جاقىندا قازاق ادەبيەتىنىڭ كلاسسيگى عابيت مۇسىرەپوۆتىڭ تۋعانىنا 115 جىل تولدى. وسىعان وراي, استانا قالاسىنىڭ ورتالىقتاندىرىلعان كىتاپحانالار جۇيەسىنە قاراستى №2 كىتاپحانادا جازۋشىنىڭ ءومىرى مەن شىعارماشىلىعىنا ارنالعان ادەبي ساعات ۇيىمداستىرىلدى.
اۋىل مولداسىنان ارابشا حات تانىپ, اۋەلدە ەكى جىلدىق, بۇدان كەيىن ءتورت جىلدىق ورىس مەكتەبىن بىتىرگەن قالامگەردىڭ ادەبيەتكە بەت بۇرۋىنا ۇستازى, اقىن, اۋدارماشى, پەداگوگ بەكەت وتەتىلەۋوۆتىڭ ەرەكشە ىقپالى بولدى. بۇدان كەيىن ورىنبورداعى جۇمىسشى فاكۋلتەتىندە وقىعانىندا, ساكەن سەيفۋلليننىڭ اسەرى ءتيدى. بەيىمبەت مايلين دە عابيت مۇسىرەپوۆتىڭ قالامىنىڭ قاتايۋىنا ۇلەس قوستى.
«ەدىگە» اتتى تىرناقالدى اڭگىمەسى «ەڭبەكشى قازاق» گازەتىندە جارىق كوردى. العاشقى شىعارمالارىنىڭ قاتارىنا «تۋلاعان تولقىندا» پوۆەسى مەن «امەريكان بيدايىعى» شىعارماسى جاتادى. ال «قازاق سولداتى», «ويانعان ولكە», «ۇلپان» روماندارى جازۋشى شىعارماشىلىعىنىڭ شىڭى سانالادى.
عابيت مۇسىرەپوۆ «قىز جىبەك», «قوزى كورپەش–بايان سۇلۋ» وپەرالارىنىڭ ليبرەتتوسىن جازدى. «امانگەلدى», «اقان سەرى–اقتوقتى», «بولاشاققا امانات», «قىپشاق قىزى اپپاق», «قايران مايرا» اتتى درامالىق شىعارمالاردى قالامىنان تۋدىردى. كينودراماتۋرگ رەتىندە دە ەسىمى ايتىلادى.
اتالمىش شارادا كىتاپحاناشىلار جازۋشىنىڭ ادەبيەتكە كەلۋىنەن باستاپ شىعارماشىلىق جولى تۋرالى وقۋشىلارعا اڭگىمەلەپ بەردى. سونىڭ ىشىندە «ۇلپان» رومانىنىڭ ەرەكشەلىكتەرىنە توقتالدى. جالپى ادەبيەتكە, ۇلتتىق ونەرگە قوسقان ۇلەسىن تالدادى.
سونداي-اق, قر ۇلتتىق اكادەميالىق كىتاپحاناسىندا عابيت مۇسىرەپوۆتىڭ شىعارماشىلىعىنا ارنالعان ءدارىس ءوتتى. وندا فيلولوگيا عىلىمىنىڭ دوكتورى, پروفەسسور ايگۇل ۇسەنوۆا جازۋشىنىڭ شىعارماشىلىق لابوراتورياسى جايلى جان-جاقتى اڭگىمەلەدى. كىتاپحانا وقىرماندارى «ءسوز زەرگەرى – عابيت مۇسىرەپوۆ» اتتى كورمەنى تاماشالادى.
امانعالي قالجانوۆ, «استانا اقشامى»
