بەيبىتشىلىك جانە كەلىسىم سارايىندا «شىڭعىسحان» حورەوگرافيالىق سپەكتاكلىنىڭ پرەمەراسى ءوتتى. بۇل قويىلىمدى «ناز» بي تەاترى ساحنالادى.
بۇعان دەيىن ونەرسۇيەر قاۋىم جەر جۇزىنە داڭقى جايىلعان الىپ حان تۋرالى تالاي درامالىق تۋىندىلاردى تاماشالاعانى راس. بىراق بۇل جولعى قويىلىمنىڭ ءجونى بولەك. ويتكەنى ول العاش رەت بي تىلىندە كوپشىلىككە ۇسىنىلدى.
سپەكتاكل ءوز ءداۋىرىنىڭ اسا ءىرى تۇلعاسى شىڭعىسحاننىڭ ومىرىنە ارنالعان. قويىلىم اڭىز اڭگىمەلەرگە سۇيەنە وتىرىپ, حاننىڭ بالا كەزىنەن باستاپ, ەرجەتىپ, ەل بيلەگەن كەزەڭدەرىن قامتيدى. بۇل شىعارماعا تەاتر ۇجىمى بىرنەشە جىل دايىندالعان. سپەكتاكلدى موڭعوليانىڭ كاسىبي حورەوگرافى توكسۋ تومۋرحۋياگ قويدى. «ناز» تەاترىنىڭ ديرەكتورى سۇلتان سرايلوۆ قويىلىمعا دايىندىق بارىسىندا ارتىستەردىڭ ءارى كۇنى سپورتشىلاردىڭ جاتتىعۋىنداي بولعاندىعىن ايتادى. «ولاردىڭ ونەرگە دەگەن جانكەشتىلىگى, ماحابباتى كورگەن ادامدى تاڭعالدىرماي قويمايدى. مۇنداي ونەرگە بەرىلگەن جاستارىمىز باردا بي ونەرى ماڭگىلىك جاسايدى» دەدى ول.
حورەوگرافيا – ءتىلسىز ونەر. بىراق عاجايىپ قيمىل مەن دەنە سىمباتى ارقاسىندا ءبيدىڭ ءتىلىن ۇعىنۋعا بولادى. وسى قويىلىمدى كورىپ وتىرىپ تاريحي وقيعالاردى زامان اعىمىنا ساي جاڭاشا تۇردە جەتكىزۋگە بولاتىندىعىن ءتۇسىندىم. قويىلىمدا بورتەنى قايتارۋ ءۇشىن شىڭعىس حاننىڭ باۋىرلارىمەن بىرگە مەركىتتەرگە قارسى جاساعان جورىعى بي تىلىندە اسەرلى بەينەلەندى. اسىرەسە, شىڭعىسحاننىڭ ءرولىن سومداعان جاس ءارتىس ەرجان قۇدايبەرگەنوۆتىڭ شەبەرلىگى ءسۇيسىندىردى. الايدا ساحنادا ونەر كورسەتكەن بارلىق ارتىستەر ءوز رولدەرىن شىنايى سومداپ شىقتى.
«ءبىز بۇل تۋىندىنى ابدەن ءيىن قاندىرۋ ءۇشىن ۇزاق دايىندادىق. مۇنى موڭعوليالىق حورەوگراف قويعانىمەن, ونى ساحناعا لايىقتاپ, كەيبىر كوركەمدىك تۇستارىن جەتىلدىرىپ, ەپتەپ وزگەرىستەر ەنگىزدىك. قويىلىمنىڭ ستسەنوگرافياسىن قازاقستاننىڭ مادەنيەت قايراتكەرى, سۋرەتشىسى قانات ماقسۇتوۆ جاسادى. ارتىستەردىڭ كيىمدەرى مەن اشەكەيلەرىن موڭعوليانىڭ ديزاينەرلەرىمەن بىرگە ازىرلەدىك. جالپى ايتقاندا, بۇل قويىلىم ءبىزدىڭ تەاتردىڭ 20 جىلدىعىمەن سايكەس كەلىپ, كورەرمەندەرىمىزگە تاماشا تارتۋ بولىپ وتىر» دەدى تەاتردىڭ كوركەمدىك جەتەكشىسى قاديشا اعىمباەۆا.
