جاز جايناتىپ, كۇن كۇلدىرىپ بالالارمەن بىرگە الىس ساپارعا شىعۋ اسا قيىن شارۋا ەمەس. ەلىمىزدەگى تۋريستىك كومپانيالار نارىقتىڭ بۇل سەگمەنتىن ابدەن زەرتتەپ, تالعامىڭىز بەن قالتاڭىزعا قاراي ءتۇرلى مارشرۋت ۇسىنا الادى. قالاساڭىز, الەمنىڭ بارلىق ەلىندە بالاڭىزدى دەمالدىرۋعا بولادى. الايدا باتىس ەۋروپادا بالالار مۇددەسى مەملەكەت ساياساتىنا اينالىپ, بار جاعدايدى جاساعان ەكەن.
يسپانيا اسەم تابيعاتىمەن جانە ەۋروپاداعى ەڭ جاقسى جاعاجايلاردىڭ كوپتىگىمەن ەرەكشەلەنەدى. بۇل ەلدەگى بالالاردىڭ دەمالىسى بىرنەشە باعىتتا بەلسەندى دامىپ كەلەدى. ءاربىر يسپاندىق بالالار سپورت لاگەرى جالپى دەنە دامۋىن جانە بەلگىلى ءبىر سپورت ءتۇرىن: تەننيس, ات سپورتى, گولف, فۋتبول, جەلكەندى سپورت, ءجۇزۋ جانە ت. ب. وقۋدى قامتيتىن جەكە جاتتىعۋ باعدارلاماسىن ۇسىنادى. ونى ەلدىڭ تاريحي-مادەني ورىندارىندا تانىمدىق ساياحاتپەن ۇشتاستىرادى. مۇنداي ەكسكۋرسيالارعا بارۋ ارقىلى بالا يسپانيانىڭ وتكەنى مەن بۇگىنى تۋرالى كوپتەگەن قىزىقتى مالىمەت الادى. مۇندا دەمالۋشىلارعا ءتۇرلى شىعارماشىلىق شەبەرحانا, ادەبي-تەاترلاندىرىلعان ۇيىرمە ۇسىنىلادى. يسپانيانىڭ كوپتەگەن ەۋروپالىق ەلدەردەن ايىرماشىلىعى, مۇندا كوپتەگەن وتباسى بالالارىن جازعى لاگەرلەرگە جىبەرۋ ءداستۇرلى بولعاندىقتان, اتالمىش ينفراقۇرىلىم جاقسى دامىعان. بالالار لاگەرلەرى تەك كۋرورتتىق ايماقتا عانا ەمەس, تاۋدا دا ورنالاسقان. بۇل – بالالاردىڭ جايلى تۇرۋى مەن دەمالۋى ءۇشىن ارنايى سالىنعان كەشەندەر. بالالار لاگەرىندە بىلىكتىلىگى جوعارى مۇعالىمدەر مەن ارنايى دايىندالعان كادرلار جۇمىس ىستەيدى. لاگەرلەردىڭ كوپشىلىگى قورعالاتىن, قورشالعان اۋماقتا ورنالاسقان. نەگىزگى باعىتقا قاراماستان, ءار لاگەردە بالانى جان-جاقتى دامىتۋعا باعىتتالعان كەشەندى باعدارلامالار جۇرگىزىلەدى. كوپتەگەن يسپان لاگەرلەرىندە بالاباقشا ۇلگىسىندەگى كۇندىزگى لاگەرلەر دە بار. وندا كۇنى بويى ورتالىقتا دەمالىپ, كەشكىسىن ۇيىنە قايتادى.
بولگاريا – بۇرىننان دەمالىسقا قولايلى, تابيعاتى كوركەم, ينفراقۇرىلىمى دامىعان ەل. مۇندا بالالارعا ارنالعان كەشەندى جۇمىستاردىڭ باسىندا بالالار لاگەرىنىڭ جۇمىسى تۇر. ولاردىڭ باعدارلاماسىنا اكۆاپارككە, دەلفيناريگە بارۋ, مۋزىكا فەستيۆالىن تاماشالاۋ جانە باسقا دا ويىن-ساۋىق ءىس-شارالارى قامتىلعان. سونىمەن قاتار, لاگەرلەردىڭ كوپشىلىگى ءبىلىم بەرۋ باعدارلاماسىن ۇسىنادى. ايتا كەتۋ كەرەك, بولگارياداعى بالالار دەمالىسى بەكىتىلگەن ستاندارت بويىنشا ەڭ قاۋىپسىز سانالادى.
ءتۋريزمى دامىعان ەلدەردىڭ ءبىرى گرەكيادا بالالاردىڭ اتا-اناسىمەن بىرگە دەمالۋىنا جاعداي جاسالعان. مۇنداعى قوناق ۇيلەردە بالانىڭ قاي جاسىنا بولماسىن ارنايى ويىن-ساۋىق باعدارلاماسى وتە تارتىمدى. بالا قاراۋسىز قالمايدى. قوناق ۇيلەردىڭ بارلىعىندا دەرلىك بالالار باسسەينى, ويىن الاڭدارى, كلۋبتار بار.
تۇركياداعى بالالاردىڭ دەمالىسى كوبىنە ءبىلىم الۋمەن بىرىكتىرىلگەن. قازىرگى بالالار دەمالىس لاگەرلەرىنىڭ دەنى سپورت نەمەسە شەت ءتىلىن ۇيرەنۋ سياقتى بەلگىلى ءبىر باعىتقا مامانداندىرىلعان. مىسالى, تۇركياداعى ەڭ قاراپايىم بالالار لاگەرىندە دە اعىلشىن ءتىلى وقىتىلادى.
فينلياندياداعى بالالار ءتۋريزمى دە الۋان ءتۇرلى. ول بالالاردىڭ جاقسى دەمالۋىنا, دەنساۋلىعىن جاقسارتۋعا, جاڭا ءبىلىم مەن كوپتەگەن جاعىمدى ەموتسيا الۋعا مۇمكىندىك بەرەدى. وسىلايشا, بالانىڭ جان-جاقتى دامۋىنا ىقپال ەتە وتىرىپ, اتا-انا نارەستەنىڭ بويىندا جاسىرىن جاتقان قاسيەت پەن قابىلەتتى كورە الادى. ساياحات كەزىندەگى بالانىڭ تانىمدىق ارەكەتى شىعارماشىل تۇلعانى دامىتۋدا ىنتالاندىرۋ قىزمەتىن اتقارادى. بۇل دا ءبىزدىڭ ەسكەرە جۇرەتىن تاقىرىپتىق باعىت.
نورۆەگيادا جەكە-دارا بالالار ءتۋريزمى جوق, ول وتباسى دەمالىسى اياسىندا قاراستىرىلعان. بۇل ەلدە بۇكىل وتباسىمەن ساياحاتتاۋ كەزىندە كەز كەلگەن اتا-انانىڭ دا, بالالاردىڭ دا مۇددەسىن قامتيدى. ەگەر اناسى بالاسىمەن بىرگە ساياحاتتاسا, بيلەتتى بالالار ۆاگونىنا الادى, وندا تىنىمسىز سابيلەر ءۇشىن ويىن بولمەسى جابدىقتالعان. دەمالىس وسىلايشا ساپاردىڭ باسىنان باستالادى.
بالالار ءتۋريزمى يتالياداعى مەملەكەت ساياساتىنا اينالعان. شىن مانىندە, يتاليا – وتباسى جانە بالالار دەمالىسىن ۇيىمداستىرۋدا كوشباسشى ەل. بالالار دەمالىسىن ۇيىمداستىرۋدا «ەرەسەكتەرگە ارنالعان باعدارلاما» ۇسىنىلادى.
سونىمەن, بالالار ءتۋريزمى نارىعىنىڭ تارتىمدى بولۋى بالالاردىڭ دەنساۋلىعىن جاقسارتۋدى, ولاردىڭ ينتەللەكتۋالدىق الەۋەتىن ارتتىرۋعا جانە قوعاممەن بايلانىستى نىعايتۋعا كومەكتەسەدى دەپ قورىتىندى جاساۋعا بولادى. بالالار لاگەرى ءجاسوسپىرىمنىڭ ءوز بەتىنشە شەشىم قابىلداۋعا, تابيعاتتى سۇيۋگە جانە قورعاۋعا, باسقالارمەن وڭاي ءتىل تابىسىپ, بىرلىكتە تاربيەلەۋدىڭ نەگىزىن قالايدى.
بالالار ءتۋريزمى بويىنشا وتاندىق جانە شەتەلدىك باعدارلامالاردى سالىستىرمالى تالداۋ نەگىزىندە شەتەلدىك بالالار دەمالىسىنىڭ نەگىزگى ارتىقشىلىعىنا مىنالاردى جاتقىزۋعا بولادى.
بىرىنشىدەن, «جەتى ءتىلدى ءبىلدىڭ بە, جەتى بەلدەن استىڭ با؟!» دەگەن ۇستانىم بويىنشا بالانىڭ ورەسى ارتادى. ويتكەنى شەت ءتىلىن ۇيرەنۋ ءوز بولاشاعى ءۇشىن ماڭىزدى.
ەكىنشىدەن, باسقا مادەنيەتپەن تانىسۋدان جانە ءارتۇرلى ەلدىڭ بالالارىمەن قارىم-قاتىناس جاساۋدان العان جاڭا اسەرى ءبىر بولەك.
ارينە, شەتەلدەگى دەمالىس – جوعارى تابىستى وتباسىلاردىڭ عانا بالالارىنا بۇيىراتىن نارسە. الايدا ءوز ەلىمىزدەگى تۋريزم ينفراقۇرىلىمىن دامىتۋ الدىندا تۇرعان ەل ءۇشىن شەتەلدىك تاجىريبەنىڭ وزىعىن قولدانىپ, وقۋشى دەمالىسىن بارىنشا جاقسارتۋدىڭ جولىنا ەرتەرەك تۇسسەك, ۇتىلماسىمىز انىق
