نۇر-سۇلتان قالاسىنىڭ اكىمى التاي كولگىنوۆ ەلوردالىق سپورتشىلارعا قانداي قولداۋ شارالارى كورسەتىلەتىنىن ايتتى.
«وسىعان دەيىن فەدەراتسيامىزدىڭ سپورتشىلارىمەن, جاتتىقتىرۋشىلارىمەن جانە باسشىلارىمەن كەزدەسۋ وتكىزدىك. ولار ماڭىزدى پروبلەمالاردى قوزعادى: سپورت جابدىقتارىمەن جابدىقتاۋ, جاتتىقتىرۋشىلاردىڭ جالاقىسىن كوبەيتۋ, سپورتشىلاردى ىنتالاندىرۋ (وليمپيادالىق ەمەس سپورت تۇرلەرى), سپورتشىلارعا ارنالعان جەكە مەديتسينالىق مەكەمە جانە ت.ب.
بىرىنشىدەن. سپورت مەكەمەلەرىنىڭ جاي-كۇيى مەن قولجەتىمدىلىگى
سپورتشىلار مەن بۇلدىرشىندەردى دايىنداۋدا جاتتىعۋ ورنى مەن قۇرال-جابدىقتارى ماڭىزدى ءرول اتقارادى. ماسەلەن, وسىعان دەيىنگى كەزدەسۋلەردە سپورت مەكەمەلەرىندەگى ورىندار ءتيىمدى پايدالانىلۋى كەرەكتىگى, بوس ورىندار بولماۋى قاجەت ەكەنى تالقىلانعان. ناتيجەسىندە, «استانا ارەنا» ستاديونىنىڭ بازاسىندا جەكپە-جەك سپورت تۇرلەرىنە ارنالعان زال اشتىق.
سونىمەن قاتار سپورتشىلار مەن قالا تۇرعىندارىنىڭ ءوتىنىشى بويىنشا ۇرلەمەلى فۋتبول الاڭى (الماتى اۋدانى) جوندەلدى, «تولقىن» سپورت كەشەنى كۇردەلى جوندەۋدەن ءوتتى. سول سياقتى «قازاقستان» سپورت كەشەنىندە اۋقىمدى مودەرنيزاتسيالاۋ, «جاستار» سارايىن قايتا جاڭارتۋ جۇمىسى ءجۇرىپ جاتىر. ال اپاتتى جاعدايدا تۇرعان ق.مۇڭايتپاسوۆ اتىنداعى ورتالىق ستاديوننىڭ ورنىنا جاڭا ىڭعايلى سپورت كەشەنى سالىنادى.
قالامىزدا ءتۇرلى سپورت نىساندارى بار. ول ورىنداردا جاتتىعۋلارعا ارنالعان قوسىمشا ساعاتتار بولىنەدى, وسىلايشا سپورت نىساندارى قالا تۇرعىندارى مەن وسكەلەڭ ۇرپاعىمىز ءۇشىن قولجەتىمدى بولماق. وسى باعىتتاعى جۇمىستارىمىزدى ارى قاراي جالعاستىرامىز, سەبەبى ءتۇرلى ۇسىنىستار ءتۇسىپ جاتادى. ۇسىنىستار اراسىندا سپورتتىق قۇرال-جابدىقتار ساتىپ الۋ ماسەلەسى دە بار.
ەكىنشىدەن. سپورتشىلارعا ارنالعان مەديتسينالىق مەكەمە
سپورتشىلارىمىزعا ۋاقىتىلى ءارى جىلدام تۇردە مەديتسينالىق كومەك كورسەتۋدىڭ ماڭىزى زور. بۇل پروبلەمانى وسىعان دەيىنگى كەزدەسۋدە سپورتشىلارىمىز بەن جاتتىقتىرۋشىلارىمىز كوتەرگەن. سپورتشىلارىمىزعا ارنالعان مەديتسينالىق مەكەمە بيىلدان قالماي اشىلادى. قازىر عيماراتتىڭ ازداعان جۇمىسى قالدى. ەندى مەديتسينالىق قىزمەتكەرلەردى وقىتۋ, ارنايى جابدىقتار ساتىپ الۋ قاجەت.
ۇشىنشىدەن. ءبىلىم گرانتتارى, تولەمدەر
بالا كۇنىنەن سپورتپەن اينالىسىپ كەلە جاتقان جاستارىمىز وسى باعىتتاعى جولىن ارى قاراي دا جالعاستىرۋى ءۇشىن جوو-لاردىڭ ءبىلىم گرانتتارىن بولەمىز. بىلتىر وزگە ساناتتاردان بولەك ءبىر عانا سپورت سالاسى بويىنشا 50 گرانت ءبولىندى. بۇل باعدارلامانى بيىل دا جالعاستىرامىز. سول سياقتى 2020 جىلى كاسىبي سپورتشىلار مەن جاتتىقتىرۋشىلاردىڭ (جەكەلەگەن ساناتتار) 10 جىلدان بەرى وزگەرىسسىز كەلە جاتقان اي سايىنعى اقىسىن ۇلعايتتىق.
كەزدەسۋ بارىسىندا قوزعالعان تولەم ماسەلەسىنە كەلەر بولساق, وزگە پروبلەمالار سياقتى شەشۋ ءۇشىن قولعا الدىق. ولاردىڭ ءبىر بولىگىن قىسقا ۋاقىتتا شەشۋگە بولادى, سول سياقتى جۇيەلى تۇردە شەشىلۋى ءتيىس ماسەلەلەر دە بار. ال تولەم ماسەلەسىن جاۋاپتى مينيسترلىكپەن بىرلەسىپ شەشەمىز.
مەملەكەت باسشىسىنىڭ تاپسىرماسىنا سايكەس بۇقارالىق سپورتپەن اينالىسۋ ءۇشىن جاعداي جاساۋعا, بالالار مەن جاسوسپىرىمدەر سپورت مەكتەپتەرىن قولداۋعا ەرەكشە نازار اۋدارامىز. وسى باعىتتارعا الداعى جازبالارىمدا جەكە-جەكە توقتالامىن» دەپ جازدى ەلوردا اكىمى.
