الەم ەلدەرىنەن ۇيرەنەتىن ءۇردىس كوپ. كەز كەلگەن سالاداعى تىڭ جاڭالىقتىڭ ءتيىمدى تۇستارىن ەنگىزۋ ارقىلى حالىققا قىزمەت كورسەتۋدىڭ ساپاسىن ارتتىرۋعا بولادى. سونداي يگىلىكتى ءىستىڭ ءبىرى – «سوت كابينەتى».
«قايدان كەلەسىڭ؟ سوتتان كەلەمىن. سوتتان ەمەس-اۋ, وتتان كەلەمىن…» دەگەن قازاق قالامگەرىنىڭ شىعارماسىنداعى ديالوگ سول كەزدەگى قوعامنىڭ اششى شىندىعى ەدى. بۇگىنگى شىندىق – باسقا. قازىرگى ۋاقىتتا سول سوتقا سابىلماي-اق, بىرنەشە قىزمەت ءتۇرىن ۇيدە نەمەسە جۇمىستا وتىرىپ بىتىرۋگە بولادى. سونىمەن, «سوت كابينەتى دەگەنىمىز نە؟, حالىققا قانداي پايداسى بار؟» دەگەن ساۋالدارعا جاۋاپ ىزدەسەك.
ايتا كەتەيىك, قازىرگى ۋاقىتتا الەمدە تالاپ ارىزدار ينتەرنەت-رەسۋرستار ارقىلى بەرىلەتىن, سوت اكتىلەرى مەن سوت وتىرىستارىنىڭ اۋديو جازباسى نەمەسە ۆيدەو-حاتتامالارىمەن تانىسۋ مۇمكىندىگى بار ەلدەر قاتارى كوپ ەمەس. ال, قازاقستاندا وسىعان قاتىستى ءتيىستى مالىمەتتەردىڭ بارلىعىن اقپاراتتىق بازادان الۋعا بولادى.
ەكى جىل بۇرىن ەلىمىزدە «سوت كابينەتى» سەرۆيسى قولدانىسقا ەندى. «سوت كابينەتى» – بۇل سوت ورگاندارىنىڭ ونلاين سەرۆيستەرىنە جانە كورسەتەتىن قىزمەتتەرىنە قول جەتكىزەتىن جالعىز تەرەزە. وسى ارقىلى ازامات, ونىڭ وكىلى نەمەسە قورعاۋشىسى وزىنە ىڭعايلى كەز كەلگەن ۋاقىتتا, ۇيدەن, كەڭسەدەن شىقپاي-اق, ينتەرنەت جەلىسى ارقىلى ءوتىنىش پەن ارىزدى ەلەكتروندى تۇردە جىبەرە الادى, مەملەكەتتىك باجدى ونلاين رەجيمىندە تولەپ, سوت قۇجاتىن, سونداي-اق ءىستىڭ بۇكىل تاريحىن قاراپ, سوت اكتىسىن باسىپ شىعارا الادى جانە اتالعان ءىستىڭ پروتسەسسۋالدىق مەرزىمدەرىن دە قاراي الادى.
بۇگىندە قىزمەتتى قولدانۋشىلار قاتارى كۇن ساناپ ارتىپ كەلەدى. حالىقتىڭ قىزىعۋشىلىعى ەسكەرىلە وتىرىپ, اتالمىش قىزمەت ءتۇرى ودان ءارى جەتىلدىرىلىپ, قۇرىلىمىن دا وزگەرتتى. جاڭادان قىزمەت تۇرلەرى قوسىلدى. قازىرگى ۋاقىتتا «سوت كابينەتى» ارقىلى تالاپ قويۋ, اپەللياتسيالىق شاعىم, سوت اكتiلەرiن كاسساتسيالىق تارتىپپەن قايتا قاراۋ تۋرالى ءوتىنىشحات, سىرتتاي شەشىمنىڭ كۇشىن جويۋ تۋرالى ارىز, سوت بۇيرىعىنىڭ كۇشىن جويۋ تۋرالى ارىز, تالاپ ارىزعا پىكىر بەرۋ, سوت وتىرىسىنىڭ حاتتاماسىنا ارىز ەسكەرتپە, سوت اكتىلەرىنىڭ كوشىرمەلەرىن بەرۋگە ارىز جولداپ, تولەم چەگىن تەكسەرە الادى.
بۇل جۇيە سوت پروتسەسىنە قاتىسۋشىلاردىڭ عانا ەمەس, سوتتىڭ دا ماتەريالدىق شىعىنىن قىسقارتادى, ۋاقىتىن ۇنەمدەيدى, ەڭ باستىسى, قاعازباستىلىقتى جويادى.
ساراپشى مامانداردىڭ ايتۋىنشا, «سوت كابينەتى» – ەلەكتروندى سەرۆيسى قازاقستاننىڭ سوت جۇيەسىندەگى ءساتتى جوبا. ونىڭ دالەلى, وسى ۋاقىتقا دەيىن «سوت كابينەتى» ارقىلى ەلەكتروندى تۇردە 1 ملن استام ارىز قابىلدانعان.
گۇلميرا ايماعانبەت
