ەلوردادا ءاليحان بوكەيحان اتىنداعى №76 مەكتەپ-ليتسەيىندە قر قارۋلى كۇشتەرىنىڭ 30 جىلدىعىنا وراي شەكارا قىزمەتىنىڭ اسكەريلەرىمەن كەزدەسۋ ءوتتى. شارانى نۇر-سۇلتان قالاسى اكىمدىگىنىڭ «رۋحاني جاڭعىرۋ» كمم ۇيىمداستىردى.
كەزدەسۋگە شەكاراشى ارداگەرلەردىڭ «زاستاۆا تارلاندارى» رەسپۋبليكالىق قوعامدىق بىرلەستىگى باسشىسىنىڭ ورىنباسارى امانگەلدى ابىلقانوۆ, بىرلەستىك وكىلى ولەگ نۇرتازاەۆ, قر ۇلتتىق قاۋىپسىزدىك كوميتەتى شەكارا قىزمەتى دەپارتامەنتىنىڭ كەڭەسشىسى جاناربەك مادەدينوۆ, اعا وفيتسەر جانار كەمەل, «جەرگىلىكتى سوعىس جانە اۋعان ارداگەرلەرى وداعى» بىرلەستىگى توراعاسىنىڭ ورىنباسارى ايتۋعان كۋزەرباەۆ قاتىستى.
ەركىن اڭگىمەلەسۋ شاراسىندا شەكاراشى ارداگەرلەر ءوز ەستەلىكتەرىمەن ءبولىستى.
– بالا كەزدەگى ارمانىم اسكەري ادام بولۋ ەدى. ەلدىڭ شەكاراسىندا قىزمەت ەتىپ, ءبىرشاما باسشىلىقتا بولدىم. ءوز ەلىڭنىڭ شەكاراسىن قورعاپ, وعان قىزمەت ەتۋ باسقاشا سەزىم سىيلايدى. ءومىر جولىندا ءتۇرلى وقيعالار كەزدەستى. بىراق پاتريوتتىق سەزىم جاۋىنگەرلىك قىزمەتتە ارتپاسا, ەشقاشان كەمىگەن ەمەس. قايتا ەلىڭدى ودان سايىن جاقسى كورە تۇسەسىڭ. سىزدەرگە دە پاتريوتتىق سەزىمدەرىڭ وشپەسىن دەپ ايتار ەدىم, – دەدى «زاستاۆا تارلاندارى» رەسپۋبليكالىق قوعامدىق بىرلەستىگى باسشىسىنىڭ ورىنباسارى ابىلقانوۆ امانگەلدى.
اسكەري ءومىردىڭ قىر-سىرىن ايتا وتىرىپ, جاۋىنگەرلىكتىڭ وتكەنى مەن بۇگىنى تۋرالى اڭگىمەلەدى.
– شەكاراشىلار قىزمەتىنە قىزدار دا كەلىپ وقي الادى. باستىسى – نيەت پەن جۇمىسقا دەگەن تاباندىلىق. باسقا قىزمەتتەگىدەي ەمەس, اسكەري ادام بولۋ ءۇشىن دەنساۋلىق ماڭىزدى. 11-سىنىپ بىتىرمەستەن جارتى جىل بۇرىن ارنايى تەكسەرىلىپ, قۇجات تاپسىرىپ قويساڭىزدار بولادى. كەز كەلگەن ماماندىقتىڭ قيىندىعى بار. باستىسى, وزدەرىڭىزدەگى سەنىم وشپەسىن!, – دەدى قر ۇلتتىق قاۋىپسىزدىك كوميتەتى شەكارا قىزمەتى دەپارتامەنتىنىڭ اعا وفيتسەرى جانار كەمەل.
قوناقتار وقۋشىلار قويعان شەكارا قىزمەتىنە وقۋعا ءتۇسۋ, ونداعى قىزمەتتىك يتتەر مەن قارۋ-جاراقتار, شەكارا قورعاۋ كەزىندەگى قىزىقتار تۋرالى سۇراقتارعا جاۋاپ بەردى.
بايان اسىلبەكوۆا
