تازا قالانىڭ تىنىسى كەڭ. ال ەلوردانىڭ قاي كەز بولسىن مۇنتازداي بولىپ تۇرۋى, البەتتە, تازالىقشىلاردىڭ زور ەڭبەگى ەكەنى انىق. دەگەنمەن داستۇرگە اينالعان سەنبىلىك تە باس قالانىڭ كوركەيۋىنە وزىندىك ۇلەسىن قوسۋدا. بۇل ىسكە كەلگەندە جۇرتشىلىق تا جۇدىرىقتاي جۇمىلادى. سەنبى كۇنى «قالا تازالىعى ءۇشىن» دەگەن تىلەك ەكى قولعا ءبىر كۇرەك ۇستاتتى. جالپىقالالىق سەنبىلىككە 188 مىڭنان اسا استانالىق قاتىستى.
سەنبىلىكتە مەملەكەتتىك مەكەمەلەر, مينيسترلىكتەردەن باستاپ ۇلتتىق كومپانيالاردىڭ, جالپى 4180 مەكەمەنىڭ ماماندارى قالا تازالىعىنا ۇلەس قوسۋعا بىلەك سىبانا كىرىستى. 171 جۇك تيەگىش پەن 335 جۇك كولىگى, جالپى 506 مامانداندىرىلعان تەحنيكا جۇمىلدىرىلىپ, 2,3 ملن شارشى مەتر جەرگە تازالىق جۇمىستارى جۇرگىزىلدى. سەنبىلىككە شىققان مينيسترلىكتەردىڭ, اگەنتتىكتەردىڭ, استانا قالاسى اكىمدىگىنىڭ قىزمەتكەرلەرى, ارداگەرلەر كەڭەسى مەن كاسىپوداق, قوعامدىق بىرلەستىكتەر ۇجىمدارى بەلسەندىلىك تانىتتى. جالپىقالالىق سەنبىلىك بارىسىندا اۋلا ىشتەرىن اباتتاندىرۋ, بالالار وينايتىن جانە سپورت الاڭدارىن قالپىنا كەلتىرۋ, ينجەنەرلىك-كوممۋنيكاتسيالىق جەلىلەردى, سىرتقى جارنامالاردى رەتكە كەلتىرۋ, وتپەجولداردى جانە كوپىرلەردىڭ قورشاۋلارىن جۋ, ايالدامالارداعى پاۆيلونداردى جوندەۋ, بەي-بەرەكەت تاستالعان اۆتوكولىك قۇرالدارىن شىعارۋ, كوشەلەر مەن ساياباقتارداعى جارىقتاندىرعىشتاردى بوياۋ سياقتى جۇمىستار اتقارىلدى. سونداي-اق ەرىكتىلەر مەن قوعامدىق ۇيىم وكىلدەرىنىڭ قاتىسۋىمەن ەسىل, اقبۇلاق جانە سارىبۇلاق وزەندەرىنىڭ جاعالاۋلارىندا دا ەكولوگيالىق شارالار وتكىزىلدى.
ءبىر كۇندىك تازالىق شاراسىندا 900 توننادان اسا قوقىس جينالىپ, قالا سىرتىنا شىعارىلدى. سونداي-اق قالانىڭ ءتورت اۋدانىندا 9 مىڭنان اسا اعاش وتىرعىزىلدى. تۇپتەپ ايتقاندا, جالپىقالالىق سەنبىلىك سەرپىندى ءوتتى دەۋگە نەگىز بار.
