وتكەن جىلدىڭ قورىتىندىسى بويىنشا استانانىڭ شاعىن بيزنەستەگى ۇلەسى 75%-دى قۇرادى. بۇل كورسەتكىشكە قول جەتكىزۋدە 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبانىڭ اسەرى مول. قالالىق ءماسليحاتتىڭ ءبىر توپ دەپۋتاتى جوبا اياسىندا جاڭا بيزنەس يدەيالاردى ىسكە اسىرۋعا مەملەكەتتەن گرانت العان ءۇش جەكە كاسىپكەرمەن كەزدەستى.
اسقار سماعۇلوۆ, عابيت ءتاجىمۇراتوۆ, التىنشاش تابۋلدينا, ارسلانبەك ماعزۇم سىندى حالىق قالاۋلىلارى الدىمەن ەسىلدىڭ وڭ جاعالاۋىنداعى مۇحتار اۋەزوۆ كوشەسىندە ورنالاسقان «شەنبەرگ» جەكە كاسىپكەرلىگىنىڭ وندىرىسىنە ات باسىن بۇردى. شەبەرحانا يەسى وسىدان ءۇش جىل بۇرىن كاسىپكەرلىكتى دامىتۋ جونىندەگى ۇلتتىق جوبا اياسىندا ءوزىنىڭ بيزنەس يدەيالارىن جۇزەگە اسىرۋ ءۇشىن مەملەكەتتەن 5 ملن تەڭگە گرانت ۇتىپ الدى. قايتارىمسىز قارجىعا ءوز شەبەرحاناسىن اشقان گالينا شەنبەرگ سودان بەرى APOLI ساۋدا ماركاسىمەن بالالاردا اللەرگيا تۋدىرمايتىن تابيعي ويىنشىقتار تىگۋمەن اينالىسىپ كەلەدى. بۇل مەكەمە بىلتىر قالالىق «ۇزدىك تاۋارلار» كونكۋرسىندا «حالىققا ارنالعان ۇزدىك تاۋارلار» نوميناتسيا بويىنشا ەكىنشى ورىندى جەڭىپ العان بولاتىن. بۇگىندە جەكە كاسىپكەر 4 ادامدى جۇمىسپەن قامتىپ وتىر. ولاردىڭ ۇشەۋى توقىما توقۋ ءىسى بويىنشا شەبەر بولىپ جۇمىس ىستەيدى.
ودان ءارى دەپۋتاتتار «Green TAL» جشس-گە كەلدى. بۇل جەردە جەكە كاسىپكەر ەمين اسكەروۆتىڭ جەتەكشىلىگىمەن بالالارعا ارنالعان ەكو-دامىتۋشى ويىنشىقتار وندىرىلەدى ەكەن.
– العاشىندا كاسىبىمدى توقىماشىلىقتان باستاپ, كارزىڭكە, قۇمىرا سەكىلدى دۇنيەلەر توقىپ, تۇتىنۋشىلارعا ۇسىندىق. بىراق, بۇل بۇيىمدارعا سۇرانىس بولماعاندىقتان, يدەيام جۇزەگە اسپاي قالدى, كەيىن توقىماشىلىقتى توقتاتىپ, ورنىنا شەبەرحانا, تىگىنشىلىك تسەحىن اشتىم. الەۋمەتتىك باعىتتى قولعا العان سوڭ ەرەكشە قاجەتتىلىگى بار, مۇمكىندىگى شەكتەۋلى جانداردى جۇمىسقا ورنالاستىردىم, – دەدى جەكە كاسىپكەر.
سونداي-اق حالىق قالاۋلىلارى سىعاناق كوشەسىندەگى «ينجسەتيسەرۆيس» جشس-نە بارىپ, الماز ايزاحمەتوۆ باسقاراتىن جىلجىمالى جەلدەتۋ تسەحىنىڭ جۇمىسىمەن جاقىنىراق تانىستى. مۇنداعىلار اۋا وتكىزگىشتەردى, فاسوندى بۇيىمداردى, دەفلەكتورلاردى, دروسسەل-كلاپانداردى, ەمىزىكتەردى وندىرۋمەن اينالىسادى ەكەن.
مەملەكەتتەن قارجىلاي قولداۋ بولعانىمەن, كاسىپ باستاعان جاننىڭ جولىندا كەزدەسەتىن كەدەرگىلەر تۋرالى دا باياندادى. قيىندىقتارعا قاراماستان جەكە كاسىپكەرلەردىڭ ءوز بيزنەسىن دوڭگەلەتىپ, ەلىمىزدىڭ دامۋىنا ۇلەس قوسىپ وتىرعانى قۋانتادى.
