كوگىلدىر كوكتەمدى قاناتىنا قوندىرىپ جەتكەن قۇستارمەن بىرگە قار قۇرساۋىنان ارىلعان تۇمسا تابيعات تا تۇلەي باستايدى. وسى ءبىر عاجاپ كورىنىستىڭ ءسانىن تالدارى سىبدىر قاققان ساياباقتار تولىقتىرادى. استاناعا اعىلعان حالىق كەلبەتى كوز سۇيسىنتەر عيماراتتاردى عانا ەمەس, جاسىل جەلەك جامىلعان ساياباقتاردى دا ارمانسىز ارالاعىلارى كەلەدى. كۇندەلىكتى كۇيكى تىرشىلىكتەن ارىلتىپ, جان راحاتىن سەزىندىرەتىن ساياباقتار ەلوردامىزدىڭ سانىنە اينالعالى قاشان. بيىل دا قالا تۇرعىندارى مەن قوناقتارىنىڭ قىدىرۋىنا ارنالعان بەس بىردەي قالالىق ساياباق جازعى جۇمىسىن باستادى. قالا كوركىنە ءسان قوسىپ تۇرعان استانا, جەرۇيىق, ستۋدەنتتەر, پرەزيدەنت جانە اراي ساياباعىنىڭ جاڭا كەلبەتىمەن ءبىز دە تانىسىپ قايتقان ەدىك.
استانالىق ساياباقتا بىلتىر دا بىرنەشە وزگەشەلىكتەر بولعان ەدى. پاۆيلوندار سانى مەن قوعامدىق تاماقتانۋ ورىندارى كوبەيىپ, ولاردىڭ بارلىعى قازىرگى زامانعى ارحيتەكتۋرالىق تالاپتارعا ساي جاسالدى. ال گۇلزارلار مەن گۇلدەر ساياباقتىڭ اجارىن اشىپ, جاڭاشا رەڭ بەردى. بۇل ساياباقتىڭ ارتىقشىلىعى – كيەلى قۇس – اققۋلاردىڭ ايدىندا ءجۇزىپ جۇرەتىندىگىندە. بيىل كيەلى قۇستارعا قارا اققۋلار مەن قارامويىن اققۋلار قوسىلىپتى. باسقا توعاننان ماندارينكا ۇيرەكتەرىنىڭ ءتورت جۇبىن دا كورىپ قالدىق. جاياۋ جۇرگىنشىلەر كوپىرى جاعىنان كىرەبەرىس تە ايتارلىقتاي وزگەرىسكە ۇشىراپتى. وندا ادەمى مۇسىندەر مەن باسقا دا شاعىن ارحيتەكتۋرالىق پىشىندەر قويىلعان. ءتۇرلى ەكستريمگە اۋەس جاندار ءۇشىن «امەريكالىق سىرعاناق» جانە «5-ەلەمەنت» قىزمەت كورسەتسە, بالالارعا «زىمىراندا ۇشۋ» سياقتى اتتراكتسيوندار ەرەكشە اسەر سىيلادى. ساياباقتىڭ ورتالىق اللەياسىندا, ياعني تۇران داڭعىلى جاعىندا «جاسىل ەنەرگيانى» قولدانۋدىڭ ناقتى مىسالى رەتىندە سيگۆەي مەن گيروسكۋتەرلەرمەن سىرعاناۋعا دا مۇمكىندىك بار.
بيىل جازدا وتەتىن باستى شارا – «ەكسپو-2017» حالىقارالىق كورمەسى بولعاندىقتان, پاۆيلوندار مەن تۇراق ايماقتارى كورمەنىڭ تاقىرىبىنا ساي بەزەندىرىلىپتى. ەكسپو ستيلىندەگى انيماتورلار كورەرمەندەرگە كوتەرىڭكى كوڭىل كۇي سىيلادى. تاعى دا ءبىر ايتا كەتەرلىگى, استانالىق ساياباق ءوز قوناقتارىنا وتكىزىلەتىن مادەني شارالار, ويىن-ساۋىقتار مەن دەمالىس تۇرلەرى تۋرالى اقپاراتپەن كىتاپشالار تاراتتى.
ال جەرۇيىق ساياباعىنداعى «توسىن سىي» جانە «جۇلدىزقۇرت» سياقتى ءىرى اتتراكتسيوندار بالالار ءۇشىن ۇلكەن جاڭالىق بولدى. ەلوردا قوناقتارىنا جاڭا فورماتتاعى ويىن-ساۋىقتار ستۋدەنتتىك ساياباقتا دا ۇيىمداستىرىلدى. «جاز-2017» ساياباق ماۋسىمى ءۇشىن ارنايى ادەمى ينستاللياتسيالارمەن «ساياباقتىڭ جەتى عاجايىبى» اتتى 7 بىرەگەي تاقىرىپتىق باعدارلاما ازىرلەنىپتى. وسى بويىنشا 40 كاسىپقوي ارتيست, بيشىلەر مەن اكروباتتار, انيماتورلار جاس كورەرمەننىڭ قولداۋىمەن جاز بويى قوناقتارعا كوتەرىڭكى كوڭىل كۇي سىيلايتىن بولادى.
بالالارعا ارنالعان قازاق اندەرى مەن بيلەرىنىڭ تەاترلاندىرىلعان بۋففوناداسىن بالاپان-شوۋ ۇيىمداستىرسا, بالالار تانىمال مۋلتفيلمدەردەگى كىشكەنتاي كەيىپكەرلەرمەن مينون-شوۋ شاراسىندا تانىستى. الدار كوسە تۋرالى ەرتەگىنىڭ كەيىپكەرلەرى الاقاي-شوۋ ءازىل-سىقاق قويىلىمىمەن جانە اكروباتيكالىق نومەرلەرمەن ءوز كورەرمەندەرىن قۋانتىپ, شوۋدىڭ سوڭى «قارا جورعامەن» اياقتالادى.
روبوتتار مەن كوشە بيلەرىن ۇناتاتىندار ەكسپو-شوۋدى تاماشالادى. تۋريستىك شوۋدا بولاشاق ەنەرگياسى تۋرالى قويىلىم كورسەتىلىپ, جارىقديودتى كوستيۋمدەر كيگەن ارتىستەر بيلەدى. باعدارلاما بالالارعا دا, ولاردىڭ اتا-انالارىنا دا قاتتى ۇنادى.
وسىلايشا, باس قالانىڭ بەس بۇرىشىندا دۋمانداتىپ ءدۇبىرلى كەشپەن باستالعان ساياباقتاردىڭ اشىلۋى استانالىقتار ءۇشىن ەرەكشە مەرەكە بولدى. ەندى جاز بويىنا ەلوردالىق ساياباقتاردىڭ قوناقتارى بىرقاتار قىزىقتى شارالاردىڭ كۋاسى بولعالى وتىر. ۇيىمداستىرۋشىلاردىڭ ايتۋىنشا, استانا ساياباقتارىندا مۇنداي ەرەكشەلىكتەر بۇرىن-سوڭدى بولعان ەمەس. جاڭا ماۋسىمدا قالالىق ساياباقتاردا كوتەرىڭكى كوڭىل كۇي سىيلايتىن شوۋ باعدارلامالارى, تەاترلاندىرىلعان قويىلىمدار, ميۋزيكلدەر سىندى ءتۇرلى شارالار كوپشىلىك نازارىنا ۇسىنىلدى. جاز بويى جالعاسىن تاباتىن كەرەمەت كەشتەر 5 ساياباقتا كۇنىنە ەكى رەت 100 كۇندە 1000 شارا بولىپ وتەدى. مىنە, عاجاپ!
گۇلجان راحمان
