«شاراپات» شۋاعى
جاسى كەلگەن قارتتارعا ەڭ كەرەگى – كوڭىل. سوندىقتان مەرەكە قارساڭىندا «جاسوتاندىقتار» اكىمدىكتىڭ «شاراپات» الەۋمەتتىك قىزمەت كورسەتۋ ورتالىعىنا بارىپ, قاريالارمەن ءبىر پارتيا شاحمات ويناپ قايتتى.
سونىمەن قاتار جاستار ارداگەرلەرىمەن ۇستەل تەننيسى, توعىزقۇمالاق, دويبى وينادى. «جاس وتان» جاستار قاناتىنىڭ ءباسپاسوز قىزمەتىنىڭ جەتەكشىسى ايگەرىم سەرىكجانوۆانىڭ ايتۋىنشا, بەلسەندىلەر قاريالارعا ءاردايىم كوڭىل بولەدى.
– «ارداگەرلەردى ارداقتايىق» جوباسى 2014 جىلدان باستاپ قولعا الىندى. بيىل ءبىز 25 قىركۇيەكتە «قارتتارىم, امان ساۋمىسىڭ» شاراسىن باستاعان بولاتىنبىز. شارا 5 قازانعا دەيىن جالعاسىن تابادى. ونىڭ اياسىندا بۇكىل رەسپۋبليكادا 16 مىڭ «جاسوتاندىقتىڭ» قاتىسۋىمەن ءتۇرلى يگى ىستەردىڭ باسىن قايىرامىز.
ال بۇل شارا جاستار اراسىندا ەگدە ادامدارعا, ارداگەرلەرگە قامقورلىق پەن قۇرمەت كورسەتۋدىڭ ماڭىزدىلىعىن ءتۇسىندىرىپ, ۇرپاقتار اراسىنداعى ساباقتاستىقتى نىعايتادى. ەلباسىمىزدىڭ ءوزى «رۋحاني جاڭعىرۋ: بولاشاققا باعدار» ماقالاسىندا جاڭعىرۋدىڭ باستى تىرەگى – ۇلتتىق مادەنيەت پەن كودتى ساقتاۋ دەگەن. ال ءبىزدىڭ اتا-اجەلەرىمىز سالت-ءداستۇردى, تاريح پەن مادەني بايلىقتى دارىپتەيدى. بۇل اسىل قازىنانى ەلەمەي, سانانى وزگەرتۋ مۇمكىن ەمەس.
مەرەكە اياسىندا پارتيا بەلسەندىلەرى استانالىق سوعىس ارداگەرلەرى مەن تىل ەڭبەككەرلەرىنىڭ ۇيلەرىنە بارىپ, اۋلالارىن تازارتىپ, كىشىگىرىم سىيلىقتار تارتۋ ەتپەك.
گۇلدانا تالعاتقىزى