شەتەلدە دە «شابىتقا» قىزىعۋشىلىق بار

تۇرسىنبەك قاباتوۆ: شەتەلدە دە «شابىتقا» قىزىعۋشىلىق بار

3-7 قاراشا كۇندەرى استانادا «شابىت» شىعارماشىل جاستاردىڭ حح حالىقارالىق فەستيۆالى وتەدى. وسى جولى بايقاۋ «كلاسسيكالىق مۋزىكا» (فورتەپيانو, سكريپكا, الت, ۆيولونچەل, كونتراباس, اكادەميالىق ءان سالۋ), «بەينەلەۋ ونەرى» (كەسكىندەمە, قولدانبالى ونەر), «ۇلتتىق مۋزىكا» (دومبىرامەن ءان سالۋ, حالىق اسپاپتار ءانسامبلى, دومبىرا), «تسيرك ونەرى», «ۇزدىك ادەبي شىعارما» (بالالار جانە جاسوسپىرىمدەرگە ارنالعان پروزالىق شىعارمالار) جانە «اكتەرلىك شەبەرلىك» اتتى التى اتالىم بويىنشا ۇيىمداستىرىلادى. فەستيۆال تالاي تالانتتاردىڭ قاناتىن قاتايتىپ, توپشىسىن بەكىتتى. سونىڭ ءبىرى – تانىمال ازىلكەش تۇرسىنبەك قاباتوۆ. كەزەكتى فەستيۆال قارساڭىندا ونەردە جارقىراپ كورىنۋىنە جول اشقان بايقاۋ جونىندە ءبىز ءارتىستىڭ وزىمەن از-كەم سۇحباتتاس­تىق.

– تۇرسىنبەك, «شابىت» فەستيۆالى شىعارماشىل جاستارعا ۇلكەن ونەرگە جول اشىپ, بۇل كۇندەرى استانانىڭ برەندتەردىڭ بىرىنە اينالدى. ءسىز كەزىندە فەستيۆالدىڭ باس جۇلدەسىن جەڭىپ العانسىز. بۇگىنگى كۇننىڭ بيىگىنەن قاراعاندا, بايقاۋ جونىندە نە ايتاسىز؟
– استانا قالاسىندا العاش رەت «شابىت» 2000 جىلى ۇيىمداستىرىلدى. مەن ءدال سول جىلى فەستيۆالگە قاتىسىپ, باعىم با, الدە بابىم با ەكەن, توپ جاردىم. وندا جيىرما جاستان ءسال عانا اسقان ەدىم, ايتەۋىر بايقاۋ ماعان ەرەكشە اسەر سىيلادى. ۇلكەن ونەرگە كەلۋىمە باسپالداق بولعانىن دا نەسىن جاسىرايىن. بالكىم, العاشقى جىلدارى فەستيۆال حالىق اراسىنا كەڭ تانىلا قويماعان شىعار, بىراق ءوزىم قاتىسقان تۇڭعىش ۇلكەن شارا بولعاننان كەيىن «شابىت-2000» ماعان «ءبىر توبە» بولادى دا تۇرادى. جالپى ايتسام, از ۋاقىتتا بايقاۋ رەسپۋبليكالىق دەڭگەيدەن حالىقارالىق دارەجەگە كوتەرىلدى. دەمەك, شەتەلدەردە دە «شابىتقا» قىزىعۋشىلىق بار دەگەن ءسوز. وسىمەن-اق ءبارى تۇسىنىكتى شىعار, فەستيۆالدىڭ دەڭگەيى جىلدان-جىلعا ارتىپ كەلەدى.
– ءوزىڭىز قاتىسقان «شابىتتى» ەسكە الايىقشى. بايقاۋ­دا ءسىز ءۇشىن ەڭ قيىنى نە بولدى؟
– اڭقاۋ, اڭعال كەزىم عوي, استاناعا العاش رەت وسى فەس­تيۆالگە قاتىسۋ ءۇشىن كەلدىم. سوندا قالا ادامدارىمەن قارىم-قاتىناس جاساۋدان باستاپ, ساحنادا ونەر كورسەتۋىمە دەيىن وڭاي بولعان جوق. مەن قاتىسقان اتالىم «ەسترادالىق سويلەۋ جانرى» اتالعاندىقتان دا, ءبىراز تەرلەۋىمە تۋرا كەلدى. ونىڭ ۇستىنە 2000 جىل مادەنيەتتى قولداۋ جىلى ەدى. سوندىقتان دا بولار, سول جولعى بايقاۋعا ەرەكشە ءمان بەرىلدى. وعان قازاقستاننىڭ تۇكپىر-تۇكپىرىنەن جانە تمد ەلدەرىنەن قاتىسۋشىلار كوپتەپ كەلىپ قاتىستى. مەنىڭ ويىمشا, «شابىت» تاريحىنداعى ەڭ كوپ قاتىسۋشىلار سول جىلى بولعان سەكىلدى.
– سول كەزدەگى قازىلار القاسىنىڭ مۇشەلەرى ەسىڭىزدە مە؟ ولاردىڭ اراسىندا كىمدەردى ەرەكشە اتار ەدىڭىز؟
– ارينە, ءبارى ەسىمدە. كورنەكتى كومپوزيتور, سول كەزدە استانا اكىمىنىڭ ورىنباسارى بولعان تولەگەن مۇحامەدجانوۆ پەن قىرعىز رەسپۋبليكاسىنىڭ ۇلتتىق كونسەرۆاتورياسىنىڭ رەكتورى مۇراتبەك بەگاليەۆتىڭ ەسىمدەرىن ەرەكشە اتار ەدىم. ولار جاس ونەرپازدارعا ايرىقشا قامقورلىق تانىتتى. مىسالى, مەنىڭ سول جولى استاناعا كەلىپ, «شابىتقا» قاتىسۋىما تىكەلەي سەبەپكەر وسى كىسىلەر بولدى. سول ءۇشىن ولارعا العىسىم شەكسىز.
– ءوزىڭىز «شابىتتىڭ» قازىلار القاسىنىڭ مۇشەسى بولعىڭىز كەلە مە؟
– شاقىرىپ جاتسا, ارينە, قارسى ەمەسپىن.
– ءسىزدىڭ پىكىرىڭىزشە, فەستيۆال باعدارلاماسىنا تاعى دا اتالىمدار قوسۋ كەرەك پە؟
– بۇل تۇرعىدان قوسارىم بار. استانا ونەرىنىڭ دامۋىنا ۇلەس قوسىپ, ءومىرىن ونەر جولىنا ارناعان قانشاما تۇلعالارىمىزدىڭ ەسىمدەرى بۇگىندەرى اتالماي كەتتى. سول كىسىلەردىڭ اتىنداعى جۇلدەلەر ۇسىنار ەدىم.
– اڭگىمەڭىزگە راقمەت!

امانعالي قالجانوۆ