ەلوردادا جانە الماتىدا 9-13 ماۋسىم كۇندەرى وتكەن زاڭسىز شەرۋلەردە 4 مىڭعا جۋىق ادام ۇستالعان. ولاردىڭ 3 مىڭى تۇنگى ساعات 03-كە دەيىن جەدەل بوساتىلعان. ۇكىمەت ءۇيىنىڭ دالىزىندە تىلشىلەر قاۋىمىنىڭ سۇراقتارىنا جاۋاپ بەرگەن ىشكى ىستەر ءمينيسترى ەرجان تۇرعىمباەۆ وسىنداي دەرەكتەردى جاريا ەتتى.
«ءتورت مىڭعا جۋىق ادام ۇستالدى, سونىڭ ىشىندە 3 مىڭى ۇستالعان كۇنى تۇنگى ساعات 03-كە دەيىن بوساتىلدى. 677 ادام سوت ارقىلى اكىمشىلىك جاۋاپكەرشىلىككە تارتىلدى, 305 ادامعا اكىمشىلىك ايىپپۇل سالىندى» دەدى مينيستر. ول سونداي-اق 9-10 ماۋسىم كۇندەرى قاماۋعا الىنعان تىلشىلەرگە قاتىستى دا وقيعانى ءتۇسىندىرىپ بەردى. راسىندا دا, اتالعان كۇندەرى جۋرناليستەر ۇستالعان. سەبەبى پوليتسيا قىزمەتكەرلەرى تىلشىلەردىڭ ۇستىندە ارنايى كيىمى, موينىنا تاققان بەيدجيگى بولماعاندىقتان, جۇرتتان ايىرا الماعان.
ەرجان تۇرعىمباەۆ رۇقسات ەتىلمەگەن شەرۋلەرگە شىققان ازاماتتاردىڭ شەرۋلەر مەن دەمونستراتسيالار تۋرالى زاڭدى بۇزعانىن ايتتى. ويتكەنى وسى زاڭدا شەرۋگە شىعۋ ءۇشىن, ازاماتتار 10 كۇن بۇرىن جەرگىلىكتى اتقارۋشى ورگانعا ءوتىنىش بەرىپ, رۇقسات العاننان كەيىن عانا ءىس-قيمىلعا كوشە الادى. «شەرۋگە شىققان ازاماتتار ساياباقتارداعى, گۇل باقتارىنداعى تىنىشتىقتى بۇزىپ, مادەني ءىس-شارالاردى وتكىزۋگە كەدەرگى كەلتىردى. مىسالى, نۇر-سۇلتان قالاسىنداعى رەسپۋبليكا داڭعىلىندا ءتورت ساعات بويى جول قوزعالىسى شەكتەلدى. مۇنداي جاعداي باسقا ازاماتتاردىڭ نارازىلىعىن تۋعىزدى. سول سەبەپتەن, قۇقىق قورعاۋ ورگاندارىنىڭ قىزمەتكەرلەرى اتالعان جانجالداردى جويۋعا, قوعامداعى ءتارتىپتى باقىلاۋعا جۇمىلدىرىلدى. اۋەلى پوليتسيا قۇرىلىمدارى, ودان سوڭ ۇلتتىق ۇلاننىڭ ساربازدارى وسى ىسكە تارتىلدى» دەدى ىشكى ىستەر ءمينيسترى.
ءبىزدىڭ پوليتسەيلەر الماتىداعى شەرۋلەردى سۋرەتكە جانە بەينەتاسپاعا ءتۇسىرىپ جۇرگەن Agence France Press ءتىلشىسى كريستوفەر ريكولتوندى پوليتسەيلەر قاماۋعا العان. ويتكەنى ونىڭ ۇستىندە جۋرناليست ەكەنىن ايعاقتايتىن جيلەتى مەن «ءتىلشى» دەگەن جازۋى بولماعان. بۇل وقيعانىڭ انىق-قانىعىن ىشكى ىستەر ءمينيسترىنىڭ ورىنباسارى مارات قوجاەۆ ءتۇسىندىرىپ بەردى. «شەتەلدىك ءتىلشىنى ادامداردىڭ اراسىنان كىم تانيدى؟ ونى جۇرتپەن بىرگە ۇستادىق. بىراق ءتىلشى ەكەندىگىن بىلگەن سوڭ, بىردەن بوساتتىق. ال ونىڭ فوتواپپاراتى, وزگە دە جابدىقتارى بۇلىنگەن بولسا, ءبىز ءبارىن تەكسەرەمىز. كىنالىلەر جازاعا تارتىلادى» دەدى ول ورتالىق سايلاۋ كوميسسياسىنداعى بريفينگتە.
دەمەك, تىلشىلەر ۇستىنە «باق» دەگەن جازۋى بار كيىم كيسە, موينىندا قاي باق-تىڭ وكىلى ەكەنى جازىلعان بەيدجيگى بولسا, پوليتسەيلەردىڭ ۇستاۋعا قۇقى جوق. ايتپاقشى, الماتىدا جانە نۇر-سۇلتاندا بولعان زاڭسىز شەرۋلەردە 4 ءتىلشى ۇستالعان. ولاردىڭ بارلىعى دا بوساتىلدى.
ەرجان تۇرعىمباەۆ كوشەدەگى بەيبەرەكەتسىزدىكتى جويۋ ءۇشىن شاقىرىلعان پوليتسەيلەرگە حالىققا قارسى قانداي دا ءبىر قۇرال قولدانباۋعا بۇيرىق بەرىلگەنىن جەتكىزدى. «ەگەر دە كەيبىر ادامدار دەنە جاراقاتىن العان بولسا, زاڭسىز ۇستالعان بولسا, ولار باس پروكۋراتۋراعا شاعىمدانا الادى. قۇزىرلى مەكەمە قۇقىقتىق باعا بەرەدى» دەدى. ايتپاقشى, 9,10, 11 ماۋسىم كۇندەرى وتكەن شەرۋلەردە 300-دەن اسا پوليتسيا قىزمەتكەرلەرى جاراقات العان. سونىڭ ىشىندە, التاۋى ءالى اۋرۋحانادا جاتىر.
