«جاستار» سارايىندا مۇمكىندىگى شەكتەۋلى جاندار اراسىندا «شەكسىز شىعارماشىلىق-2017» اتتى ءىV اشىق قالالىق فەستيۆال ءوتتى. استانا قالاسى اكىمدىگىنىڭ قولداۋىمەن ءتورتىنشى مارتە ۇيىمداستىرىلعان شارانىڭ بىلتىر اۋقىمى كەڭەيدى.
سوندىقتان شاراعا بيىل استانالىقتارمەن قاتار پاۆلودار, پەتروپاۆلوۆسك, سەمەي, الماتى قالالارىنان كەلگەن 100-دەن اسا ادام قاتىستى. ولار «ەسترادالىق ۆوكال», «حورەوگرافيا», «يشارا تىلىندە ءان ورىنداۋ», «شەكسىز سۇلۋلىق» اتالىمدارىندا ونەر كورسەتتى.
«ەكسپو 2017. بولاشاق ەنەرگياسى» اياسىندا ۇيىمداستىرىلعان فەستيۆالدى اشقان قر ەڭبەك سىڭىرگەن قايراتكەرى, «التىن ءدان» حالىقتىق بي ءانسامبلىنىڭ جەتەكشىسى, قازىلار القاسىنىڭ ءتورايىمى ليۋدميلا گوتسەنكو اتالمىش بايقاۋ مۇمكىندىگى شەكتەۋلى جانداردىڭ ىشتەن تىنىپ جۇرۋىنە جول بەرمەي, بەلسەندى ومىرگە بەيىمدەيتىنىن, تالانتتارىنىڭ جارقىراپ كورىنۋىنە مۇمكىندىك بەرەتىنىن اتاپ ءوتتى.
فەستيۆالگە جاڭادان قوسىلعان «شەكسىز سۇلۋلىق» اتالىمىنىڭ قاتىسۋشىلارى الدىمەن ساحناعا شىقتى. قىزدار وزدەرىن تانىستىرىپ, بي بيلەدى. يشارا تىلىندە ءان ورىنداپ, ءوزدەرىنىڭ اكتەرلىك دارىندارىن كورسەتتى.
«ەسترادالىق ۆوكال» اتالىمىندا استانالىق ازامات تەمىرباەۆ «كەزدەسۋ مەن قوشتاسۋ» انىمەن كورەرمەندەردىڭ ىستىق ىقىلاسىنا بولەندى, ال رۇستەم ءبىلالوۆ سالۆاتورە ادومەنىڭ كۇردەلى ءانىنىڭ ءبىرى – «تombe la neige» شىعارماسىن ورىندادى. «شەكسىز شىعارماشىلىق» بايقاۋىنا بىرنەشە رەت قاتىسقان قاراعاندىلىق ارمان قارىنساۋ دا بارشانى تاعى دا ءتانتى ەتتى. جالپى, بيىلعى فەستيۆالگە 20 شاقتى ۆوكاليست قاتىستى. قازىلار القاسى ولاردىڭ ءبارى دە جەڭىسكە لايىق ەكەنىن اتاپ ءوتتى.
«حورەوگرافيا» مەن «يشارا تىلىندە ءان ورىنداۋ» اتالىمىنا قاتىسقانداردىڭ ونەرى دە جوعارى باعالاندى. سالتاناتتى ماراپاتتاۋ راسىمىندە ونەر كورسەتكەندەردىڭ بارلىعى دا سىيلىقسىز قالعان جوق.
جالپى, ءتورت جىل ىشىندە فەستيۆالگە 150-گە جۋىق ادام قاتىستى. گەوگرافيالىق اۋقىمى كەڭەيگەن شاراعا جىلدا جاڭا اتالىمدار قوسىلۋدا. شارت بويىنشا وعان 18 جاستان اسقان مۇمكىندىگى شەكتەۋلى جاندار مەن ونەر توپتارى قاتىسىپ كەلەدى.
امانعالي قالجانوۆ
