2021 جىلعى 13 تامىزدا قازاقستان رەسپۋبليكاسى ۇكىمەتىنىڭ قاۋلىسىمەن 1 قازان – راديو قىزمەتكەرلەرى كۇنى بولىپ جاريالاندى. بيىل سول مەرەكەنى ەكىنشى رەت اتاپ ءوتىپ وتىرمىز. «سالەمنىڭ دە ءساتى بار» دەگەندەي, وسى ورايدا راديو تۋرالى ويدا جۇرگەن ءبىر ماسەلەنى ايتا كەتۋدى ءجون سانادىق.
قازاقستاننىڭ راديوحابار تاراتۋ تاريحى 1921 جىلدىڭ قازان ايىنان باستالادى. وسى ءبىر عاسىردا راديو ۇلتىمىزدىڭ رۋحاني تۇرمىسىن بايىتىپ, مادەني ورەسىن كوتەرۋگە كوپ ەڭبەك ءسىڭىردى. اسىرەسە قازىرگىدەي ينتەرنەت, تەلەارنا جوق, گازەت-جۋرنال از زاماندا تاۋ-تاۋدىڭ قۋىسىندا جاتقان قويشىلارعا دەيىن راديونىڭ ءۇنىن رۋحاني ازىق ەتتى. بارلىق ادام تەلەفونعا تەلمىرگەن قازىرگى داۋىردە تىڭدارمان سانى بىرتىندەپ ازايعانمەن, راديو ءوزىنىڭ ومىرشەڭدىك قۋاتىن ءالى جوعالتقان جوق. ۇيىندە راديوقابىلداعىش بولماسا دا, كولىكتە كەلە جاتىپ راديو تىڭداۋ كوپ ادامنىڭ ادەتىنە اينالعان. الايدا مەملەكەتتىك راديو سانالاتىن قازاق راديوسى مەن «شالقار» راديوسى قالالاردا ساڭقىلداپ شىققانمەن, شاھاردان شالعاي كەتسەڭ ءۇنى وشەدى. تارتپايدى. اسىرەسە «شالقار» استانادان 10 شاقىرىم ۇزاپ شىقساڭ ۇستاماي, «وكپەسى» سىرىلداپ شىعا كەلەدى. ال بار سەنگەن قازاق راديوسى تازا مەملەكەتتىك تىلدە ەمەس, اراسىندا وزگە تىلدەر دە قامتىلادى. بۇل ەكى راديودان بولەك, اۋدان, قالالاردا ءارتۇرلى راديولار بولعانمەن, ولاردىڭ كوبى ورىس تىلىندە. ەكى تىلدە جۇرگىزىلەدى دەگەن راديولاردىڭ ءوزى ەكى ءتىلدىڭ سالىستىرماسى 50/50 بولۋ كەرەك دەگەن تالاپتى ساقتامايدى, كەرىسىنشە, كوبىنىڭ «كومەيى» ورىسشاعا اۋىپ تۇرادى. ال شەكارا وڭىرلەردە قونىستانعان تۇرعىنداردىڭ قۇلاعىن قىتاي مەن رەسەي راديولارىنىڭ ءۇنى تۇندىرىپ تۇر…
ءبىز بىلگەندە تازا قازاق تىلىندە حابار تاراتاتىن «شالقاردىڭ» تىڭدارمانى از ەمەس. الايدا ەلدىڭ سول سۇيىكتى راديوسىنىڭ تارالىمى ءىرى قالالاردان اسا الماي, اۋىل, اۋدان, ەلدى مەكەندەردەگى ناعىز تىڭدارماندارىنا جەتە الماي تۇر. ال راديونىڭ ءۇنى جەتپەگەن شالعاي اۋىلدارعا گازەت-جۋرنال ۋاقىتىندا بارادى دەپ ءتىپتى ايتا المايمىز.
راديو – ول جاي عانا اقپارات تاراتاتىن جەلى ەمەس, ۇلتتىڭ ءۇنجارياسى, مەملەكەتتىڭ ساياساتىن, ءارتۇرلى ۇگىت-ناسيحاتىنىڭ ەلدىڭ تۇكپىر-تۇكپىرىنە جەتۋىن قامتاماسىز ەتەتىن ماڭىزدى قۇرال. سوندىقتان مەملەكەت بۇل ماسەلەگە بارىنشا نازار اۋدارىپ, مەملەكەتتىك تىلدە حابار تاراتاتىن راديونىڭ قامتىلىم اۋماعىن قاتتى قاداعالاعانى ابزال. «تسيفرلى قازاقستان» قۇرامىز دەن قانشا ايقايلاعانىمىزبەن, ىرگەڭدە جاتتىڭ ءۇنى ساڭقىلداپ, قازاق ءتىلدى راديونىڭ ءۇنى قالادان اسا الماي جاتسا ۇيات ەمەس پە؟! ەلدىگىمىزگە دە سىن!
