ەلىمىزدە تاعدىردىڭ تاۋقىمەتىن تاتىپ, قيىنشىلىقتان قاجىپ جۇرگەندەرگە قول ۇشىن سوزۋدى ساۋاپتى ءىس سانايتىن جاندار كوپ. شىق بەرمەس شىعايبايداي «تاپقانىم تەك وزىمە» دەپ ەمەس, پايداسىنىڭ ءبىر بولىگىن قايىرىمدىلىققا جۇمساپ, جومارتتىق تانىتقاندى ءجون كورەدى. اقشاسىنىڭ كوپتىگىنەن ەمەس, كوڭىلىنىڭ كەڭدىگىنەن بولسا كەرەك. تاعى تاڭنان كەشكە دەيىن ءجۇرىپ, ىستەگەن ءىسى, ادال ەڭبەگى ءۇشىن اقى سۇرامايتىندار دا بار. ولار ەرىكتىلەر – ەرىككەندەر ەمەس تەك. جاقسىلىقتى تۋ ەتكەن جوبالار وسىنداي نيەتتەس ادامداردى يگى ىسكە جۇمىلدىرادى. سونىڭ ءبىرى – «شاپاعات» حالىقتىق جوباسى. جاعدايى تومەن جانە كوپبالالى وتباسىلارعا, جالعىزباستى انالارعا, مۇمكىندىگى شەكتەۋلى جاندار مەن زەينەتكەرلەرگە كۇن سايىن ازىق-تۇلىك, كيىم-كەشەك جاعىنان قولداۋ كورسەتىپ, تىگىن, مانيكيۋر, بەت ارلەۋ, شاشتاراز, ازپازدىق بويىنشا شەبەرلىك ساباقتارىن ۇيىمداستىرادى. باستىسى – ءبارى تەگىن. ءيا, ءبىز بۇگىن قايىرىمدىلىق جايىن, «شاپاعاتتىڭ» شاراپاتىن ءسوز ەتەمىز.
قايىرىمدىلىقتىڭ كوبەيگەنىنە قۋانبايمىن
قايىرىمدى ءىستىڭ باستاماسىنا قكحپ-نىڭ مۇشەسى, ءماجىلىس دەپۋتاتى ايقىن قوڭىروۆ سەپ بولىپتى. «2016 جىلى ونىڭ تاراپىنان قولداۋعا ءزارۋ ادامدارعا كومەك كورسەتۋ تۋرالى ۇسىنىس ءتۇستى. مەن ونى ءارى قاراي ءوربىتىپ, بىردەن ىسكە كىرىسىپ كەتتىم. سەبەبى ءوزىم دە كوپبالالى وتباسىدان شىققانمىن. توقسانىنشى جىلداردا داعدارىس دەندەگەن كەزەڭدە اكە-شەشەم جۇمىسسىز قالدى, ازىق-تۇلىك الۋعا اقشامىز بولمايتىن. سوندىقتان دا مەن قيىندىققا, جوقشىلىققا تاپ بولعانداردىڭ جاعدايىن ءجىتى تۇسىنەمىن. جۇرەگىممەن سەزىنەمىن» دەيدى نازگۇل ماقجان.
ءاۋ باستا استانا بويىنشا اياسى تار كورىنگەن «شاپاعات» بۇگىندە 12 وبلىس بويىنشا قىزمەت كورسەتەدى. قالادان تىس جەرلەرگە, شالعاي ايماقتارعا ازىق-تۇلىك جيىنتىعىن جەتكىزەدى. كەي ادامدار تۇرعىندار وزدەرىن جالىقتىرعان كويلەكتەرى مەن اياق كيىمدەرىن لاقتىرىپ تاستاۋعا قۇمار. ال جاعدايى تومەن ادامدار بۇل زاتتاردى ءبىر ەمەس, بىرنەشە جىل كيەدى. قىسقاسى, كيىلگەن كيىمنىڭ دە وزگەگە ءۇشىن ۇلكەن كومەگى بار. وتكەن جىلى جوبا اياسىندا 5500 بالا مەكتەپ فورماسىنا قول جەتكىزسە, ەلوردالىق وتباسىلارعا 10 توننا ازىق-تۇلىك بەرىلگەن. ال بيىل شىلدە ايىندا پارتيامەن بىرگە 8600 وتباسىعا ازىق-تۇلىك بەرىلدى. ەل كولەمىندە شامامەن 100 توننا ازىق-تۇلىك تاراتىلعان.
سونداي قولداۋ كورگەن جانداردىڭ ءبىرى گۇلشات بەكسەيتوۆا ءوز وقيعاسىمەن ءبولىستى. «مەنىڭ ءۇش بالام بار. ۇلكەن ۇلىم 15 جاستا, مۇگەدەك. ۇلىم تۇرىپ جۇرە المايدى, وزدىگىنەن تىنىس المايدى. يۆل اپپاراتىنىڭ كومەگىمەن دەم الادى. ۇلىم ءبىر جىلداي اۋرۋحانادا ەم الدى. سوسىن ۇيگە شىعاردى. الايدا ءدارى-دارمەگى بار, شىنىن ايتسام, قالتاسى كوتەرمەيدى. دارىگەرلەردىڭ ءوزىن ۇيگە شاقىرتىپ, ەمدەتۋ وڭايعا سوقپادى. جان-جاقتان قولداۋ ىزدەدىم, سوندا «شاپاعاتتىقتار» كومەگىن ايامادى. نازگۇل حانىم مەنىڭ جايىمدى دەنساۋلىق ساقتاۋ مينيسترلىگىنە دەيىن جەتكىزىپتى. سودان مەملەكەتتەن تەگىن دارىلەر بەرەتىن بولدى, دارىگەرلەر دە ۇيگە كەلىپ, ۇلىما ەم-دومىن جۇرگىزىپ كەتەدى. ونىمەن قويماي, بيىل ەكى قىزىما مەكتەپ فورماسىن, كومپيۋتەر, كەرەك-جاراعى سالىنعان سومكە سىيعا تارتتى. 3 بالامەن جەسىر قالعانمىن. پاتەر جالداپ تۇرامىن. بالامنىڭ دەنساۋلىعىنا بايلانىستى جۇمىس ىستەي المايمىن. ويتكەنى اپپاراتتارىن اي سايىن اۋىستىرىپ وتىرۋ قاجەت, ونىڭ ءوزى ەلىمىزدە تاپشى, شەتەلدەن الدىرتامىز» دەپ شاپاعاتتىقتارعا شەكسىز العىس ءبىلدىردى.
«شاپاعاتتىڭ» ەلورداداعى بولىمشەسىندە قازىر 11 ادام جۇمىس ىستەيدى. ولاردىڭ دەنى – ەرىكتىلەر. «ءبىز تاپسىرىس قابىلدايمىز, مۇقتاج ادامداردىڭ ءتىزىمىن جاسايمىز, كيىم-كەشەك جيناپ اكەلىپ, ولاردى كىر جۋاتىن ورىندارعا, حيميالىق تازالاۋعا, وزونمەن تازارتۋعا جىبەرەمىز, ودان سوڭ قويماعا ورنالاستىرامىز, ازىق-تۇلىكتى ولشەپ, بۋىپ, ءتۇيىپ, دايىنداپ قويامىز. وسى زاتتار قاجەت ادامدار بىزگە كەلىپ, قالاعانىن اقىسىز الىپ كەتەدى» دەي كەلە, نازگۇل ماقجان ءوزىنىڭ قايىرىمدىلىقتىڭ كوبەيگەنىنە قۋانبايتىنىن ايتتى. سەبەبى ول – حالىقتىڭ جاي-كۇيىنىڭ كورىنىسى. سوندىقتان كومەك سۇرامايتىن جاعدايعا جەتسەك ەكەن دەيدى.
ونىڭ سوزىنشە, بىلتىر «شاپاعات» حالىقتىق جوباسىنىڭ ەلورداداعى كەڭسەسىنە كۇنىنە 10 ادام حابارلاسسا, بيىل ناۋرىز ايىنان باستاپ كۇنىنە شامامەن 80 ادام حابارلاسىپ, كومەك سۇرايتىن بولعان. كۇنىنە 100 ادامعا دەيىن قىزمەت كورسەتىلەدى. تيىسىنشە بۇرىن اۋىسىپ جۇمىس ىستەيتىن 2 ۇيلەستىرۋشى جەتسە, قازىر ولاردىڭ قاسىنا كومەكشى جۇمىلدىرىپتى.
قيىندىققا قارسى تۇرۋعا ۇيرەتتى
«شاپاعات» حالىقتىق جوباسى جانىنان بەت ارلەۋ, تىرناق ادەمىلەۋ, تىگىن تىگۋ سەكىلدى ءتۇرلى تەگىن كۋرستار ۇيىمداستىردى. «جاقىندا بەت ارلەۋدىڭ نەگىزىن مەڭگەرۋگە ىقىلاس بىلدىرگەندەردىڭ كەزەكتى توبى وقۋعا كىرىستى. كارانتين كەزەڭىندە مۇنداي كۋرستارعا قاجەتتىلىك كۇرت كوبەيدى. ءبىز «شەبەر انا» دەگەن كۋرس اشتىق. وندا ىسمەرلەر بالالار كيىمىنەن باستاپ قۇراق كورپەگە دەيىنگى دۇنيەلەردى تىگەدى. بۇعان قوسا «قىز جاساۋىن» تىگۋدى ۇيرەتەتىن كۋرسىمىز بار. قىزدار تىككەن بۇيىمدارىن الەۋمەتتىك جەلى ارقىلى وتكىزىپ, ساتقان العاشقى دۇنيەلەرىن سۋرەتكە ءتۇسىرىپ, بىزگە جىبەرىپ جاتادى. ءبىز ولاردىڭ ءار جەڭىسىنە ءوز جەڭىسىمىزدەي قۋانامىز! دەمەۋشى, تاپسىرىس بەرۋشى تاۋىپ بەرۋگە تىرىسامىز. دەمەۋشىلەپ ىسمەرلەرگە تىگىن ماشينالارىن جانە باسقا دا قاجەتتى كەرەك-جاراقتارىن ساتىپ الىپ بەرەدى. قازىر ءبىزدىڭ كۋرستان وتكەن ءبىر قىزىمىز باسقا ادامدارعا قۇراق كورپە تىگۋدى ۇيرەتىپ, كاسىپ باستاپ جاتىر» دەدى نازگۇل ماعجان.
ماسەلەن, «شەبەر انا» بويىنشا ءبىلىم العان دانا نابيەۆانىڭ بۇگىندە ءوز كاسىبى بار. «بۇل جوبانى 2017 جىلى ەڭ العاش رەت بالالارىمدى جاڭا جىلدىق كەشكە شاقىرعان كەزىنەن بىلەمىن. كۇنى بۇگىنگە دەيىن قولداۋىن ايامايدى. قىركۇيەكتە بالالارىما كومپيۋتەر بەردى. ءوزىم كوپبالالى انامىن, بالالاردىڭ جۇرتتان كەم بولماعانىن قالايمىن, الايدa وعان قاراجات جەتكىلىكسىز بولادى. سول تۇستا شاپاعاتتىڭ شاراپاتى ءتيدى بىزگە. ارنايى جازدىق لاگەر ۇيىمداستىرادى. ءوزىم زاڭ جۇزىندە, ماتەريالدىق, پسيحولوگيالىق كوپ كومەك الدىم. ءتورت بالانىڭ اناسىمىن, ۇيدە وتىردىم. سودان ءبىر كۇنى تىگىن ماشيناسىن بالانىڭ اقشاسىنا ساتىپ الدىم. ءتۇرلى كيىمدەر تىگە باستادىم. شاپاعاتتا «شەبەر انا» كۋرسى اشىلىپتى, سوعان قاتىستىم. ۇلكەن تاجىريبە جينادىم. تاعى بەت ارلەۋ بويىنشا ساباق الدىم. ارتىنشا كاسىبي تىگىنشىلىك ساباعىنا 1 اي قاتىسىپ, جۇمىسقا ورنالاستىم. ال قازىر ءوزىمنىڭ تىگىن سالونىم بار. قاسىما كومەكشى دە الدىم. نازگۇل حانىمنىڭ ارقاسى دەپ بىلەمىن. مەنىڭ بويىمداعى تالانتتاردى اشۋعا سەپ بولدى. ءوز كاسىبىمدى اشۋ مەن ءۇشىن ءتىپتى ورىندالماس ارمان ەدى, بۇگىن قاراسام, ءبارى ءوز قولىڭدا ەكەن. سول جولدا قايىرىمدى جانداردىڭ «شاپاعاتتىڭ» ۇلكەن قولداۋى تۇر» دەيدى دانا. سونداي-اق تاعى ءبىر كەلىنشەك: «مەن ۇلىما كيىم ساتىپ العان جوقپىن باستاپقىدا. ءوزىمنىڭ ادەمى كوك حالاتىمنان كۇرتەشەسىن, جەمپىر قيىندىلارىنان شۇلىق, جاڭا جەمپىر توقىپ بەردىم. وكشەسى جىرتىلعان پولزۋنكيدىڭ بالاعىن قيىپ تاستاپ, قايتارا تىگىپ, تۇيمە قادادىم. ءساندى شالبار تىگىپ بەردىم ءوز قولىمنان. سول ۋاقىتتا ەشكىم ءبىزدى سىرتتان قينالىپ ءجۇر دەپ ويلاعان ەمەس. قايتا مۇنى قايدان الدىڭ دەپ قىزىعاتىندار كوپتەپ كەزدەستى. سوندىقتان العان ءبىلىمىم كادەگە جارادى. قيىندىققا قارسى تۇرۋعا ۇيرەتتى» دەپ جازبا قالدىرىپتى جوبا سايتىندا.
«بوتاقان» – بۇل دا كەزەكتى جاقسىلىق جاساۋعا ارنالعان جوبا. «بىزگە جولداسى نەمەسە جىگىتى تاستاپ كەتكەندىكتەن جانە قارجىلىق قيىندىق سالدارىنان بالالارىن پەرزەنتحانادا تاستاعالى جۇرگەن جۇكتى ايەلدەر كەلە باستادى. بولاشاق انالاردىڭ بوسانار الدىنداعى كەرەكتى زاتتار ءتىزىمىن جيناي الماي, ءۇمىتى تاۋسىلعان. ءبىز ولارعا قولداۋ كورسەتتىك. «شەبەر انا» كۋرسىنا قاتىسۋشىلار ءسابيدىڭ جايالىعىن, جەيدەلەرىن, انالارعا ارناپ حالات تىكتى. ءبىر كاسىپكەر جورگەكپەن قامتاماسىز ەتتى» دەيدى نازگۇل.
«شاپاعات» حالىقتىق جوباسى اياسىندا ءومىردىڭ قيىندىعىنا تاپ بولعان ادامدارعا تەك قانا ماتەريالدىق ەمەس, پسيحولوگيالىق, زاڭگەرلىك كومەك كورسەتىلەدى.
ورتالىقپەن بايلانىسۋ ءۇشىن 8-771-020-93-37 نومىرىنە حابارلاسۋ قاجەت نەمەسە ينستاگرام جەلىسىندەگى @shapagatproekt پاراقشاسىندا حات-حابار قالدىرسا بولادى.
نايما نۇرالىقىزى
