بيىل ەلىمىز بويىنشا حالىقارالىق بالالاردى قورعاۋ كۇنى وزگەشە ءوتتى. بالالار مەن جاسوسپىرىمدەردىڭ مۋزىكالىق وركەسترلەرى مەن انسامبلدەرىنىڭ شەرۋى ەلدىڭ بارلىق وڭىرلەرىندە جانە استانا مەن الماتى قالالارىندا ءبىر مەزگىلدە تاڭەرتەڭگى ساعات 11-دە باستالدى.
ءبىلىم جانە عىلىم مينيسترلىگى ۇيىمداستىرىپ وتىرعان شاراعا استانالىق 4 مىڭنان استام جەتكىنشەك قاتىسىپ, ەلوردا كوشەلەرىمەن ءجۇرىپ ءوتتى. بۇل كۇنى بالالار كۇنىنە وراي ۇيىمداستىرىلعان ءتۇرلى مەرەكەلىك شارالاردى استانالىق 30 مىڭنان استام ورەن تاماشالادى.
استانا قالالىق ءبىلىم باسقارماسى دا بۇل كۇننىڭ, ءدال وسى شەرۋدىڭ ەرەكشە وتۋىنە اتسالىستى. 60-قا جۋىق مۋزىكالىق جانە شىعارماشىلىق ۇجىم وسى الاڭداعى شەرۋدە ساپ تۇزەدى. ولاردىڭ اراسىندا بارابانشىلار, ۇرمەلى اسپاپتار وركەسترلەرى مەن انسامبلدەرى, جاستار مەن بالالار حورى, ءتىپتى, قورعانىس مينيسترلىگىنىڭ ۇرمەلى اسپاپتار وركەسترى مەن مەملەكەتتىك اكادەميالىق فيلارمونيا مۋزىكانتتارى دا ونەر كورسەتتى. قالا اكىمدىگى عيماراتىنىڭ الدىنان باستالعان شارادا, ەڭ الدىمەن, «قارا جورعا» فلەشموبى بيلەندى. بۇدان كەيىن قاتىسۋشىلار ورتالىق الاڭنان بەيبىتشىلىك كوشەسى بويىمەن اباي كوشەسىنە, ودان كەيىن رەسپۋبليكا داڭعىلىن بويلاي, كەنەسارى كوشەسىنە دەيىن جاياۋ ءجۇرىپ ءوتتى. قاتىسۋشىلاردىڭ بىركەلكى كيىم ۇلگىسى اسەرلى كورىنىپ, مەرەكەلىك كوڭىل-كۇي سىيلايدى. بالالاردىڭ كوڭىلدەرىن كوتەرىپ, باس قالانىڭ تۇرعىندارىنا ارنالعان اۋقىمى كەڭ شەرۋگە ستۋدەنتتەر, مۇعالىمدەر, كوللەدجدەر مەن جوعارى وقۋ ورىندارىنىڭ ۇستازدارى, اتا-انالار مەن مادەنيەت جانە سپورت سالالارىنىڭ وكىلدەرى دە اتسالىستى. «بۇگىنگى شارا, اسىرەسە, بالالارعا ەرەكشە باقىت سىيلادى. بارلىق اتا-انالار بالالارىن الىپ شىعىپ, قالا بويىنشا تۇتاستاي توي بولىپ جاتقانداي اسەردە تۇرمىز. ءبىز دە ءوز كەزەگىمىزدە وسى شاراعا اتسالىسىپ, بالالاردىڭ وسىنداي رياسىز, جارقىن كۇلكىلەرىنە كۋا بولعانىمىزعا ريزامىز» دەيدى № 49 ورتا مەكتەپتىڭ مۇعالىمى زاكيرا ەراليەۆا.
حالىققا شات-شادىمان كوڭىل-كۇي سىيلاعان بۇل شەرۋلى شارا ەلىمىزدەگى ەرەكشە وقيعالاردىڭ ءبىرى بولدى.
گۇلجان
راحمان
