ەلوردادا ءبىر اپتاعا جۋىق ۋاقىت دۇرىلدەگەن «شابىت» ءحVىىى شىعارماشىل جاستاردىڭ حالىقارالىق فەستيۆالىنىڭ قورىتىندىسى شىعارىلدى. ەلىمىزدىڭ تۇكپىر-تۇكپىرىنەن جانە الەمنىڭ رەسەي, قىتاي, پولشا, وزبەكستان, قىرعىزستان سەكىلدى مەملەكەتتەرىنەن كەلگەن 388 ۇمىتكەردىڭ اراسىندا دارا شىققان دارىندىلار كونگرەسس-حولدا وتكەن گالا-كونتسەرت بارىسىندا ۇكىلەندى.
بيىلعى فەستيۆال باعدارلاماسىنا بەس اتالىم ەنگىزىلدى. سولاردىڭ ىشىندە «ءمۇسىن» جانە «ساندىك-قولدانبالى ونەر» اتتى ەكى بولىمنەن تۇراتىن «بەينەلەۋ ونەرى» اتالىمىندا باسەكە كۇشتى بولدى. وعان 150 تالاپكەر قاتىسۋعا نيەت تانىتتى. قورىتىندىسىندا مۇسىنشىلەردىڭ اراسىندا كەرەكۋلىك دانيار سارباسوۆ توپ جارسا, قولونەرشىلەر باسەكەسىندە اتىراۋلىق التىنبەك ەسەنعازيەۆ قارسىلاستارىنان قارا وزدىردى.
وسى جىلى العاش رەت وتكەن «سپورتتىق بال ءبيى» اتالىمىنا 14 جۇپ قاتىستى. قازاقستانعا قاراعاندا بۇل ونەر ءتۇرى وزگە ەلدەردە جاقسىراق دامىعان سياقتى. بال بيلەرى بويىنشا حالىقارالىق دارەجەدەگى تورەشى ليتۆالىق يۋوزاس الەكساندراۆيچيۋس باس بايگەنى رەسەيدىڭ كراسنويارسك قالاسىنان كەلگەن رومان زوتوۆ پەن اننا پوزدنياكوۆانىڭ جۇبىنا بايلاپ بەردى.
«تسيرك ونەرى» اتالىمىندا ءارتۇرلى شىعارماشىلىق ۇجىمدارى سايىسقا ءتۇستى. مۇندا 45 جىلدىق تاريحى بار الماتىداعى قازاق مەملەكەتتىك تسيركىنىڭ سەرىك بوراشەۆ جەتەكشىلىك ەتەتىن اكروباتتار توبى باس جۇلدەنى يەلەندى. بۇل اتالىمدا كەزىندە تالاي قازاقتى سيقىرشىلىق ونەرىمەن باۋراعان بالتابەك جۇماعۇلوۆ اتىنداعى ارنايى ديپلومنىڭ تاعايىندالعانى جانىمىزعا جىلى ءتيدى. بالتابەك مارقۇم باس قالادا تسيرك ونەرىنىڭ نەگىزىن قالاعان ەدى. بىرنەشە جىل بۇرىن «استانالىق تسيركتى» سونىڭ اتىنا بەرۋ تۋرالى ماسەلە دە قوزعالعان. الايدا, ول سول قالپىندا تۇر. ازىرگە ەلوردالىق ونەر ۇجىمىنىڭ ونىڭ اتىنداعى ديپلومدى يەلەنگەنىن كوڭىلگە مەدەۋ تۇتامىز.
ۇلتىمىزدىڭ كورنەكتى اقىنى قادىر مىرزا ءالى سوڭىندا قاناتتى سوزگە اينالعان تالاي جىر تارماقتارىن قالدىردى. سونىڭ ءبىرى – «ناعىز قازاق قازاق ەمەس, ناعىز قازاق – دومبىرا». بۇل ءسوز «حالىقتىق مۋزىكا» اتالىمىنا قاتىسۋشىلاردىڭ ۇرانى ىسپەتتەس بولىپ ەستىلدى. اتالمىش اتالىم ەكى بولىمگە ءبولىندى. «دومبىرامەن ءان ايتۋ» بولىمىندە سان دودادا توپتى جارىپ شىققان ءداستۇرلى ءانشى, ەلوردالىق جاقسىگەلدى ماياساروۆتىڭ بابى مەن باعى كەلىسكەنىنىڭ كۋاسى بولدىق. سونداي-اق, بۇل بولىمدە قازاق ءان ونەرىندە شاشاسىنا شاڭ جۇقتىرماعان دانەش راقىشەۆ اتىنداعى اتاۋلى ديپلوم مەن بيىل تۋعانىنا 90 جىل تولعان اتاقتى كۇيشى-كومپوزيتور نۇرعيسا تىلەنديەۆ اتىنداعى ارنايى سىيلىق پەن ديپلوم ءوز يەگەرلەرىن تاپتى.
«دومبىرا» بولىمىنە قاتىسقان ونەرپازدار دا مول ولجاعا كەنەلدى. مۇندا باس جۇلدە استانالىق ساكەن بەكجانوۆقا بۇيىرسا, ءبىرىنشى, ەكىنشى, ءۇشىنشى ورىنداردان بولەك دومبىراشىلار قۇرمانعازى ساعىربايۇلى, تاتتىمبەت قازانعاپۇلى, بايجىگىت, ءاشىمتاي, نۇرعيسا تىلەنديەۆ سىندى كۇي ونەرىنىڭ مايتالماندارى اتىنداعى جۇلدەنى قانجىعالارىنا باستى.
«كلاسسيكالىق مۋزىكا» اتالىمى دا بىرنەشەگە ءبولىندى. «اكادەميالىق ءان ايتۋ» بولىمىندە استانالىق شاھريزادا تىنىشتىق توپ جاردى. مۇندا ەرمەك سەركەباەۆ پەن كۇلاش بايسەيىتوۆا اتىنداعى ارنايى ديپلومدار دا تابىستالدى. «فورتەپيانو» ءبولىمى بويىنشا الماتىلىق رابيعا دۇيسەنباەۆا باس جۇلدەنى يەلەندى. «الت, ۆيولونچەل, كونتراباس» بولىمدەرىن ءبىر ارناعا توعىستىرعان سايىستا پاۆەل رومانەنكو جەڭىمپاز بولىپ تانىلدى. سونداي-اق, ەۆگەني برۋسيلوۆسكيدىڭ «بوزايعىر» شىعارماسىن جانە جان-باتيست سەباستيان برەۆالدىڭ سوناتالارىن ۇزدىك ورىنداعاندار ديپلوممەن ماراپاتتالدى. عازيزا جۇبانوۆا اتىنداعى اتاۋلى ديپلوم يەگەرى دە انىقتالدى.
بيىلعى فەستيۆالدە وزگە ۇمىتكەرلەرگە قاراعاندا «سكريپكا» بولىمىنە قاتىسقان ماقسات ءجۇسىپوۆتىڭ ەسىمى دارالاندى. ول وسى بولىمدە وزىپ شىعۋىمەن قاتار فەستيۆالدىڭ ەڭ ۇلكەن جۇلدەسى – قر پرەزيدەنتىنىڭ كۋبوگىن يەلەندى. كۋبوكتى وعان استانا قالاسى اكىمىنىڭ ورىنباسارى ەرمەك امانشاەۆ تابىستادى.
فەستيۆالدىڭ جابىلۋىنا بايلانىستى وتكەن گالا-كونتسەرتتە ونىڭ جەڭىمپازدارىمەن قاتار «تurkvizyon – 2015» حالىقارالىق بايقاۋىندا ەلىمىزدىڭ نامىسىن قورعايتىن «وردا» توبى مەن ەسترادا ءانشىسى مارجان اراپباەۆا جينالعاندارعا كوتەرىڭكى كوڭىل-كۇي سىيلادى.
امانعالي قالجانوۆ
