كەشە اكىمدىكتە ەلوردا باسشىسى باقىت سۇلتانوۆ قالا اكتيۆىمەن كەزدەسۋ وتكىزىپ, مەملەكەت باسشىسى نۇرسۇلتان نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى حالىققا جولداۋىن تالقىلادى. استانا اكىمى بۇل جولعى جولداۋ ءوزىنىڭ ماڭىزى مەن مازمۇنى جاعىنان ەرەكشەلەنىپ, بۇعان دەيىن دايىندالعان جانە ۋاقىت سىنىنان وتكەن «قازاقستان-2050» ستراتەگياسى, «نۇرلى جول», «100 ناقتى قادام» ۇلت جوسپارى سياقتى باعدارلامالىق قۇجاتتاردىڭ لوگيكالىق جالعاسى بولعانىن اتاپ ءوتتى.
«ەل پرەزيدەنتى نۇرسۇلتان نازارباەۆ ازاماتتاردىڭ الەۋمەتتىك جاعدايىن, ءومىر ءسۇرۋ ساپاسىن جانە قوعامدى دامىتۋعا قاتىستى كولەمى جونىنەن بۇرىن بولىپ كورمەگەن ءىس-شارالاردى بەلگىلەپ بەردى. جولداۋدىڭ ءاربىر تارماعى قازاقستاننىڭ قارقىندى دامۋى ءۇشىن ماڭىزدى بولىپ تابىلادى, ونى جۇزەگە اسىرۋ بىزگە الەمدەگى 30 دامىعان ەلدىڭ قاتارىنا سەنىممەن كىرۋىمىزگە مۇمكىندىك بەرەدى. مەملەكەت باسشىسى جاريا ەتكەن مىندەتتەر اعىمداعى جىلدىڭ 11 قىركۇيەگىندە قالا اكتيۆىمەن كەزدەسۋدە ايتىلعان ماقساتتارمەن تىعىز بايلانىستى. ماسەلەن, بۇل – قالانى دامىتۋدىڭ جاڭا مودەلىن ەنگىزۋ جانە يننوۆاتسيالاردى دامىتۋ مەن جاڭاشىل ادامداردى ءوسىرۋ ءۇشىن قولايلى ورتا قالىپتاستىرۋ» دەدى باقىت سۇلتانوۆ.
كەزدەسۋگە قاتىسۋشىلار پرەزيدەنتتىڭ جولداۋىندا كورسەتىلگەن بارلىق سالالارعا قاتىستى ماسەلەلەردى تالقىلادى. اتاپ ايتقاندا, ولار «7-20-25» مەملەكەتتىك باعدارلاماسىن جۇزەگە اسىرۋ باعىتىنداعى وي-پىكىرلەرىمەن ءبولىستى. قالا اكىمى باقىت سۇلتانوۆ بۇل باعدارلاما الداعى 5 جىلدا 100 مىڭنان اسا ازاماتتاردى باسپانامەن قامتاماسىز ەتۋگە مۇمكىندىك بەرەتىنىن ءمالىم ەتتى.
قالا اكتيۆى ەلوردامىزداعى بيزنەس احۋالدى دامىتۋ ماسەلەسىن كوتەردى. بۇل باعىتتا ىسكە اسىرىلىپ جاتقان جوبالار جونىندە «دامۋ» كاسىپكەرلىكتى دامىتۋ قورىنىڭ استانالىق فيليالىنىڭ ديرەكتورى ابدوللا نۇرسۇلتان باياندادى. ءبىلىم بەرۋ جانە دەنساۋلىق ساقتاۋ سالاسىنداعى قىزمەتتەردىڭ ساپاسى تۋرالى ەلوردالىق مەكتەپتەردىڭ باسشىلارى مەن بالاباقشالاردىڭ مەڭگەرۋشىلەرى اڭگىمەلەدى. استانا اكىمى ءار سالاداعى ءىس-شارالاردىڭ ايرىقشا ماڭىزدىلىعىنا توقتالدى. ول, اسىرەسە, دەنساۋلىق ساقتاۋ, ءبىلىم بەرۋ سالالارىنىڭ ازاماتتار ءۇشىن قولجەتىمدى بولۋىن قامتاماسىز ەتۋدى, سونداي-اق, اۋلالىق جانە ىشكىورامدىق اۋماقتاردى اباتتاندىرۋعا ەرەكشە كوڭىل ءبولۋدى تاپسىردى.
