«تازا قازاقستان» ەكولوگيالىق اكتسياسى اياسىندا استانا قالاسى ءدىن ىستەرى جونىندەگى باسقارماسىنىڭ باستاماسىمەن دىندەردى زەرتتەۋ ورتالىعى جانە «استانا مەدرەسە» كوللەدجىنىڭ ستۋدەنتتەرى «شاراپات» الەۋمەتتىك قىزمەت كورسەتۋ ورتالىعى اۋماعىندا سەنبىلىك وتكىزدى, دەپ حابارلايدى astana-akshamy.kz
دىندەردى زەرتتەۋ ورتالىعىنىڭ ديرەكتورى الماس ەرنازاروۆتىڭ سوزىنشە, ەكواكتسياعا 60-قا جۋىق ادام قاتىستى.
«ەلوردادا «تازا قازاقستان» ەكولوگيالىق اكتسياسى وتكىزىلىپ جاتىر. بۇگىن قالالىق دىندەردى زەرتتەۋ ورتالىعىنىڭ قىزمەتكەرلەرى جانە استانا قالاسىنىڭ مەدرەسە كوللەدج ستۋدەنتتەرى كەلىپ, تازالىق جۇمىستارىن جۇرگىزىپ جاتىر. ودان بولەك ورتالىق قاريالارىمەن كەزدەسەمىز. جالپى سەنبىلىككە 60-قا جۋىق ادام قاتىسىپ جاتىر. وسى ۋاقىتقا دەيىن ءدىن ىستەرى جونىندەگى باسقارما باستاماسىمەن بىرنەشە سەنبىلىك ۇيىمداستىرىلدى», – دەيدى الماس ەرنازاروۆ.
يگى باستاماعا قاتىسقان «استانا مەدرەسە» كوللەدجىنىڭ 2-كۋرس ستۋدەنتى ميراس سەرىكۇلىنىڭ ايتۋىنشا, وقۋ ورداسىنىڭ ستۋدەنتتەرى ارقاشان ەكولوگيالىق اكتسيالاردى قولدايدى.
«ءبىزدىڭ كوللەدجدە مۇنداي ءىس-شارالار ءجيى بولىپ تۇرادى. ارقاشان كوللەدج اۋماعىندا تازالىق جۇمىستارىن جۇرگىزەمىز جانە وسىنداي الەۋمەتتىك ورتالىقتارعا كومەكتەسىپ تۇرامىز. ءبىز ارقاشان ەكواكتسيالاردى قولدايمىز», – دەيدى ەلوردالىق ستۋدەنت.
ەكواكتسيا بارىسىندا ورتالىقتا الەۋمەتتىك قىزمەت الۋشىلارمەن كەزدەسۋ ۇيىمداستىرىلدى. جيىنعا ىرىسكەلدى قاجى اتىنداعى مەشىتتىڭ باس يمامى نۇرلان بايجىگىتۇلى قاتىسىپ, قاريالار مەن ولارعا كۇتىم جاساپ وتىرعان قىزمەتكەرلەرگە ريزاشىلىعىن ءبىلدىردى.
«ءبىز وسى الەۋمەتتىك ورتالىققا ءجيى كەلىپ تۇرامىز. اتا-اجەلەرىمىزدىڭ كوڭىل-كۇيىن اۋلاپ, ءجيى سۇحبات جۇرگىزەمىز. جالپى ەلىمىزدە مۇنداي مەكەمەلەرگە كوپ كوڭىل بولىنەدى. ورتالىقتاعى قاريالار جىلى پەيىلگە مۇقتاج. سەبەبى جاس كەلگەن سايىن ادام بالاسى ءار نارسەگە سىنمەن قارايدى. سوندىقتان دا قاريالارعا جاقسى ءسوز ايتۋ ولارعا قۋات سىيلايدى», – دەيدى ول.
ءوز سوزىندە نۇرلان يمام الداعى ۋاقىتتا ورتالىق قاريالارىن كىشى قاجىلىققا اپارۋدى جوسپارلاپ وتىرعانىن اتاپ ءوتتى.
«بيىل كۇزدە ورتالىقتاعى ءوز ەركىمەن جۇرە الاتىن, دەنساۋلىعى جولدى كوتەرە الاتىن قاريالاردى قاجىلىققا اپارۋ تۋرالى جوسپارىمىز بار. ءبىز مۇنداي باستامانى باسقا وڭىرلەردە داستۇرگە اينالدىردىق. قاريالاردى كۇتۋشى ادامدارمەن الىپ بارىپ, قىسقامەرزىمدى قاجىلىققا اپاراتىن بولامىز», – دەدى ول.
كەزدەسۋ سوڭىندا الەۋمەتتىك ورتالىق ديرەكتورى ارداق سەيىتوۆا ەكواكتسيا قاتىسۋشىلارىنا العىس ءبىلدىردى.
