ەلوردادا دەنساۋلىق ساقتاۋ باسقارماسىنىڭ القا وتىرىسى بولىپ ءوتتى. جيىندا اق حالاتتىلارعا قاتىستى وزەكتى پروبلەمالار تالقىلاندى.
قازىرگى كۇنى اتالعان ۆەدومستۆو قاراۋىندا 38 مەديتسينالىق ۇيىم بار. وندا 3 مىڭنان اسا دارىگەر مەن 6 مىڭداي مەدبيكە جۇمىس ىستەيدى. بىراق 500-دەي مامان ءالى دە تاپشى. بىلىكتى كادرلاردى تارتۋ ءۇشىن الداعى ۋاقىتتا وتباسىلىق تيپتەگى جاتاقحانالار سالۋ جوسپارلانىپ وتىر. سونداي-اق, جوعارىداعى ماسەلەنى شەشۋدە ەڭبەكاقى كولەمىن كوتەرۋ دە ۇلكەن ىقپال ەتپەك. سوڭعى 5 جىلدا مەديتسينا قىزمەتكەرلەرىنىڭ جالاقىسى 40 پايىزعا ۇلعايعان.
شيپاگەرلەردىڭ ساۋاتتىلىعىن ارتتىرۋ بويىنشا دا ءبىراز تىرلىك تىندىرىلدى. «سالاماتتى قازاقستان» باعدارلاماسى ىسكە اسىرىلعان جىلدارى دەنساۋلىق ساقتاۋ سالاسىنىڭ 10 مىڭنان استام مامانى شەتەلدىك جانە جەتەكشى وتاندىق كلينيكالارعا بارىپ, تاجىريبە الماستى. بىلتىر ەلىمىزدەگى عىلىمي ورتالىقتاردا, قيىر جانە تاياۋ شەت مەملەكەتتەردە 4250 دارىگەر مەن مەيىربيكە ارنايى كۋرستان ءوتتى.
باسقوسۋعا جينالعاندار انا مەن بالا دەنساۋلىعىنا دا باسا نازار اۋداردى. استاناداعى پەريناتالدى ورتالىقتاردىڭ 80 پايىزى ساپالى زاماناۋي تەحنيكامەن جابدىقتالعان. سونىمەن قاتار, 10 ورىنعا ەسەپتەلگەن نەوناتالدى حيرۋرگيا ورتالىعى قۇرىلدى. بۇگىنگى تاڭدا جۇرەك اقاۋىمەن دۇنيەگە كەلگەن 600-گە جۋىق سابيگە وسى ورتالىقتا ءساتتى وتا جاسالدى. وسىنىڭ بارلىعى دەموگرافيالىق كورسەتكىشتەرگە وڭ اسەرىن تيگىزەدى. بۇعان سوڭعى جىلدارى بالا تۋ كورسەتكىشىنىڭ 36 پايىزعا وسكەنى دالەل.
شاھار حالقىنىڭ 133 مىڭعا كوبەيۋى دەنساۋلىق ساقتاۋ نىساندارىنا تۇسەتىن جۇكتەمەنى ايتارلىقتاي اۋىرلاتادى. سوعان بايلانىستى استانادا 9 جاڭا اۋرۋحانا اشىلدى. ولاردىڭ تۇگەلىندە ەمدەۋ مەن دياگنوستيكالاۋدىڭ تىڭ ادىستەرى ەنگىزىلدى.
دەر كەزىندە اتقارىلعان شارۋانىڭ ارقاسىندا قالا دارىگەرلەرى 15 پەن 49 جاس ارالىعىنداعى ادامدار اراسىندا اقتق ۆيرۋسىنىڭ تارالۋىن 100 مىڭ كىسىگە شاققاندا 0,14 شەگىندە ساقتاي الدى. ال وبىر اۋرۋلارىن ەرتە كەزەڭدە انىقتاۋ جاعدايلارى 100 مىڭ ادامعا شاققاندا 55,7 كورسەتكىشتى قۇرادى. سوڭعى 5 جىل ىشىندە تۋبەركۋلەزبەن اۋىرۋ فاكتىلەرى 57,5 پايىزعا تومەندەگەن. قان اينالىمى جۇيەسى اۋرۋلارىمەن كۇرەس ناتيجەسىندە وتكىر ميوكارد ينفاركى 32,3 پايىزعا كەمىدى.
استانالىق دەنساۋلىق ساقتاۋ باسقارماسى وكىلدەرىنىڭ ايتۋىنشا, قالا تۇرعىندارىن مەديتسينالىق قىزمەتتەرمەن قامتۋ بويىنشا جۇرگىزىلەتىن جۇمىستار جالعاسادى.
ب. ماراتقىزى, astana-akshamy.kz
