وتكەن سەنبىدە ادىلبەك جاقسىبەكوۆ پەن سەرگەي سوبيانين استانا اكىمدىگى مەن ماسكەۋ ۇكىمەتى اراسىنداعى 2016-2018 جىلدارعا ارنالعان ىنتىماقتاستىق باعدارلاماسىنا قول قويدى.
قازاقستان مەن رەسەي استانالارى باسشىلارىنىڭ دوستىق راۋىشتەگى كەزدەسۋىندە ەكى جاقتى ءتيىمدى بايلانىستاردى ودان ءارى تەرەڭدەتۋ توڭىرەگىندە وزەكتى اڭگىمە ءوربىدى. استاناعا رەسمي ساپارمەن كەلگەن دەلەگاتسيا قۇرامىندا بولعان ماسكەۋ مەرىنىڭ قۇرىلىس ماسەلەلەرى جونىندەگى ورىنباسارى مارات حۋسنۋللين, قالا باسشىسىنىڭ تاعى ءبىر ورىنباسارى, كولىك جانە جول-كولىك ينفراقۇرىلىمىن دامىتۋ دەپارتامەنتىنىڭ باسشىسى ماكسيم ليكسۋتوۆ جانە ماسكەۋ ۇكىمەتىنىڭ ءمينيسترى, سىرتقى ەكونوميكالىق جانە حالىقارالىق بايلانىستار دەپارتامەنتىنىڭ جەتەكشىسى سەرگەي چەرەمين ىسكەرلىك جاعدايىندا سەنىمدى ارىپتەستىك كوكجيەگىن كەڭەيتۋدىڭ مايەكتى ماسەلەلەرى تالقىلانعان وسى جيىنعا قاتىسىپ وتىردى. تاريحي تاتۋ كورشىلەستىك پەن ساليقالى ساياسي قارىم-قاتىناسقا نەگىزدەلگەن قازاقستان -رەسەي ىقپالداستىعى قىزۋ قارقىنمەن دامۋ ۇستىندە ەكەندىگى امبەگە ايان. وسى ورايدا, استانا اكىمدىگى مەن ماسكەۋ ۇكىمەتى 2000 جىلى ەكى قالا اراسىنداعى ساۋدا-ەكونوميكالىق, عىلىمي-تەحنيكالىق جانە رۋحاني-مادەني بايلانىستاردى نىعايتۋعا باعىتتالعان كەلىسىمگە قول قويعان بولاتىن. سونىڭ اياسىندا قوس استانانى جان-جاقتى جاقىنداستىرا تۇسەتىن بىرقاتار يگى شارالار جۇزەگە اسىرىلدى.
«حالىقتارىمىزدىڭ عاسىرلار بويعى تاريحي تامىرلاستىعى, سونداي-اق, ەكى ەلدىڭ قاشاننان قالىپتاسقان سەنىمدى سەرىكتەستىگى استانا مەن ماسكەۋدى ورتاق ماقسات ورايىندا توعىستىرارى ءسوزسىز. ءبىز باۋىرلاس قالا ماسكەۋمەن اندالاستىقتى ءارى قاراي نىعايتا بەرۋگە ايرىقشا نازار اۋدارامىز» دەدى قۇرمەتتى قوناقتاردى قۋانا قارسى العان ادىلبەك جاقسىبەكوۆ.
سالماقتى ءسوزىن ساباقتاعان ەلوردا باسشىسى بۇعان دەيىنگى ساپارلار ناتيجەسىندە الداعى ۋاقىتتاعى ىسكەرلىك جانە گۋمانيتارلىق سالاداعى ىنتىماقتاستىققا بەرىك نەگىز قالاعانىن اتاپ ءوتتى.
ءوز كەزەگىندە ماسكەۋ مەرى استاناداعى وركەندى وزگەرىستەرگە تاڭدانىسىن جاسىرمادى. «مەن مۇندا ءبىرازدان بەرى كەلمەگەن ەدىم. از ۋاقىتتىڭ ىشىندە استانا كورگەن كوزدى سۇيسىندىرەر اسەم شاھارعا عانا ەمەس, ءىرى مەگاپوليسكە اينالىپتى. بۇل ارادان قالا قۇرىلىسى مەن ساۋلەتتىك ءسان-سالتاناتتىڭ نەبىر ۇزدىك ۇلگىلەرىن تاماشالاي الاسىز. شىنىمدى ايتسام, سىزدەردەن ۇيرەنەتىن ۇردىستەر جەتەرلىك ەكەن» دەپ ءسۇيسىنىسىن ءبىلدىردى سەرگەي سوبيانين.
قالا شارۋاشىلىعىن قايتا جاڭعىرتۋ جونىندەگى ماسكەۋدە س.ءسوبيانيننىڭ باسشىلىعىمەن جۇزەگە اسىرىلىپ جاتقان اۋقىمدى باعدارلامالار قازاقستاننىڭ جاس ەلورداسى ءۇشىن دە قىزىعۋشىلىق تۋدىراتىن ءىس-تاجىريبە ەكەندىگى انىق. بۇلاردىڭ قاتارىنا «مەنىڭ كوشەم» كەشەندى باعدارلاماسىن دا, كولىك جۇيەسىن جەتىلدىرۋ ءىسىن دە, جاعالاۋلاردى رەكونسترۋكتسيالاۋ جوبالارىن دا, بۇرىنعى ءوندىرىس ايماقتارىنا اباتتاندىرۋ تاسىلدەرىن دە جاتقىزۋعا بولادى. وسىعان بايلانىستى جۇمىس بارىسىندا ەكى استانانىڭ جەرگىلىكتى اتقارۋشى ورگاندارى ءبىر-بىرىمەن تاجىريبە ءبولىسىپ, اقپارات الماسۋدا. ماسەلەن, جۋىردا عانا ساياباقتار اۋماعىن اباتتاندىرۋ تاجىريبەسىن زەرتتەۋ ماقساتىندا استانالىق ماماندار ماسكەۋگە بارىپ قايتتى.
ماسكەۋ مەرىنىڭ پىكىرىنشە, ىنتىماقتاستىقتىڭ 2016-2018 جىلدارعا ارنالعان مىنا جاڭا باعدارلاماسى ءارتۇرلى سالالارداعى, اتاپ ايتقاندا, قالانى باسقارۋ, دەنساۋلىق ساقتاۋ, جاڭا اقپاراتتىق تەحنولوگيالاردى جەتىلدىرۋ ماسەلەلەرى بويىنشا ەلوردالار اراسىنداعى ەنشىلەستىكتى جوعارى دەڭگەيگە كوتەرۋگە وڭ اسەرىن تيگىزبەك. ەندەشە, بارىس-كەلىس جانە الىس-بەرىس تالاپتارى قاعاز جۇزىندە قالماق ەمەس. قازىرگى ۋاقىتشا ەكونوميكالىق قيىندىقتار بۇرىننان بەرىك ارالاس-قۇرالاستىق ارقاۋىن ءبىر ساتكە دە بوساتپايتىندىعىنا سەنىمىمىز مول.
ءا.جاقسىبەكوۆ مارتەبەلى مەيماندارعا ماسكەۋمەن بىرلەسە جۇمىس ىستەۋدىڭ جاڭا كەزەڭىنە استانانىڭ تولىقتاي ازىرلىگىن جەتكىزدى. ول «EXPO-2017» حالىقارالىق مامانداندىرىلعان كورمەسى كەزىندە ماسكەۋدىڭ استاناداعى كۇندەرىن وتكىزۋ جونىندە ۇسىنىس ءبىلدىردى. بۇل ۇسىنىستى قولداعان س.سوبيانين وزدەرىنىڭ تۋريزم دەپارتامەنتىنە قوس قالانىڭ تۋريستىك فيرمالارىمەن بىرلەسە وتىرىپ, «EXPO» كەزىندە استاناعا ساياحاتتاپ كەلۋدىڭ باعدارلاماسىن جاساۋ جونىندە تاپسىرما بەرەتىندىگىن ەسكەرتتى.
ماسكەۋ مەرى سونىمەن قاتار, تاياۋ ۋاقىتتاردا رەسەي ورتالىعىنداعى اتاقتى حالىق شارۋاشىلىعى جەتىستىكتەرى كورمەسىندە قازاقستاننىڭ ءوز الاڭى پايدا بولاتىنىن حابارلادى. ءسوزىنىڭ سوڭىندا بۇگىندە جاساقتالىپ بىتكەن وسىناۋ پاۆيلوندا استانانىڭ تۇراقتى ەكسپوزيتسياسىن اشۋ تۋرالى ءوز ۇسىنىسىن ايتتى.
كەلەلى كەزدەسۋدەن كەيىن قادىرلى قوناقتار استانانىڭ ايشىقتى نىساندارىن ارالاپ, ەلوردامىزدىڭ ەڭ كورىكتى مادەني-كوپشىلىك ورىندارىمەن تانىستى.
