سايا قاسىمبەك, دراماتۋرگ:
– سوڭعى كەزدەرى تاريحي دەرەككە نەگىزدەلگەن كىتاپتارعا اڭسارىم اۋدى. دراماتۋرگ بولعاندىقتان, جازعان دۇنيەمىزدى قۇجاتتىق دەرەكتەرمەن تولىقتىرىپ وتىرعان ابزال. ءدال قازىر قىتايدان كەلگەن نىعمەت ءمىڭجانيدىڭ قازاق تاريحىنا قاتىستى كىتابىن جانە بەكاسىل بيبولۇلىنىڭ «زيكزال» اتتى تۋىندىسىن باس الماي وقۋدامىن. سونىمەن قاتار, ابايدىڭ قارا سوزدەرى مەن چەحوۆتىڭ ەڭبەكتەرىن قايتالاپ وقي بەرۋدى ادەتكە اينالدىرىپ كەلەمىن.
جازيرا بايىربەك, ءانشى:
– سوڭعى ساتىپ العان كىتابىم «الديدەن ەپوسقا دەيىن» اتتى وتباسىلىق حرەستوماتيا. بۇل جيناق – بەسىك جىرىنان باستاپ, تاقپاق, ساناماق, جاڭىلتپاش, باتا بەرۋ, قيسسا ءسۇل-ءانبيا حيكايالارى, باتىرلار جىرىنا دەيىنگى قۇندى دۇنيەلەردى توپتاستىرعان ەتنوپەداگوگيكالىق ەڭبەك. بۇل جيناق ءار قازاق وتباسىنىڭ تورىنەن ورىن الۋى ءتيىس دەپ ويلايمىن.
اسىلبەك سنادين, ساراپشى:
– جاقىندا استانادا «لايبراري لوۋندج» دەگەن كافەدە بولدىم. كاسىپكەردىڭ ىسىنە ريزامىن. كىتاپ سورەلەرىن تولتىرىپ كادىمگى «لوۋندج بار» جاساپ قويىپتى. تاڭداعان كىتابىڭدى وقىپ وتىرىپ, شايىڭدى ىشەسىڭ. تالعامپاز وقىرمانعا تاڭداۋ از دەمەسەڭ, نەگىزگى يدەياسى ۇنادى. مۇمكىن زامانعا ساي قۇندى كىتاپتاردى وقىرماندارعا شاي بەرىپ وتىرىپ وقىتقان دۇرىس-اۋ دەپ ويلادىم. شاعىن كافە يەسى ۆەلوسيپەد ويلاپ تاپپاسا دا, وقىرمان قاۋىمعا جاعداي جاساپ وتىر. كەزىندە ەينشتەيننىڭ ستۋدەنت كەزىندە گەرمانيادا وسىنداي ستۋدەنتتىك كافەلەردىڭ بولعانىن وقىعان ەدىم. جالپى, ءدال قازىر دجوردان پيتەرسون مەن ناسسيم تالەبتىڭ ەڭبەكتەرىن وقىپ ءجۇرمىن.
