«شىعىس راپسودياسى» – اق تۇندەر قالاسىندا
مامىر ايىنىڭ 17-18 جۇلدىزىندا وتەتىن استانانىڭ سانكت-پەتەربۋرگتەگى مادەني كۇندەرى اياسىندا ميحايلوۆ تەاترىندا «Astana Ballet» شىعارماشىلىق ۇجىمى ونەر كورسەتەدى.
اسىرەسە بي مەن مۋزىكانى شەبەر شەندەستىرگەن بەكزات ونەر – وپەرا مەن بالەتكە كەلگەندە ەرەكشە ىنتىزار پەتەربورلىقتاردىڭ تەاترعا دا, تالعامعا دا باي شاھار ەكەنى راس. رەۆوليۋتسياعا دەيىن ءبىر ورتالىقتان, يمپەراتورلىق تەاتر ديرەكتسياسى ارقىلى باسقارىلعان اتاقتى ماريا, الەكساندر تەاترلارىنىڭ قاتارىنا كەنجە قوسىلعان ميحايلوۆكانىڭ تاريحىنىڭ ءوزى ارىدەن تارتىپ سويلەيدى. العاشقى كەزدەرى ءوز ترۋپپاسى بولماسا دا, I پاۆەل پاتشانىڭ ۇلى كنياز ميحايلدىڭ اتىمەن قالعان ساحنادا سول زامانداردا فرانتسۋز, نەمىس وپەرەتتالارى ءجيى قويىلاتىن. ول جەرگە يوگانن شتراۋس, جاك وففەنباح سىندى كومپوزيتورلاردىڭ تابانى ءتيدى, ماتيلدا كشەسينسكايا, فەدور شالياپين سياقتى سىربازدار مەن سۇڭعاقتار «پاھ!» دەگىزىپ تاڭداي قاقتىردى.
وسىناۋ قاسيەتتى ساحناعا ەلوردامىزدىڭ جاس ونەر ۇجىمى «Astana Ballet» ادەپكىدەن الابوتەن كونتسەرت باعدارلاماسىنان «بازارلىق» الىپ بارا جاتىر. «شىعىس راپسودياسى». قازاق حالقىنىڭ ۇلتتىق ءبيىن, اراسىندا الەم حالىقتارىنىڭ ءداستۇرلى جانە زاماناۋي بي ۇلگىلەرىن, ورىس كلاسسيكاسىن تانىستىراتىن حورەوگرافيالىق مينياتيۋرالار ارقىلى ءبىزدىڭ ونەرپازدار مادەني ارالاس-قۇرالاستىعى بار, بۇكىل الەممەن تامىر بۇلكىلى ءبىر جايدارى ەلدىڭ وكىلدەرى ەكەنىن پەتەربور جۇرتىنا پاش ەتپەك. قازاقستاننان, استانادان ات تەرلەتىپ كەلەتىن ونەرپازداردىڭ افيشاسىن كۇنى بۇرىن اڭداتپالاپ قويعان ميحايلوۆ تەاترىنىڭ سايتىنا بىزدە ەرىنبەي-جالىقپاي كىرىپ شىقتىق. شىنتۋايتىندا, حورەوگرافيالىق نومىرلەر جۇمباققا تولى شىعىس دۇنيەسىن ءار قىرىنان تانىتاتىنداي-اق. برۋسيلوۆسكيدىڭ «قازاق ءۆالسى», كارل دجەنكينستىڭ «قارلىعاشى», ءۇندىنىڭ ساريسۆاتي, قىتايدىڭ تاو ياو, جاپوننىڭ مايكو ءبيى, «Chemirani», «تۇران» سىندى ەتنو-فولكلورلىق توپتاردىڭ مۋزىكاسىنا قويىلعان كوز سۇيسىندىرەرلىك كومپوزيتسيالار بۇيىرتسا سۇتتەي اپپاق تۇندەر قالاسىن سۇلۋ سازىمەن الديلەيدى.
ادىلبەك جاپاق