«ۇلتتىق مۋزەيگە سىي-تارتۋ» شاراسى قولعا الىنعالى اتالمىش مادەني وشاق جاقسىلاردان قالعان نەبىر قۇندى جادىگەرلەرمەن تولىقتى. ماسەلەن, مۋزەي قورىنا قازاق ءۆالسىنىڭ كورولى اتانعان ءشامشى قالداياقوۆتىڭ پيانينوسى قوسىلدى.
«كۋبان» اتالاتىن بۇل مۋزىكالىق اسپاپتى كومپوزيتورعا 1965 جىلدىڭ 4 اقپانىندا شىمكەنت جاستارى سىيعا تارتقان. جالپى, بالا جاسىنان مۋزىكاعا قۇمار بولعان ءشامشى پيانينودا ويناۋمەن قاتار دومبىرا شەرتىپ, سىرنايدى دا تارتقانى ايتىلادى. اۋىلىنا كەلگەن سىعان جىگىتىنەن ماندولينانى ساتىپ العانى جايلى دا دەرەك بار. قازاقستاننىڭ ەڭبەك سىڭىرگەن قايراتكەرى التىن يمانباەۆا ءشامشى مەكتەپپەن قوشتاسۋ كەشىندە لاتيف ءحاميديدىڭ «بۇلبۇل» ءانىن ماندولينامەن ورىنداپ, اۋىلداستارىنىڭ الدىندا مەرەيى وسكەنىن جازادى.
ءشامشىنىڭ ارتىندا 300-گە جۋىق ءان قالدى. سونىڭ ءبىرازى قازىر ۇلتتىق مۋزەيدە تۇرعان پيانينومەن شىعارىلعان شىعار دەپ توپشىلايمىز. ايتپاقشى, كومپوزيتور بۇل مۋزىكالىق اسپاپتى سىيعا العان جىلى قازاقستان كومسومولى سىيلىعىمەن ماراپاتتالدى. ال 1991 جىلى حالىق ءارتىسى اتاندى. كومپوزيتوردىڭ عۇمىرى وسىدان 26 جىل بۇرىن وسى اقپان ايىندا ءۇزىلدى. ءومىرىنىڭ سوڭعى جىلدارى كيگەن قاراكول بورىگى دە استاناداعى مۋزەيدە ساقتاۋلى. وعان الدا كەڭىرەك توقتالاتىن بولامىز.
امانعالي قالجانوۆ
