شاتتىق وتانىندا شابىتتاندى
جاقىندا استانا قالاسى مەملەكەتتىك اكادەميالىق فيلارمونياسىنىڭ قازاق وركەسترى حح كونتسەرتتىك ماۋسىمىن اشتى. وسىعان وراي كونگرەسس-حولدا كورنەكتى قازاق كومپوزيتورى سىدىق مۇحامەدجانوۆتى ەسكە الۋعا ارنالعان «شاتتىق وتانى» كونتسەرتى ءوتتى.
كسرو جانە قازاق سسر حالىق ءارتىسى, مەملەكەتتىك سىيلىقتىڭ لاۋرەاتى سىدىق مۇحامەدجانوۆ – رەسپۋبليكامىزداعى مۋزىكالىق مەكتەپتىڭ نەگىزىن قالاعان كومپوزيتورلاردىڭ ءبىرى. ارتىنا مول مۇرا قالدىرعان شىعارماشىلىق يەسى وپەرالاردى, سيمفونيالاردى, وراتوريالاردى, اندەردى, رومانستاردى تۋدىرىپ, حورلار مەن كونتسەرتتەرگە, درامالىق قويىلىمدار مەن كينوفيلمدەرگە ارناپ مۋزىكا جازدى. كونتسەرتتە فيلارمونيا ۇجىمى وسىنىڭ ءبارىن قامتۋعا تىرىستى.
قازاق وركەسترىنىڭ ورىنداۋىنداعى كومپوزيتوردىڭ «قازاق ۋۆەرتيۋراسى» شىعارماسىمەن اشىلعان كونتسەرت ءارى قاراي «قىز قۋ», «كلاسسيكالىق كۇي», «شاتتىق وتانى» سيمفونيالارىنا, «مەرەكە» پوەماسىنا جالعاستى. وركەستردىڭ باس ديريجەرى جانە كوركەمدىك جەتەكشىسى, قر ەڭبەك سىڭىرگەن قايراتكەرى, پروفەسسور ايتقالي جايىموۆ پەن قر مادەنيەت قايراتكەرى نۇرلان بەكەنوۆ مۋزىكانتتارعا بۇل تۋىندىلاردى شەبەر ويناتا ءبىلدى.
باسىنان اياعىنا دەيىن وركەستردىڭ سۇيەمەلدەۋىمەن وتكەن كەشتە فيلارمونيا ءانشىلەرى دە جارقىراپ كورىندى. سىدىق مۇحامەدجانوۆتىڭ «قازدار قايتىپ بارادى» ءانىن ورىنداعان قر ەڭبەك سىڭىرگەن قايراتكەرى قياقباي اسانباەۆ كورەرمەندەردى اسەم ساز بەسىگىندە تەربەتتى. «كوكتەم ءۆالسى» تۋىندىسىن ايتقان حالىقارالىق كونكۋرستاردىڭ لاۋرەاتى ايزادا قاپونوۆا جينالعانداردى سەرپىلتىپ ءوتتى.
كومپوزيتور تۋدىرعان «ايسۇلۋ» وپەراسىنىڭ دۇنيەگە كەلگەنىنە جارتى عاسىردان استى. وسى وپەراداعى ايسۇلۋدىڭ ارياسىن ايتقان قر ەڭبەك سىڭىرگەن قايراتكەرى بيبىگۇل جانۇزاق, سەركەنىڭ كاۆاتيناسىن شىرقاعان «دارىن» مەملەكەتتىك جاستار سىيلىعىنىڭ يەگەرى, قر ەڭبەك ءسىڭىرگەن قايراتكەرى ازامات جىلتىركوزوۆ ءوز پارتيالارىن تاماشا الىپ شىقتى.
سىدىق مۇحامەدجانوۆ – ۇلى ابايدىڭ ولەڭدەرىنە ءان جازعان العاشقى كومپوزيتورلاردىڭ ءبىرى. ءتىپتى ول ابايدىڭ جان دۇنيەسىن تەرەڭ ءتۇسىندى دەپ ايتساق, ارتىق كەتكەندەي بولماسپىز. سونىڭ جارقىن مىسالى رەتىندە كونتسەرتتە ازامات جىلتىركوزوۆ ورىنداعان «جارق ەتپەس قارا كوڭىلىم نە قىلسا دا» ءانىن, باقتيار وماروۆ اۋەلەتكەن «ولسە, ولەر تابيعات» تۋىندىسىن, رەسپۋبليكالىق جانە حالىقارالىق كونكۋرستاردىڭ لاۋرەاتى شاھريزادا تىنىشتىق ايتقان «تاڭعاجايىپ بۇل قالاي حات» شىعارماسىن جانە التىنبەك ءابىلدا شىرقاعان «قۇلاقتان كىرىپ, بويدى الار» رومانسىن ايتۋعا بولادى.
وتكەن عاسىردىڭ ورتا شەنىندە قانابەك بايسەيىتوۆ پەن اقىن قۋاندىق شاڭعىتباەۆتىڭ قالامىنان «بەۋ, قىزدار-اي» كومەدياسى تۋدى. بۇل شىعارمانى مۋزىكامەن سىدىق مۇحامەدجانوۆ كوركەمدەدى. نۇراي تاناباەۆ وسى كومەديادا ايتىلاتىن «ايتەۋىر سول قىز ءبىر سۇلۋ» ءانىن دە ايتىپ, جينالعانداردىڭ دەلەبەسىن قوزدىردى. وسىلايشا كورەرمەندەردى بىردە ءتاتتى مۇڭ قۇشاعىندا تەربەتىپ, بىردە جينالعانداردىڭ كوڭىلىن كوتەرگەن كونتسەرت بارشاعا ۇناپ, كلاسسيك كومپوزيتوردىڭ رۋحىن جاڭعىرتتى.
فيلارمونيا كورەرمەندەرگە الدا ءالى تالاي تاماشا كەشتەردى سىيلاماق. سونىڭ ءبىرى, ەرتەڭ, 23 قىركۇيەك كۇنى كونگرەسس-حولل ساحناسىندا ساعات 19.00-دە وتەتىن «ۇلىتاۋدان قانات قاققان تايجان اقىن» كونتسەرتى. بۇل كەش سىرنايىن ساق-ساق كۇلدىرگەن اقىن, ءانشى, كومپوزيتور, كۇرەسكەر ازامات تايجان قالماعامبەتوۆتىڭ شىعارماشىلىعىنا ارنالادى.
امانعالي قالجانوۆ