«استانا» كونتسەرت زالىندا «رۋحاني جاڭعىرۋ» باعدارلاماسى اياسىندا «شىڭعىسحان» مۋزىكالىق تەاترلاندىرىلعان قويىلىمى ءوتتى. ۇلى قاعان, قولباسشىنىڭ تۋعانىنا 855 جىل تولعانىنا ارنالعان قويىلىمعا استانا قالاسى مەملەكەتتىك اكادەميالىق فيلارمونياسى مەن قاللەكي تەاترىنىڭ ۇجىمدارى قاتىستى.
اتالمىش جوبانى قر ەڭبەك سىڭىرگەن قايراتكەرى, ەلوردالىق فيلارمونيانىڭ باس ديرەكتورى-كوركەمدىك جەتەكشىسى ساكەن ءابدىراحمانوۆ ۇسىندى. قويۋشى رەجيسسەرى – قر ەڭبەك سىڭىرگەن قايراتكەرى بولات ۇزاقوۆ. ستسەناريىن قارلىعاش نۇركەنوۆا, گاۋحار ەرجانوۆا جانە مارجان مىرزابەكوۆا جازدى. ال شىڭعىسحان بەينەسىن جانقالدىبەك تولەنباەۆ سومدادى.
قويىلىمدا الەمدى جاۋلاۋشىنىڭ تۋعانىنان باستاپ ءارى قاراي سىر تارقاتىلادى. اناسى وەلۋننىڭ بەينەسىندە گۇلناز بالاپانوۆا كورىنەدى.
«ەس كىرىپ, اقىل توقتاتقان كەزدەن باستاپ ساداق تارتتىم. كوشپەندى حالقىمنىڭ اتا-سالتىمەن, كيىز تۋىرلىقتى ەلىمنىڭ داستۇرىمەن ات قۇلاعىندا ويناپ ءوستىم. ۇلى دالانىڭ ابىرويىن اسقاقتاتىپ, ەلدىگىمدى نىعايتۋ جولىندا بەل شەشپەي, اتقا قوندىم. تۇلپارىمنىڭ تۇياعى جەتكەن جەرگە كوك تۇرىكتىڭ تۋىن قادادىم. الدىمداعى اق جولىمنان اداسقان ەمەسپىن. بۇل مەنىڭ بابالارىمنان, باعزى زامانداردان جالعاسىپ كەلە جاتقان ءداستۇر ەدى. مەن ۇلى بابالارىمنىڭ جولىنا ارقاشان دا ادال بولدىم» دەگەن شىڭعىسحاننىڭ مونولوگىمەن اشىلاتىن قويىلىم ساحناسىنا جارى بورتە, باتىرلارى مۇقالاي, سۇبەدەي, ۇلدارى ۇگەدەي, شاعاتاي, جوشى, تولە سىندى كوپتەگەن كەيىپكەرلەر شىعادى.
قويىلىمدى فيلارمونيانىڭ قازاق وركەسترى مەن كامەرالىق حورى تاقىرىپقا ساي مۋزىكامەن كوركەمدەدى. كورەرمەندەر ەدىل قۇسايىنوۆتىڭ «ەسۋگەي», مۇحامەتقالي ءتىناليننىڭ «بورشى», ارمان جايىمنىڭ «ۇلى دالا», «وەلۋن», «ماڭگىلىك ەل», شولپان قورعانبەكتىڭ «جامۋحا», «بورتە», «ءتورت نوكەر», ايتقالي جايىموۆتىڭ «ءتورت ۇلى» جانە نۇرلان بەكەنوۆتىڭ «مۇقالاي» اتتى شىعارمالارىن تىڭدادى. سپەكتاكل نۇراي تاناباەۆ سومداعان «تۇگەل ءسوزدىڭ ءتۇپ اتاسى» مايقى ءبيدىڭ باتاسىمەن تۇيىندەلدى.
امانعالي قالجانوۆ
