قازان ايىندا ىشكى ىستەر مينيسترلىگىنىڭ ەكى بىردەي شەنەۋنىگىنە ايىپ تاعىلدى. كولىكتەگى ءىىد باستىعىنىڭ ءبىرىنشى ورىنباسارى پاراقورلىقپەن جۇيەلى تۇردە اينالىسقانى ءۇشىن كۇدىككە ىلىنسە, قىلمىستىق-اتقارۋ جۇيەسى كوميتەتىنىڭ ارنايى ەسەپكە الۋ بولىمشەسىنىڭ باسشىسى, ادىلەت پودپولكوۆنيگى قىزمەت بابىن پايدالانا وتىرىپ الاياقتىق جاساعان.
پرەزيدەنت جۋىردا عانا جاريالانعان جولداۋىندا قاراماعىنداعى قىزمەتكەرلەر سىبايلاس جەمقورلىققا قاتىستى قۇقىق بۇزۋشىلىق جاساعان جاعدايدا, ءبىرىنشى باسشىلاردىڭ جەكە ءتارتىپتىك جاۋاپكەرشىلىگى كۇشەيتىلەتىنىن تاپسىردى. بۇعان دەيىن استانادا جۇزەگە اسقان «استانا – ادالدىق الاڭى» جوباسىندا دا قاراماعىنداعى قىزمەتكەرلەر سىبايلاس جەمقورلىق بويىنشا ۇستالسا, ءبىرىنشى باسشىلار دا جاۋاپقا تارتىلاتىنى تۋرالى ايتىلعان بولاتىن. دەگەنمەن جىل باسىنان بەرى قانشا شەنەۋنىكتىڭ ۇستالعانىن بىلسەك تە, ولاردىڭ تىكەلەي باسشىلارىنا قاتىستى شارا قولدانىلعانى تۋرالى ەشقانداي اقپارات ەستىمەدىك.
سونىمەن, ىشكى ىستەر مينيسترلىگىنە قاراستى كولىكتەگى ءىىد باستىعىنىڭ ءبىرىنشى ورىنباسارى ۇلتتىق بيۋرو قىزمەتكەرلەرىنىڭ جەدەل-ىزدەستىرۋ شارالارى كەزىندە قولعا ءتۇستى. ناقتىراق ايتقاندا, شەنەۋنىكتىڭ «قازاقستان» جىلۋ-ەنەرگەتيكالىق كەشەنى» فيرماسىنىڭ ايماقتىق باسشىلارىنا الماتى, قاراعاندى, قوستاناي جانە باسقا دا وبلىستاردا جانارماي ۇرلاۋدا قامقورلىق تانىتقانى انىقتالعان. وعان اتالعان ءوڭىر باسشىلارىنان شىلدە-قىركۇيەك ايلارىندا قامقورلىق تانىتقانى ءۇشىن 2,4 ميلليون تەڭگە پارا العانى جونىندە ايىپ تاعىلدى. ايتا كەتەيىك, بۇعان دەيىن 3 قازان كۇنى دە وسى دەپارتامەنتتىڭ ۇيىمداسقان قىلمىسپەن كۇرەس باسقارماسىنىڭ باسشىسى پارا الدى دەگەن كۇدىكپەن ۇستالعان ەدى.
مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى جاننا باستاروۆانىڭ ايتۋىنشا, ۇستالعان تاعى ءبىر شەنەۋنىك ىشكى ىستەر مينيسترلىگى قىلمىستىق اتقارۋ جۇيەسى كوميتەتىنىڭ ءبولىم باسشىسى بولىپ قىزمەت ىستەگەن. ادىلەت پودپولكوۆنيگى قىزمەت بابىن پايدالانا وتىرىپ, اقتوبە وبلىسىنىڭ تۇزەۋ مەكەمەسىندە وتىرعان سوتتالۋشىنى اقمولا وبلىسىنداعى اباقتىعا اۋىستىرعانى ءۇشىن كۇدىككە ىلىنگەن. وسى ارەكەتى ءۇشىن سىياقىعا دەلدال ارقىلى 2800 اقش دوللارىن الىپ جاتقان ساتتە ءوز كولىگىندە قۇرىقتالدى.
سونىمەن, قاراماعىنداعى قىزمەتكەرلەر تورعا تۇسكەن ءبىرىنشى باسشىلارعا تارتىپتىك جازا بەرىلە مە, كۇتەمىز…
