىعىز بايلانىستى. ەگەر كەڭىنەن الىپ قاراساق, ەلباسى جولداۋىندا بۇل دا ەسكەرىلىپ, ادام دەنساۋلىعى ارىدەن قاراستىرىلىپ وتىر. ول مىنا ماتىندە كورىنەدى: «قۇرىلىسقا مەن كوممۋنالدىق سەكتورعا زاماناۋي تەحنولوگيالاردى بەلسەندى ەنگىزۋ, ءبىلىم بەرۋ ىسىندە ءوزىمىزدىڭ وزىق جۇيەمىزدى قۇرۋ, مەديتسينالىق كومەكتىڭ قولجەتىمدىلىگى مەن تيىمدىلىگىن ارتتىرۋ, ساپالى جۇمىسپەن قامتۋدى قامسىزداندىرۋ – ازاماتتارىمىزدىڭ ءومىرىنىڭ دەڭگەيىن ءسوزسىز كوتەرەدى». مەملەكەت باسشىسى وسى وزىق تەحنولوگيالاردى ەمحانامىزعا ەندىرسەك, وندا دەنساۋلىق ساقتاۋ سالاسىندا اۋرۋلاردىڭ الدىن الۋ مەن ەمدەۋدى ايتارلىقتاي جاقسارتۋى, مەديتسينالىق قىزمەت كورسەتۋ ساپاسىن ارتتىرۋ ءىسى ءسوزسىز العا جىلجيتىنىن ايتادى.
بارلىق ەمحانالار مەن اۋرۋحانالار مەديتسينالىق قۇجاتتاردى قاعازسىز, تسيفرلىق نۇسقادا جۇرگىزۋگە كوشىرىپ, 2020 جىلعا قاراي بۇكىل تۇرعىنداردىڭ ەلەكتروندى دەنساۋلىق پاسپورتتارىن جاساۋعا, كەزەكتەردى, بيۋروكراتيانى جويۋعا, قىزمەت كورسەتۋ ساپاسىن ارتتىرۋعا مۇمكىندىك اشىلۋ قاجەتتىگى دە جولداۋدا ايقىن كورسەتىلگەن.
بۇل رەتتە ەلوردامىزدا ايتارلىقتاي اۋقىمدى جۇمىستار ورىندالدى دەۋگە بولادى. بۇگىندە استانا قالاسى قوعامدىق دەنساۋلىق ساقتاۋ باسقارماسىنىڭ مالىمەتى بويىنشا, 780 مىڭ مەديتسينالىق قۇجاتتار ساندىق ساپاعا اۋىستىرىلىپ, ەلەكتروندى قالىپقا ەندى. قالالىقتاردىڭ 93 پايىزىندا دەنساۋلىقتىڭ ەلەكتروندى پاسپورتى بار.
قازىرگى كۇندە ەمحانامىزدا قولدانىلىپ جۇرگەن كەشەندى باعدارلاما, بىرىنشىدەن, دارىگەرگە قولايلى. ول ءوزىنىڭ ۋچاسكەسىنە تىركەلگەن ادامداردىڭ حال-جاعدايىنا, ولاردىڭ ەمحانادان تىسقارىدا بولىپ جاتقان دەنساۋلىعىنا قاتىستى وزگەرىستەرگە مونيتورينگ جاساي الادى. وزىنە قاراستى تىركەۋدە تۇرعان ادامنىڭ دەنساۋلىعى كۇرت تومەندەپ, جەدەل جاردەم شاقىردى ما, نە بولماسا اۋرۋحانادا ەمدەلدى مە, باسقا دا وقىس وقيعاعا تاپ كەلدى مە؟ مۇنىڭ ءبارىن دارىگەر ءوز ءمودۋلى ارقىلى ەمدەلۋشىلەردىڭ بارلىق قيمىل-قوزعالىسىن, ەمدەلۋ قورىتىندىلارىن باقىلاپ وتىرادى. دارىگەر ۋچاسكەسىندەگىلەردىڭ تولىق ءتىزىمىن كورە الادى, ونى توپ-توبىمەن جاسىنا قاراي, تاعى باسقا سيپاتتارىمەن ىرىكتەي الادى. وسى ءتىزىم ارقىلى سكرينينگتەن وتۋگە ءتيىستى تۇرعىنداردى انىقتاپ, باسقا دا كەزەكتەگى ەم-شارالاردىڭ كەستەسىن تۇزەپ, حابارلاسا الادى.
وسى باعىتتاعى جۇمىستاردىڭ جاندانۋىنا ەلباسى جولداۋى تىڭ سەرپىلىس بەرىپ, ءبىزدىڭ جۇمىستىڭ ساپاسىن كوتەرۋگە وزىندىك تالاپ تا قويىپ وتىر.
ايگۇل قاسىموۆا,
№8 قالالىق ەمحانانىڭ
باس دارىگەرى
